Li-vi Ki 25

Ôn-sit-ngièn

(Sṳ̂n-min Ki 15:1-11)

1Song-chú chhai Sî-nai-sân tui Mô-sî kóng-fa, 2fûn-fu kì tui Yî-set-lie̍t-ngìn siên-pu yî-ha ke thiàu-li: “Ngì-têu chin-ngi̍p Ngài — Song-chú su-pûn ngì-têu ke thú-thi yî-heu, tak-pái tù-tó thi-chhit ngièn oi hiû-kâng, péu-sṳ tui Song-chú ke chûn-kin. 3Liuk-ngièn nui, ngì-têu oi kâng-thièn, ya oi siû-chién phù-thò-yèn, sû-chhòng thú-sán. 4Chúng-he thi-chhit ngièn oi-pûn thú-thi vàn-chhiòn hiet-khun; liá-ngièn he hien-pûn Song-chú ke. Ngì-têu cho-m̀-tet kâng-chung thièn-yèn, ya cho-m̀-tet siû-chién phù-thò-yèn. 5Lièn thièn-tú chhṳ-yèn sâng ke ńg-kuk cho-m̀-tet sû-kot; yèn-tú mò siû-chién ya tá ke phù-thò khiung-yong cho-m̀-tet chak. Liá-ngièn, thú-thi oi vàn-chhiòn hiû-kâng. 6Liá yit-ngièn, thú-thi sûi-yèn hiû-kâng, hàn-he voi yû chhut-sán hó pûn ngì-têu lâu ngì-têu ke nù-phu̍k, nù-pî, ku-kûng, pin chhiam-sṳ̀ he̍t chhai ngì-têu tông-chûng ke lî-hak lòi sṳ̍t; 7liá-têu chhut-sán, lièn ngì-têu ke thèu-sâng lâu thièn-yâ ke chéu-chhu ya voi yû hó sṳ̍t. Thú-thi chhṳ-yèn chhut-sán ke, ngì-têu chhiòn-phu cho-tet sṳ̍t.

Hí-ngièn

8“Ngì-têu oi kie-son chhit-ke ôn-sit-ngièn, chhiu-he chhit-ke chhit-ngièn, yit-khiung si-sṳ̍p kiú-ngièn. 9Ke-ngièn chhit-ngie̍t chhû-sṳ̍p, chhiu-he Su̍k-chhui-ngit, ngì-têu oi phai-ngìn to chhiòn-koet kok-thi phùn yòng-kok. 10Ngì-têu oi yung án-ngiòng lòi chiông thi ńg-sṳ̍p ngièn fûn-phe̍t chhut-lòi, hiong chhiòn-phu ngìn-mìn siên-pu liá-ngièn he chhṳ-yù ngièn. Liá-ngièn oi sàng-cho ngì-têu ke Hí-ngièn; só-yû mâi-mai ke sán-ngia̍p oi vàn-pûn ngièn-chú ya-he ngièn-chú ke heu-thoi; mai-pûn ngìn cho nù-phu̍k ke, chhiòn-phu oi piong kì-têu chón chhṳ-kâ ke vuk-hâ. 11Thi ńg-sṳ̍p ngièn oi sàng-cho ngì-têu ke Hí-ngièn. Ngì-têu cho-m̀-tet kâng-chung, cho-m̀-tet sû-kot thièn-tú chhṳ-yèn sâng ke ńg-kuk, ya cho-m̀-tet chak yèn-tú mò siû-chién ya tá ke phù-thò. 12Liá-ngièn he Hí-ngièn, he ngì-têu ke sṳn-ngièn; ngì-têu chang cho-tet sṳ̍t thú-thi chhṳ-yèn chhut-sán ke thú-sán.

13“Liá Hí-ngièn, só-yû mâi-mai ke chhòi-sán oi vàn-pûn ngièn-chú. 14Só-yî, ngì-têu lâu Yî-set-lie̍t thùng-pâu mâi-mai thú-thi ke sṳ̀, oi kûng-tong. 15Thú-thi ke ka-chhièn oi kîn-kí tui mâi-mai ke sṳ̀ to ha yit-pái Hí-ngièn tông-chûng thú-thi cho-tet sû-sṳ̀n ke ngièn-su lòi kiet-thin; 16ngièn-su tô, ka-chhièn chhiu kô, ngièn-su séu, ka-chhièn chhiu tâi; yîn-vi liá he cheu yû kí-tô pái cho-tet sû-sṳ̀n lòi mai ke. 17Ngì-têu cho-m̀-tet hiêu Yî-set-lie̍t thùng-pâu; oi kin-vi ngì-têu ke Song-ti, yîn-vi Ngài he Song-chú — ngì-têu ke Song-ti.

Ôn-sit-ngièn ke Mun-thì

18“Ngì-têu oi sṳ̍t-hàng Ngài ke fap-li̍t, oi chûn-sú Ngài ke kie-min, hó pûn ngì-têu chhai liá thú-thi ôn-kî lo̍k-ngia̍p. 19Thú-thi voi chhut-sán ńg-kuk, la ngì-têu sṳ̍t; ngì-têu voi ôn-kî lo̍k-ngia̍p.

