Yî-sî-kiet Sû 46

Kiûn-vòng lâu Chiet-khì

1Chṳ-kô ke Song-chú án-ngiòng kóng: “Chhai yit lî-pai kûng-chok ke liuk-ngit chûng, nui-yen tûng-mùn yit-thin oi koân-tén. Chúng-he chhai ôn-sit-ngit lâu chhû-yit, tûng-mùn oi tá khôi-lòi. 2Chi-sṳ̂ vi kiûn-vòng hien sêu-fa-chi ya-he phìn-ôn-chi ke sṳ̀, kiûn-vòng oi tui liá-mùn ke chéu-lòng ngi̍p-lòi, khî chhai mùn-chhû sùn-thèu. Kì oi chhai ke-vi lî-pai, lî-pai heu chhiu chhut-hi. Liá-chak mùn oi yit-chhṳ̍t tá khôi-lòi, lìm-am-é yî-chhièn cho-m̀-tet koân-thet. 3Tak-ke ôn-sit-ngit lâu chhû-yit, chhiòn-koet ngìn-mìn chhiòn-phu oi chhai liá-mùn chhièn kin-pai Song-chú. 4Chhai ôn-sit-ngit, kiûn-vòng oi hiong Song-chú hien mò khiet-tiám ke se-yòng-kú liuk-chak, mièn-yòng-kú yit-chak cho sêu-fa-chi. 5Ke-chak mièn-yòng-kú oi lâu sṳ̍p-chhit kûng-sṳ̂n pan ke su-chi khiung-ha hien; ke-têu se-yòng-kú só phi-ha̍p ke su-chi cho-tet sùi kiûn-vòng ke yi-sṳ hien. Sṳ̍p-chhit kûng-sṳ̂n pan ke su-chi oi lâu sâm kûng-sṳ̂n ke kám-lám-yù khiung-ha hien. 6Chhû-yit, kì oi hien mò khiet-tiám ke se ngiù-kú yit-chak, se-yòng-kú liuk-chak, mièn-yòng-kú yit-chak. 7Ke-chak ngiù-kú, ke-chak mièn-yòng-kú chhiòn-phu oi lâu sṳ̍p-chhit kûng-sṳ̂n pan ke su-chi khiung-ha hien; ke-têu se-yòng-kú só phi-ha̍p ke su-chi cho-tet sùi kiûn-vòng ke yi-sṳ hien. Sṳ̍p-chhit kûng-sṳ̂n pan ke su-chi oi lâu sâm kûng-sṳ̂n ke kám-lám-yù khiung-ha hien. 8Vòng oi tui liá-mùn ke chéu-lòng chhut-ngi̍p.

9“Mò-lun nai-chak chiet-khì, ngìn-mìn lòi kin-pai Song-chú ke sṳ̀, tui pet-mùn ngi̍p-hi ke, oi tui nàm-mùn chhut-lòi; tui nàm-mùn ngi̍p-hi ke, oi tui pet-mùn chhut-lòi. Má-ngìn tû cho-m̀-tet tui khiung-chak mùn chhut-ngi̍p, yit-thin oi tui siông-tui ke-chak mùn chhut-hi. 10Ngìn-mìn ngi̍p-lòi ke sṳ̀, vòng ya oi ngi̍p-lòi; ngìn-mìn chhut-hi ke sṳ̀, vòng ya oi chhut-hi. 11Chhai chiet-khì lâu thai-fi ke ngit, tak-pái hien yit-chak ngiù-kú, tak-pái hien yit-chak mièn-yòng-kú, chhiòn-phu oi lâu sṳ̍p-chhit kûng-sṳ̂n pan ke su-chi khiung-ha hien. Tak-chak se-yòng-kú só phi-ha̍p ke su-chi cho-tet sùi hien-chi ke ngìn ke yi-sṳ hien. Sṳ̍p-chhit kûng-sṳ̂n pan ke su-chi oi lâu sâm kûng-sṳ̂n ke kám-lám-yù khiung-ha hien.

12“Chhai vòng yung sêu-fa-chi ya-he phìn-ôn-chi hiong Song-chú hien kâm-sîm-chi ke sṳ̀, oi vi kì tá-khôi thûng-hiong nui-yen ke tûng-mùn. Kì oi cheu ôn-sit-ngit ke thiàu-li hien sêu-fa-chi lâu phìn-ôn-chi. Kì lì-khôi yî-heu, mùn oi koân hí-lòi.”

