Yî-sî-kiet Sû 45

Hien-pûn Song-chú ke Thú-thi

1Fûn thú-thi pûn tak kî-chhu̍k ke sṳ̀, oi liù yit-fun hien-pûn Song-chú. Liá-te thú-thi oi yû sṳ̍p-ngi kûng-lî pan chhòng, sṳ̍p kûng-lî#45:1 “sṳ̍p kûng-lî” he kîn-kí yit kú yi̍t-pún, Hî-pak-lòi-vùn he “ńg kûng-lî”. fat; kûi-te thi-khî he sṳn-khî. 2Oi tui khì-chûng fûn-chhut si-fông ke thi cho sṳn-thien ke yung-thi, tak-phién chhòng lióng-pak ńg-sṳ̍p kûng-chhak, si chû-vì kâ ngi-sṳ̍p ńg kûng-chhak fat ke khung-thi. 3Oi va̍k-chhut chhòng sṳ̍p-ngi kûng-lî pan, fat ńg kûng-lî cho sṳn-thien ke yung-thi, liá he chṳ-sṳn ke thi. 4Chhai chhiòn-koet tông-chûng, liá-te thi he sṳn-khî, he pûn-pûn chhai sṳn-thien tú chhîn-khiun sṳ-fung Song-chú ke chi-sṳ̂ ke; tî-poi yû kì-têu ke vuk-è lâu sṳn-thien ke yung-thi. 5Nang-ngoi yit-te thú-thi, chhòng sṳ̍p-ngi kûng-lî pan, fat ńg kûng-lî, oi pûn-pûn chhai sṳn-thien sṳ-fung ke Li-vi-ngìn, tî-poi yû Li-vi-ngìn ke fòng-vuk khî#45:5 “Li-vi-ngìn ke fòng-vuk khî” he kîn-kí yit kú yi̍t-pún, Hî-pak-lòi-vùn he “ngi-sṳ̍p ke fòng-kiên”..

6Yu oi chhai sṳn-khî kak-piak va̍k yit-te thú-thi, chhòng sṳ̍p-ngi kûng-lî pan, fat lióng kûng-lî pan, cho Yî-set-lie̍t-ngìn ke fòng-vuk khî.

Kiûn-vòng ke Thú-thi

7Oi va̍k-chhut yit-te thú-thi pûn kiûn-vòng. Liá-te thú-thi oi tui sṳn-khî ke sî-phién tha̍t-to sî-phién ke piên-kie, tui sṳn-khî ke tûng-phién tha̍t-to tûng-phién ke piên-kie, lâu Yî-set-lie̍t tak kî-chhu̍k pûn-tó ke thú-thi phiàng-chhòng. 8Liá-te thi he kiûn-vòng chhai Yî-set-lie̍t chûng pûn-tó ke sán-ngia̍p. Án-ngiòng, Ngài sat-li̍p ke kiûn-vòng chhiu m̀-voi chai khî-fu Ngài ke chṳ́-mìn; kì oi chiông chhiòn-koet khì-thâ ke thú-thi pûn-pûn Yî-set-lie̍t tak kî-chhu̍k.

Kiûn-vòng Oi Chûn-sú ke Kûi-chet

9Chṳ-kô ke Song-chú án-ngiòng kóng: “Yî-set-lie̍t ke kiûn-vòng â, la-pái lé! M̀-hó chai chôn-khièn pa-tho, khî-fu ngìn-mìn; oi sṳ̂n-chông chṳn-ngi, chú-chhṳ̀ kûng-tho. Ngì-têu cho-m̀-tet chai pa-cham Ngài chṳ́-mìn ke thú-thi. Ngài — Chṳ-kô ke Song-chú án-ngiòng siên-pu lé.

10“Thai-kâ oi yung phêu-chún kûng-tong ke chhak téu chhṳn.

11“Liòng ngang-chṳt yung ke ‘yî-fap’ oi lâu liòng liù-chṳt yung ke ‘pa-thi̍t’ phiàng-thai, he yung ‘fo-mòi-ngí’#45:11 “fo-mòi-ngí” he ngang-chṳt ya-he liù-chṳt liòng ke tân-vi; yit “fo-mòi-ngí” thai-yok yit-pak chhit-sṳ̍p-ńg kûng-sṳ̂n, yit “yî-fap” ya-he yit “pa-thi̍t” thai-yok sṳ̍p-chhit kûng-sṳ̂n pan. cho phêu-chún tân-vi:

Yit ‘fo-mòi-ngí’ lâu sṳ̍p ‘yî-fap’ phiàng-tô,

ya lâu sṳ̍p ‘pa-thi̍t’ phiàng-tô.

