Li-vi Ki 26

Chûn-hàng Kie-min Mùng-fuk

(Sṳ̂n-min Ki 7:12-24; 28:1-14)

1Song-chú kóng: “Ngì-têu cho-m̀-tet cho ngiéu-siong; ngì-têu cho-m̀-tet sat-li̍p sṳ̀n-siong ya-he sa̍k-chhû, ya cho-m̀-tet chhai ngì-têu ke thi-song piong tiâu-khiet ke sa̍k-thèu lòi-cho kin-pai ke tui-siong. Ngài he Song-chú — ngì-têu ke Song-ti. 2Ngì-têu oi sú Ngài ke ôn-sit-ngit, chûn-chhung Ngài ke sṳn-só. Ngài he Song-chú.

3“Ngì-têu na-he sṳ̍t-hàng Ngài ke fap-li̍t, chûn-sú Ngài ke kie-min, 4Ngài oi cheu-sṳ̀ lo̍k-súi pûn ngì-têu, sṳ́ thú-thi chhut-sán ńg-kuk, kó-su tá kó-chṳ́. 5Ngì-têu voi-yû ńg-kuk, yit-chhṳ̍t sû-to phù-thò siuk ke sṳ̀; ngì-têu ke phù-thò voi chak-to ve-chúng ke sṳ̀. Ngì-têu voi-yû chhûng-chiuk ke liòng-sṳ̍t, voi chhai chhṳ-kâ ke thú-thi song ôn-kî lo̍k-ngia̍p.

6“Ngài oi sṳ́ ngì-têu ke thú-thi thai-phìn; ngì-têu cho-tet yit-kau soi-to thiên-kông, m̀-voi pûn-ngìn hak-tó. Ngài oi chiông hiûng-ok ke yâ-chhu tui ngì-têu ke thú-thi sû-thet; chan-chên ya m̀-voi tá-to ngì-têu ke thú-thi. 7Ngì-têu voi tûi-kit thi̍t-ngìn, yung tô-kiam tá-yàng kì-têu. 8Ngì-têu ńg-ke ngìn voi tûi-kit yit-pak ngìn, ngì-têu yit-pak ngìn voi tûi-kit yit-van ngìn; thi̍t-ngìn chhiòn-phu voi sí chhai ngì-têu ke tô-kiam chṳ̂ ha. 9Ngài oi su-fuk pûn ngì-têu, sṳ́ ngì-têu tô-chṳ́ tô-sûn. Ngài oi kiên-thin lâu ngì-têu só-li̍p ke yok. 10Ngì-têu voi yû chhin-tô ke liòng-sṳ̍t, kûi-ngièn mò-khiam, sṳm-chṳ oi vok-thet khiu-liòng lòi tún sîn-liòng. 11Ngài oi chhai Ngài ke sṳn-chong-phùng tî-poi lâu ngì-têu khiung-ha he̍t, chhie̍t-tui m̀-voi lì-khôi ngì-têu. 12Ngài oi hàng chhai ngì-têu tông-chûng, cho ngì-têu ke Song-ti; ngì-têu oi cho Ngài ke chṳ́-mìn. 13Ngài he Song-chú — ngì-têu ke Song-ti. Ngài sṳt thu ngì-têu chhut Âi-khi̍p, sṳ́ ngì-têu mò chai cho Âi-khi̍p-ngìn ke nù-chhòi. Ngài sṳt tá-sui ngì-têu ke ak, sṳ́ ngì-têu cho-tet hàng-lu yû-fûng.”

Vì-poi Kie-min Su Chit-fa̍t

(Sṳ̂n-min Ki 28:15-68)

14Song-chú kóng: “Ngì-têu na m̀ thâng-chhiùng Ngài, m̀ chûn-hàng liá yit-chhiet ke kie-min, ngì-têu voi su-tó chit-fa̍t. 15Ngì-têu na vok-thet Ngài ke fap-li̍t lâu thiàu-li, m̀ chûn-hàng Ngài yit-chhiet ke kie-min, vì-poi lâu Ngài li̍p ke yok, 16Ngài voi chit-fa̍t ngì-têu. Ngài voi kong châi-fo pûn ngì-têu, sṳ́ ngì-têu chho̍k-kiâng, pot chhie̍t-chṳn, pot ngie̍t-phiang, muk-chû fâ-fâ, chhiòn mò ngièn-hi. Ngì-têu voi ve-chúng, chúng-he yû-kûng tá mò-lò, yîn-vi ngì-têu só-chung ke voi pûn thi̍t-ngìn sṳ̍t chhiang-chhiang. 17Ngài voi tui ngì-têu pien-mien, ngì-têu chhiu voi pûn sù-thi̍t tá-phai. Hen ngì-têu ke ngìn voi lòi thúng-chhṳ ngì-têu, hak-to ngì-têu m̀-sṳ́ ngìn kiuk ya voi chéu-to mò-oi miang.