20“Ngì-têu tông-chûng khó-nèn yû-ngìn voi mun: Thi-chhit ngièn hiû-kâng, mò sû-sṳ̀n, oi sṳ̍t má-ke nè? 21Ngài — Song-chú oi su-fuk pûn ngì-têu, sṳ́ thú-thi chhai thi-liuk ngièn chhut-sán la sâm-ngièn sṳ̍t ke liòng-sṳ̍t. 22Thi-pat ngièn, ngì-têu oi kâng-chung, chúng-he ngì-têu hàn-he oi sṳ̍t chhùn-liòng, chhṳ̍t-to thi-kiú ngièn sû-sṳ̀n ke sṳ̀.

Su̍k-chón Vuk Thi-sán ke Thiàu-li

23“Ngì-têu cho-m̀-tet chiông thú-thi yún-kiú mai-thôn, yîn-vi thú-thi he Ngài ke; ngì-têu he chhiong chhiam-he̍t ke lî-hak, cho-tet sṳ́-yung thú-thi thin-thin. 24Mâi-mai thú-thi ke sṳ̀, ngì-têu yit-thin oi sṳ̀n-ngin ngièn-chú yû su̍k-chón thú-thi ke khièn-li.

25“Na-he ngì yû thùng-pâu yîn-vi tông-khú, kô-put-chiông mai-thet thú-thi, heu-lòi kì ke chṳ-chhîn yin-kôi chiông liá thú-thi su̍k chón-lòi. 26Ke mò chhîn-chhit hó chiông thú-thi su̍k chón-hi ke ngìn, heu-lòi khó-nèn kîn-chi hó-chón, yû la chhièn hó chiông thú-thi su̍k chón-hi, 27chhai liá-chúng chhìn-hìn ha, kì yit-thin oi-son sṳ́-yung ke ngièn-su, chiông su̍k-chón ke sṳ̀ to ha yit-pái Hí-ngièn liá-chham hàn-chhûn ke ngièn-su cheu ka-chhṳ̍t vàn-pûn mâi-chú, án-ngiòng kì chhiu cho-tet su̍k-chón kì sṳ̀n-chiap ke thú-thi. 28Kì na-he mò la chhièn mâi-chón thú-thi, thú-thi hàn-he kûi mâi-chú sṳ́-yung to ha yit-pái Hí-ngièn. To ke-ngièn, thú-thi chhiu oi kûi-vàn ngièn-chú.

29“Na yû-ngìn chiông sàng-tú ke vuk-è mai-thet, kì yû-khièn chhai yit-ngièn nui chiông vuk-è su̍k chón-lòi. 30Na-he kì chhai ke-ngièn nui mò su̍k-chón, kì chhiu sṳt-thet su̍k-chón ke khièn-li, vuk-è oi kûi mâi-chú lâu kì ke heu-thoi cho yún-kiú ke sán-ngia̍p; chhai Hí-ngièn, vuk-è ya m̀-sṳ́ kûi-vàn ngièn-chú. 31Chúng-he, chhai sàng-ngoi ke vuk-è oi cheu hiông-ha thièn-thi ke thiàu-li chhú-lî, ngièn-chú yû-khièn su̍k chón-hi; to Hí-ngièn, vuk-è oi kûi-vàn ngièn-chú. 32Chúng-he Li-vi-ngìn cho-tet sùi-sṳ̀ su̍k-chón chhai Li-vi-sàng tî-poi ke vuk-è. 33Li-vi-ngìn na-he mai-thet Li-vi sàng-tú ke vuk-è yu mò su̍k chón-hi, to Hí-ngièn, vuk-è oi kûi-vàn kì; yîn-vi Li-vi-ngìn chhai Li-vi sàng-tú ke vuk-è he kì-têu chhai Yî-set-lie̍t-ngìn chûng yún-kiú ke sán-ngia̍p. 34Chúng-he Li-vi-sàng chû-vì ke mu̍k-chhòng cho-m̀-tet mai; ke he kì-têu yún-kiú ke sán-ngia̍p.

Chia-chhièn pûn Khiùng-khú Ngìn ke Thiàu-li

35“Na-he ngì yû thùng-pâu khú-to mò fap-thu vì-chhṳ̀ sên-fa̍t, ngì yit-thin oi cheu-ku kì, chhiu-chhiong cheu-ku ngoi-chhu̍k ngìn lâu chhiam-he̍t ke lî-hak án-ngiòng, pûn kì ki-siu̍k he̍t chhai ngì ke-vi. 36Ngì cho-m̀-tet nâ kì ke li-sit; oi kin-vi ngì ke Song-ti, pûn ngì ke thùng-pâu ki-siu̍k he̍t chhai ngì ke-vi. 37Ngì chia-chhièn pûn kì, cho-m̀-tet nâ li-sit, chia liòng-sṳ̍t pûn kì, ya cho-m̀-tet oi kì vàn kha-tô. 38Ngài he Song-chú — ngì-têu ke Song-ti, Ngài sṳt thu ngì-têu chhut Âi-khi̍p, oi chiông Kâ-nàm-thi su-pûn ngì-têu, ya oi cho ngì-têu ke Song-ti.

