Yî-sî-kiet Sû 40

Sîn Sṳn-thien ke Yi-siong

(40:1–48:35)

Yî-sî-kiet pûn Chú Tai-to Yâ-lu-sat-lâng

1Ngài-têu pûn-ngìn chok-hi ke thi ngi-sṳ̍p ńg-ngièn, ya chhiu-he Yâ-lu-sat-lâng pûn-ngìn cham-liâng ke thi sṳ̍p-si ngièn châng-ngie̍t chhû-sṳ̍p, Song-chú ke thai-nèn lìm-to ngài sṳ̂n-song, Kì chiông ngài tai-chéu. 2Chhai yi-siong chûng, Song-ti tai ngài to Yî-set-lie̍t-thi, chiông ngài piong chhai yit-chho kô-sân táng. Ngài khon-tó nàm-phién tông-chhiong hí-yû yit-chho sàng. 3Kì tai ngài to ke-vi; ngài khon-tó yit-ke ngìn chhiu-chhiong thùng án-ngiòng fat-kông, sú-chûng nâ-tén mà-sok lâu chhet-liòng yung ke chhak, khî chhai mùn-héu.

4Ke-ngìn tui ngài kóng: “Ngìn-chṳ́ â, ngì oi siòng-se khon, chet-ngí thâng, chôn-sîm chu-yi ngài pûn ngì ke chṳ́-sṳ, yîn-vi liá he Song-ti tai ngì to liá-vi lòi ke muk-tit. Ngì oi chiông ngì só khon-tó ke yit-chhiet lâu Yî-set-lie̍t-ngìn kóng.”

Tûng-mùn

5Ngài khon-tó ke he sṳn-thien, si-mien yû vì-chhiòng. Ke-ngìn sú-chûng nâ-tén yit-kî sâm kûng-chhak chhòng chhet-liòng yung ke chhak, chhai ke-vi liòng vì-chhiòng. Vì-chhiòng kô sâm kûng-chhak, phûn sâm kûng-chhak. 6Chiap-tén, kì to hiong-tûng ke mùn, sông mùn-ton, chhai mùn-ton táng liòng ngoi hièn-koân, yû sâm kûng-chhak chhṳ̂m. 7Ko hièn-koân yû chéu-lòng; chéu-lòng lióng-phién kok-yû sâm-kiên sú-ví-sṳt. Tak-kiên sú-ví-sṳt chhiòn-phu he sâm kûng-chhak si-fông; fòng-kiên chhiòn-phu yû piak kak-tén, siông-kak lióng kûng-chhak pan. Thûng-ko liá-têu sú-ví-sṳt, nang-ngoi yû sâm kûng-chhak chhṳ̂m ke nui hièn-koân, theu-to yit-kiên mùn-lòng; liá mùn-lòng mien tui-tén sṳn-thien. 8-9Kì liòng liá mùn-lòng, yû si kûng-chhak chhṳ̂m. Liá mùn-lòng he chhai chéu-lòng ke mî-chiet, chhai vá-khiun sṳn-thien ke-thèu; chéu-lòng lióng-phién piak ke chhû-tún phûn yit kûng-chhak. 10Chéu-lòng lióng-phién kok-yû sú-ví-sṳt sâm-kiên, thai-se khiung-yong, kak-kiên piak ke chhû-tún thai-se ya khiung-yong.

11Ke-ngìn liòng thai-mùn ke ngi̍p-héu, fat ńg kûng-chhak, chéu-lòng fat liuk kûng-chhak pan. 12Tak-ke sú-ví-sṳt thèu-chhièn chhiòn-phu yû ái-chhiòng: Kô ńg-sṳ̍p kûng-fûn, phûn ńg-sṳ̍p kûng-fûn. Fòng-kiên chhiòn-phu he sâm kûng-chhak si-fông. 13Kì yu liòng lióng-kiên siông-tui ke sú-ví-sṳt ngoi-piak lâu ngoi-piak tông-chûng ke khî-lì, yû sṳ̍p-ngi kûng-chhak pan. 14Chéu-lòng chhin-mî ke mùn-lòng theu-to ngoi-yen; kì liòng liá mùn-lòng, fat sṳ̍p kûng-chhak#40:14 Pún-chiet chhai Hî-pak-lòi-vùn yi-sṳ mò chhîn-chhú.. 15Chéu-lòng, tui thai mùn-héu liá-phién to mùn-lòng ke heu-piak, chhòng ngi-sṳ̍p ńg kûng-chhak. 16Tak-kiên sú-ví-sṳt ke ngoi-piak chhiòn-phu yû se chhûng-mùn, piak ke chhû-tún lâu piak ke chhû-tún chûng-kiên ya yû se chhûng-mùn, mùn-lòng chû-vì ya chhiòn-phu yû se chhûng-mùn. Chéu-lòng lióng-phién piak ke chhû-tún chhiòn-phu yû tiâu-khiet chûng-su.