18“Ngì-têu na-he kîn-ko liá-têu châi-nan hàn m̀ thâng-chhiùng Ngài, yîn-vi ngì-têu ke chhui, Ngài pûn ngì-têu ke hìn-fa̍t chhiu voi kâ chhit-phi. 19Ngài voi tá-sui ngì-têu ke ngang-kiáng lâu kiêu-ngau; Ngài voi sṳ́ thiên-táng chhiong thiet m̀-voi lo̍k-súi, sṳ́ ngì-têu ke thú-thi châu-to chhiong thùng án-ngang. 20Mò-lun ngì-têu ngióng-pân sat-mâng ya voi khûng-khûng, yîn-vi thú-thi m̀-voi sên-sán, kó-su m̀-voi tá kó-chṳ́.

21“Ngì-têu na-he ki-siu̍k lâu Ngài chok-tui, hàn m̀ thâng-chhiùng Ngài, yîn-vi ngì-têu ke chhui, Ngài pûn ngì-têu ke châi-fo voi chai-kâ chhit-phi. 22Ngài voi piong hiûng-ok ke yâ-chhu to ngì-têu tông-chûng; kì-têu voi chhióng-sṳ̍t ngì-têu ke chṳ́-ńg, thûn-thet ngì-têu ke thèu-sâng, sṳ́ ngì-têu ngìn-su kám-séu, tho-lu fông-liòng.

23“Kîn-ko liá-têu hìn-fa̍t yî-heu, ngì-têu na hàn-he m̀ chiap-su Ngài ke kón-kau, ki-siu̍k lâu Ngài chok-tui, 24Ngài chhiu voi lâu ngì-têu chok-tui; yîn-vi ngì-têu ke chhui, Ngài voi chai-kâ chhit-phi tá-kit ngì-têu. 25Ngài voi yung chan-chên chit-fa̍t ngì-têu poi-yok ke chhui. Ngì-têu na-he chhi-si̍p chhai sàng-tú, Ngài voi sṳ́ ngì-têu pot-vûn; Ngài ya voi chiông ngì-têu kâu chhai thi̍t-ngìn ke sú-chûng. 26Ngài voi chhiet-thôn ngì-têu ke liòng-sṳ̍t, sṳ́-tó sṳ̍p-ke fu-ngìn-kâ khiung-yung yit-chak cho-thèu phoi-piáng chhiu la. Kì-têu só phi-kip ke piáng voi chhin-séu, ngì-têu sûi-yèn yû tûng-sî sṳ̍t, chúng-he sṳ̍t m̀-páu.

27“Kîn-ko liá-têu hìn-fa̍t yî-heu, ngì-têu na hàn-he m̀ thâng-chhiùng Ngài, ki-siu̍k lâu Ngài chok-tui, 28Ngài chhiu voi thai fat-khién tui-fu ngì-têu; yîn-vi ngì-têu ke chhui, Ngài voi chai-kâ chhit-phi chit-fa̍t ngì-têu. 29Ngì-têu voi ngo-to sṳ̍t chhṳ-kâ chṳ́-ńg ke ngiuk. 30Ngài voi chhak-thet ngì-têu sân-táng ke sṳ̀n-meu, chám-vang ngì-têu ke hiông-thàn, chiông ngì-têu ke sṳ̂n-sṳ̂ fit chhai vang-thet ke ngiéu-siong táng-kô. Ngài ke sîm voi tông-nâu ngì-têu. 31Ngài voi sṳ́ ngì-têu ke sàng-sṳ pien-cho fông-phû; Ngài voi fi-thet ngì-têu kin-pai ke thi-fông, khî-chhie̍t ngì-têu chhîn-hiông ke sên-ngì. 32Ngài voi sṳ́ ngì-têu ke thú-thi vàn-chhiòn fông-fi, lièn cham-liâng liá thú-thi ke thi̍t-ngìn khon-tó ya voi chho̍k-kiâng! 33Ngài voi chiông ngì-têu fûn-san to ngoi-koet hi; Ngài ya voi khià-kiam kiuk ngì-têu. Ngì-têu ke thú-thi voi fông-fi, ngì-têu ke sàng-sṳ pien-cho fông-phû. 34-35Án-ngiòng, thú-thi chhiu voi chṳn-kîn yû-hó hiet-khun, hióng-su ngì-têu he̍t chhai ke-vi ke sṳ̀ m̀-hén pûn kì ke ôn-sit-ngièn. Chhai ngì-têu liù-mòng to ngoi-koet yî-heu, thú-thi voi yîn-vi fông-fi lòi tet-tó ôn-sit.