Su̍k-chón Nù-phu̍k ke Thiàu-li

39“Na-he ngì yû thùng-pâu khú-to mai-sṳ̂n pûn ngì cho phu̍k-ngìn, ngì cho-m̀-tet khoán-thai kì chhiong nù-chhòi. 40Oi khoán-thai kì chhiong chhiáng ke kûng-ngìn ya-he chhiam-he̍t ke lî-hak khiung-yong, kì oi fu̍k-sṳ ngì to Hí-ngièn. 41To Hí-ngièn, kì lâu kì ke chṳ́-ńg chhiòn-phu oi lì-khôi ngì, chón-to kì chhṳ-kâ ke kâ-chhu̍k, to kì chú-siên ke thú-thi hi. 42Yî-set-lie̍t-ngìn he Ngài ke phu̍k-ngìn. Ngài tui Âi-khi̍p chiông kì-têu thu chhut-lòi; kì-têu cho-m̀-tet chai mai-pûn ngìn cho nù-chhòi. 43Ngì cho-m̀-tet fái khoán-thai kì-têu, oi kin-vi ngì ke Song-ti. 44Ngì na sî-yeu nù-phu̍k ya-he nù-pî, cho-tet hi si chû-vì ke koet mâi ngoi-koet ngìn. 45Ngì-têu ya cho-tet mâi ke-têu chhiam-sṳ̀ he̍t chhai ngì-têu tông-chûng ke lî-hak ke chṳ́-ńg lâu kì-têu chhai ngì-têu thú-thi song chhut-se ke kâ-su̍k. Liá-têu ngìn cho-tet cho ngì-têu ke sán-ngia̍p; 46ngì-têu cho-tet chiông kì-têu liù-pûn chṳ́-sûn cho sán-ngia̍p, sṳ́ kì-têu yit-sên-ngìn fu̍k-sṳ ngì-têu ke chṳ́-sûn. Chúng-he ngì-têu cho-m̀-tet fái khoán-thai Yî-set-lie̍t thùng-pâu.

47“Na yû chhiam-sṳ̀ he̍t chhai ngì-têu tông-chûng ke lî-hak kîn-chi ye̍t-lòi ye̍t-hó, chúng-he Yî-set-lie̍t thùng-pâu kín-lòi kín-khú, chui-heu sa chiông chhṳ-kâ mai-pûn ke chhiam-he̍t ke lî-hak ya-he kì ke kâ-chhu̍k, 48mai-sṳ̂n yî-heu, kì hàn yû khièn-li hó su̍k-sṳ̂n. Kì ke hiûng-thi, 49suk-pak, thòng hiûng-thi, ya-he khì-thâ chûng-chhîn chhiòn-phu cho-tet vi kì su̍k-sṳ̂n. Na-he kì yû la chhièn, ya cho-tet chiông chhṳ-kâ su̍k chón-lòi. 50Kì oi lâu kì ke mâi-chú yok-thin su̍k-ka. Kì-têu oi tui kì mai-sṳ̂n cho nù-phu̍k ke-ngièn son-hí, son-to Hí-ngièn, oi cheu chhiáng kûng-ngìn tak-ngièn ke kûng-chhièn yok-thin su̍k-ka, 51-52kì yit-thin oi cheu hàn-chhûn kí-tô ngièn lòi-son, lòi-na̍p su̍k-ka. 53Mâi-chú oi khoán-thai kì chhiong cho chhòng-ngièn ke kûng-ngìn án-ngiòng, cho-m̀-tet fái khoán-thai kì. 54Na-he kì mò phan-fap cheu liá-têu fông-fap pûn-ngìn su̍k chón-lòi, to Hí-ngièn, kì lâu kì ke chṳ́-ńg chhiòn-phu oi tet-tó sṳt-fong, fî-fu̍k chhṳ-yù. 55Yîn-vi Yî-set-lie̍t-ngìn he Ngài ke phu̍k-ngìn; Ngài thu kì-têu chhut Âi-khi̍p. Ngài he Song-chú — ngì-têu ke Song-ti.”

Currently Selected:

Li-vi Ki 25: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Popular Bible Verses from
Li-vi Ki 25

Videos for Li-vi Ki 25

Redemption

BibleProject

Leviticus 25

Spoken Gospel

Li-vi Ki 25

Popular Bible Verses from
Li-vi Ki 25

Videos for Li-vi Ki 25

Redemption

Leviticus 25

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 25

Li-vi Ki 25

Popular Bible Verses from Li-vi Ki 25

Videos for Li-vi Ki 25

Redemption

Leviticus 25

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Li-vi Ki 25

Popular Bible Verses from
Li-vi Ki 25