Ngoi-yen

17Ke-ngìn tai ngài ngi̍p-to ngoi-yen. Ngoi-yen chû-vì yû sâm-sṳ̍p kiên fòng-kiên pen-tén ngoi-piak, fòng-kiên thèu-chhièn yû phû sa̍k-thèu ke lu, 18lu chhai tak-chak mùn ke lióng-phién, lu fat lâu mùn phiàng-chhòng. Ngoi-yen pí nui-yen kha-tâi.

19Nui-yen yû yit-chak mùn, pí ngoi-yen ke mùn kha-kô; liá-mùn he tui ngoi-yen thûng nui-yen yung ke. Ke-ngìn liòng liá lióng-chak mùn ke khî-lì, chhòng ńg-sṳ̍p kûng-chhak#40:19 Chhai Hî-pak-lòi-vùn nang-ngoi ya yû lióng-chak sṳ, yi-sṳ mò chhîn-chhú..

Pet-mùn

20Ke-ngìn liòng ngoi-yen hiong-pet ke-chak mùn. 21Chéu-lòng lióng-phién kok-yû sâm-kiên sú-ví-sṳt. Lióng-phién sú-ví-sṳt, piak ke chhû-tún, pin mùn-lòng ke chhak-chhun lâu tûng-mùn ke khiung-yong. Chéu-lòng chhòng ngi-sṳ̍p ńg kûng-chhak, fat sṳ̍p-ngi kûng-chhak pan. 22Mùn-lòng, chhûng-mùn, pin tiâu-khiet yû chûng-su ke piak ke chhû-tún chhiòn-phu lâu tûng-mùn khiung-yong. Chéu-lòng ke mùn-héu yû chhit-chak ton-é sông pet-mùn, chéu-lòng ke chhin-mî yû yit-chak mùn-lòng hiong ngoi-yen. 23Liá-mùn kak-tén ngoi-yen, tui-mien yû nang-ngoi yit-chak mùn, thûng-to nui-yen, pet-phién lâu tûng-phién khiung-yong. Ke-ngìn liòng liá lióng-chak mùn ke khî-lì, chhòng ńg-sṳ̍p kûng-chhak.

Nàm-mùn

24Ke-ngìn tai ngài to nàm-phién; ngài-têu khon-tó hiong-nàm ke mùn. Kì liòng liá-mùn; sú-ví-sṳt, piak ke chhû-tún, pin mùn-lòng ke chhak-chhun lâu khì-thâ ke mùn khiung-yong. 25Liá-mùn lâu mùn-lòng si chû-vì chhiòn-phu yû se chhûng-mùn, lâu khì-thâ ke mùn ke chhûng-mùn khiung-yong. Chéu-lòng chhòng ngi-sṳ̍p ńg kûng-chhak, fat sṳ̍p-ngi kûng-chhak pan. 26Chéu-lòng ke mùn-héu yû chhit-chak ton-é sông nàm-mùn, chéu-lòng ke chhin-mî yû yit-chak mùn-lòng hiong ngoi-yen. Lióng-phién yû piak ke chhû-tún, chhû-tún táng tiâu-khiet yû chûng-su. 27Liá-mùn tui-tén theu-to nui-yen ke nàm-mùn. Ke-ngìn liòng liá lióng-chak nàm-mùn chṳ̂-kiên ke khî-lì, chhòng ńg-sṳ̍p kûng-chhak.

Nui-yen ke Nàm-mùn

28Ke-ngìn tai ngài tui nàm-mùn ngi̍p nui-yen. Kì liòng nui-yen ke nàm-mùn, thai-se lâu ngoi-yen khì-thâ ke mùn khiung-yong. 29-30Liá-vi ya yû sú-ví-sṳt, mùn-lòng, pin piak ke chhû-tún, thai-se chhiòn-phu lâu khì-thâ ke mùn khiung-yong. Mùn lâu mùn-lòng si-vì chhiòn-phu yû se chhûng-mùn. Chéu-lòng chhòng ngi-sṳ̍p ńg kûng-chhak, fat sṳ̍p-ngi kûng-chhak pan. 31Mùn-lòng hiong-tén ngoi-yen; chéu-lòng lióng-phién ke piak-táng chhiòn-phu tiâu-khiet yû chûng-su. Sông liá-mùn yû pat-ton ke sa̍k-ton.