Tak-ngit Oi Hien ke Chi

13Song-chú kóng: “Tak chêu-sṳ̀n oi hien yit-chak mò khiet-tiám yit-se ke se-yòng-kú cho sêu-fa-chi pûn Song-chú. Tak-ngit tû oi hien liá-chúng chi. 14Tak chêu-sṳ̀n ya oi hien sâm kûng-sṳ̂n mien-fún lâu yit kûng-sṳ̂n kám-lám-yù cho su-chi; yù he chhâm chhai mien-fún tú yung ke. Hien su-chi pûn Song-chú he yún-kiú ke thiàu-li. 15Tak chêu-sṳ̀n oi hien se-yòng-kú, mien-fún, lâu kám-lám-yù pûn Song-chú cho sêu-fa-chi, cho-m̀-tet thìn.”

Vòng lâu Thú-thi

16Chṳ-kô ke Song-chú án-ngiòng kóng: “Na-he kiûn-vòng chiông chhṳ-kâ ke thú-thi su-pûn vòng-chṳ́, ke-te thi chhiu kûi-su̍k vòng-chṳ́, yún-yén cho kì ke sán-ngia̍p. 17Na-he kiûn-vòng chiông chhṳ-kâ ke thú-thi su-pûn kì ke kôn-yèn, ke-te thi he chhiam-sṳ̀ kûi-su̍k kôn-yèn thin-thin, to ‘Chhṳ-yù Ngièn#46:17 “Chhṳ-yù Ngièn” chhiu-he “Hí-ngièn”, chhâm-kháu Li-vi Ki 25:10.’, kôn-yèn oi chiông ke-te thi vàn kiûn-vòng. Yîn-vi liá he vòng-chhu̍k ke sán-ngia̍p, chṳ́-yû vòng-chṳ́ chang cho-tet sṳ̀n-chiap liá thú-thi. 18Kiûn-vòng cho-m̀-tet chhîm-cham ngìn-mìn ke sán-ngia̍p. Kì yit-thin oi tui vòng-chhu̍k ke sán-ngia̍p pûn thú-thi pûn vòng-chṳ́; cho-m̀-tet khî-fu ngìn-mìn, chhîm-cham Ngài chṳ́-mìn ke thú-thi, pet kì-têu lì-khôi chhṳ-kâ ke sán-ngia̍p.”

Sṳn-thien ke Cho-hâ

19Heu-lòi, ke-ngìn tai ngài ko chiap-khiun nui-yen pet-mùn ke thûng-lu#46:19 “ko chiap-khiun nui-yen pet-mùn ke thûng-lu” chhâm-kháu 42:4., to hiong-pet ke-têu fòng-kiên ke mùn-héu; vuk tî-poi ke fòng-kiên he sṳn ke, he pûn chi-sṳ̂ yung ke. Kì chṳ́ liá-têu fòng-kiên sî-phién ke yit-ke só-chhai pûn ngài khon. 20Kì kóng: “Liá só-chhai he pûn chi-sṳ̂ chú su̍k-chhui-chi lâu su̍k-ko-sṳt-chi ke ngiuk yung ke, ya he phoi su-chi yung ke. Án-ngiòng, kì-têu chhiu m̀-sṳ́ chiông sṳn-vu̍t tai-to ngoi-yen, sông-hoi tó ngìn-mìn.”

21-22Chiap-tén, kì tai ngài to ngoi-yen, chṳ́-pûn ngài khon ngoi-yen ke si-chak kok-thèu, tak-chak kok-thèu chhiòn-phu yû se thìn-yen, chhòng ngi-sṳ̍p kûng-chhak, fat sṳ̍p-ńg kûng-chhak. 23Tak-chak thìn-yen chhiòn-phu yû sa̍k-chhiòng, sa̍k-chhiòng hâ yû cho-thèu. 24Ke-ngìn lâu ngài kóng: “Liá-têu só-chhai he cho-hâ. Sṳn-thien ke kûng-chok ngìn-yèn chhai liá-vi chú ngìn-mìn só hien ke chi-vu̍t.”

Currently Selected:

Yî-sî-kiet Sû 46: THV12Rdb

Highlight

Copy