12“Liòng-chhûng ke tân-vi he:

Yit ‘sa-hak-le̍t’#45:12 Chhai Yî-sî-kiet ke sṳ̀-thoi, yit “sa-hak-le̍t” thai-yok sṳ̍p-yit tiám si kûng-khiet. lâu ngi-sṳ̍p ‘kui-lâ’ phiàng-chhûng;

yit ‘mì-nâ’ lâu liuk-sṳ̍p ‘sa-hak-le̍t’ phiàng-chhûng.

13-15“Ngì-têu oi cheu hâ-poi ke kûi-thin fung-hien:

Séu-ma̍k: sû-sṳ̀n ke liuk-sṳ̍p fûn chṳ̂-yit.

Thai-ma̍k: sû-sṳ̀n ke liuk-sṳ̍p fûn chṳ̂-yit.

Kám-lám-yù: sû-sṳ̀n ke pak-fûn chṳ̂-yit.

(Kám-lám-yù oi yung ‘pa-thi̍t’ lòi liòng: Sṳ̍p ‘pa-thi̍t’ lâu yit ‘fo-mòi-ngí’ phiàng-tô, ya lâu yit ‘khóa-ngí’ phiàng-tô.)

Yòng: chhai Yî-set-lie̍t mu̍k-chhòng ke yòng, lióng-pak chak oi hien-song yit-chak.

“Ngì-têu oi hien su-chi, sêu-fa-chi, phìn-ôn-chi, án-ngiòng, ngì-têu ke chhui chhiu voi tet-tó sa-miên. Ngài — Chṳ-kô ke Song-chú án-ngiòng siên-pu lé.

16“Chhiòn-koet ngìn-mìn yit-thin oi tai liá-têu chi-vu̍t to Yî-set-lie̍t ke kiûn-vòng ke-vi hi. 17Tak-chak ngie̍t chhû-yit, ôn-sit-ngit, lâu khì-thâ Yî-set-lie̍t ke chiet-khì, vòng oi fu-chit chhiòn-koet ngìn-mìn só-hien sêu-fa-chi ke sên-ngì, su-chi, lâu chi-chiú. Kì oi chún-phi su̍k-chhui-chi, su-chi, sêu-fa-chi, lâu phìn-ôn-chi ke chi-vu̍t, vi Yî-set-lie̍t ngìn-mìn su̍k-chhui.”

Chiet-khì

(Chhut Âi-khi̍p Ki 12:1-20; Li-vi Ki 23:33-43)

18Chṳ-kô ke Song-chú án-ngiòng kóng: “Châng-ngie̍t chhû-yit, ngì oi hien yit-chak mò khiet-tiám ke se ngiù-kú, lòi kiet-chhiang sṳn-thien. 19Chi-sṳ̂ oi nâ su̍k-chhui-chi ke hiet lòi kò sṳn-thien ke mùn-chhû, chi-thàn ke si-chak kok, lâu nui-yen thai-mùn ke mùn-chhû. 20Ke-chak ngie̍t chhû-chhit, ngì ya oi cheu-yong vi ke-têu m̀-he ku-yi ya-he yîn-vi vù-tî lòi fam-chhui ke ngìn hien-chi. Án-ngiòng, ngì chhiu cho-tet pó-chhṳ̀ sṳn-thien ke sṳn-kiet.

21“Tui châng-ngie̍t sṳ̍p-si khôi-sṳ́, ngì oi sú Phàn-ko-chiet chhit-ngit. Chhai liá chhit-ngit tông-chûng, tak-ke ngìn chhiòn-phu oi sṳ̍t vù-kau-piáng. 22Chiet-khì thi-yit ngit, kiûn-vòng yit-thin oi vi chhṳ-kâ lâu chhiòn-koet ngìn-mìn hien yit-chak ngiù-kú cho su̍k-chhui-chi. 23Chhai chhit-ngit chiet-khì nui, kì tak-ngit oi hiong Song-chú hien mò khiet-tiám ke ngiù-kú chhit-chak, mièn-yòng-kú chhit-chak cho sêu-fa-chi. Kì tak-ngit ya oi hien yit-chak sân-yòng-kú cho su̍k-chhui-chi. 24Tak-chak ngiù-kú, tak-chak mièn-yòng-kú chhiòn-phu oi lâu sṳ̍p-chhit kûng-sṳ̂n pan ke su-chi, sâm kûng-sṳ̂n ke kám-lám-yù khiung-ha hien.

25“Chhai Tap Liàu-è Chiet, chhiu-he tui chhit-ngie̍t sṳ̍p-ńg khôi-sṳ́ ke chhit-ngit khì-kiên, kiûn-vòng oi cheu Phàn-ko-chiet ke thiàu-li tak-ngit hien su̍k-chhui-chi, sêu-fa-chi, su-chi, lâu kám-lám-yù.”

Currently Selected:

Yî-sî-kiet Sû 45: THV12Rdb

Highlight

Copy