36“Ngài voi sṳ́ liù-mòng chhai thi̍t-ngìn koet-nui ke ngìn fî-sòng chho̍k-kiâng, lièn fûng-chhôi lo̍k-ya̍p ke sâng-yîm ya voi sṳ́ ngì-têu kiâng-tó thò-chéu. Ngì-têu voi chhiong chhai chan-chhòng pûn-ngìn kiuk-tó kín chéu, mò-ngìn kiuk ya voi kín tiet-tó. 37Mò-ngìn kiuk ya voi siông-chhong; ngì-têu m̀-voi yû li̍t-liong hó tí-khong thi̍t-ngìn. 38Ngì-têu voi chhai liù-mòng chûng sí-thet, pûn thi̍t-ngìn ke thú-thi thûn-thet. 39Ngì-têu chhûn-tó ke ngìn voi yîn-vi chhṳ-kâ lâu chú-siên ke chhui, chhai thi̍t-ngìn thú-thi song sêu-me̍t.

40“Chúng-he, ngì-têu ke heu-thoi voi sṳ̀n-ngin chhṳ-kâ ke chhui-ko, ya voi sṳ̀n-ngin chú-siên ke chhui-ko, yîn-vi kì-têu phoi-ngia̍k Ngài, lâu Ngài chok-tui, 41ngiâ Ngài lòi tui-fu kì-têu, chiông kì-têu kiuk-to thi̍t-ngìn ke thú-thi. Chúng-he ngì-têu ke heu-thoi chui-heu voi yû khiâm-pî ke sîm, vi chhṳ-kâ ke chhui lâu phoi-ngia̍k lòi chiap-su hìn-fa̍t. 42Ke-sṳ̀, Ngài voi sióng-hí Ngài lâu Ngâ-kok só-li̍p ke yok, lâu Yî-sat só-li̍p ke yok, lâu Â-pak-lâ-hón só-li̍p ke yok; Ngài ya voi ki-ngiam liá thú-thi. 43Chúng-he, yit-thin oi siên chiông liá thú-thi ke ngìn-mìn kiuk-chéu, pûn thú-thi hó hióng-su ôn-sit-ngièn; liá-têu ngìn-mìn yîn-vi vok-thet Ngài ke fap-li̍t, vì-poi Ngài ke kie-min, yit-thin oi chiap-su yin-kôi yû ke hìn-fa̍t. 44Sûi-yèn án-ngiòng, kì-têu hàn chhai thi̍t-ngìn thú-thi song ke sṳ̀, Ngài yit-thin m̀-voi vàn-chhiòn fit-thet kì-têu, ya-he fí-me̍t kì-têu, ya m̀-voi fi-thet Ngài lâu kì-têu só-li̍p ke yok. Ngài he Song-chú — kì-têu ke Song-ti. 45Ngài oi lâu kì-têu chhùng-sîn li̍p Ngài lâu kì-têu chú-siên li̍p-ko ke yok. Ngài sṳt hiong lie̍t-koet hién-mìn Ngài ke thai-nèn, tui Âi-khi̍p chiông Ngài ke chṳ́-mìn thu chhut-lòi, sṳ́ Ngài cho kì-têu ke Song-ti. Ngài he Song-chú.”

46Yî-song ke fap-li̍t, thiàu-li lâu kie-min he Song-chú chhai Sî-nai-sân kâu-pûn Mô-sî, oi kì hiong Yî-set-lie̍t-ngìn siên-pu ke.

Currently Selected:

Li-vi Ki 26: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Popular Bible Verses from
Li-vi Ki 26

Videos for Li-vi Ki 26

The Prophets

BibleProject

Leviticus 26-27

Spoken Gospel

Li-vi Ki 26

Popular Bible Verses from
Li-vi Ki 26

Videos for Li-vi Ki 26

The Prophets

Leviticus 26-27

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 26

Li-vi Ki 26

Popular Bible Verses from Li-vi Ki 26

Videos for Li-vi Ki 26

The Prophets

Leviticus 26-27

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 26

Popular Bible Verses from
Li-vi Ki 26