Nui-yen ke Tûng-mùn

32Ke-ngìn tai ngài to nui-yen ke tûng-mùn. Kì liòng nui-yen ke tûng-mùn, thai-se lâu khì-thâ ke khiung-yong. 33Liá-vi ya yû sú-ví-sṳt, mùn-lòng, pin piak ke chhû-tún, thai-se chhiòn-phu lâu khì-thâ ke mùn khiung-yong. Mùn lâu mùn-lòng si-vì chhiòn-phu yû se chhûng-mùn. Chéu-lòng chhòng ngi-sṳ̍p ńg kûng-chhak, fat sṳ̍p-ngi kûng-chhak pan. 34Mùn-lòng hiong-tén ngoi-yen; chéu-lòng lióng-phién ke piak-táng chhiòn-phu tiâu-khiet yû chûng-su. Sông liá-mùn yû pat-ton ke sa̍k-ton.

Nui-yen ke Pet-mùn

35Ke-ngìn tai ngài to pet-mùn. Kì liòng nui-yen ke pet-mùn, thai-se lâu khì-thâ ke khiung-yong. 36Liá-vi ya yû sú-ví-sṳt, piak ke chhû-tún, lâu mùn-lòng. Mùn lâu mùn-lòng si chû-vì chhiòn-phu yû se chhûng-mùn. Chéu-lòng chhòng ngi-sṳ̍p ńg kûng-chhak, fat sṳ̍p-ngi kûng-chhak pan. 37Mùn-lòng hiong-tén ngoi-yen; chéu-lòng lióng-phién ke piak-táng tiâu-khiet yû chûng-su. Sông liá-mùn yû pat-ton ke sa̍k-ton.

Vàng-vuk

38Ngoi-yen yû yit-kiên yû-mùn ke vàng-vuk, lâu theu-to nui-yen ke pet-mùn ke mùn-lòng lièn-chiap, chi-sṳ̂ voi chhai ke-vi sé sêu-fa-chi ke thèu-sâng. 39Mùn-lòng tú pài-tén si-chông chok-è, liá-phién yû lióng-chông, ke-phién yû lióng-chông, cho-tet chhai liá-têu chok-táng chhṳ̀ sêu-fa-chi, su̍k-chhui-chi lâu su̍k-ko-sṳt-chi ke thèu-sâng. 40Mùn-lòng ngoi ke pet-mùn héu yû si-chông chok-è, liá-phién yû lióng-chông, ke-phién yû lióng-chông. 41Án-ngiòng, chúng-khiung yû pat-chông chok-è cho-tet yung-lòi chhṳ̀ hien-chi ke thèu-sâng, mùn-lòng tú si-chông, mùn-lòng ngoi si-chông. 42Mùn-lòng tú ke si-chông chok-è he chhṳ̀ sêu-fa-chi ke thèu-sâng yung ke. Liá-têu chok-è he yung sa̍k-thèu chho̍k-sṳ̀n ke, kô ńg-sṳ̍p kûng-fûn, chok-mien chhit-sṳ̍p ńg kûng-fûn si-fông. Chhṳ̀ thèu-sâng yung ke tûng-sî chhiòn-phu piong chhai chok-táng. 43Chok-è si-phién kok-yû chhit kûng-fûn pan fat ke chhò-è#40:43 “Chok-è ... chhò-è” ya-he yi̍t-cho “Yû chhit kûng-fûn pan chhòng ke kiêu-é, tâng chhai mùn-lòng tú ke si-vì”. Hî-pak-lòi-vùn ke yi-sṳ mò chhîn-chhú.. Hien-chi yung ke ngiuk chhiòn-phu piong chhai chok-táng.

Chi-sṳ̂ ke Kiên-fòng

44Ke-ngìn tai ngài to nui-yen. Nui-yen yû lióng-chak kiên-fòng, yit-chak chhai pet-mùn sùn-thèu, hiong-nàm, nang-ngoi yit-chak chhai nàm-mùn sùn-thèu, hiong-pet#40:44 Pún-chiet ke fân-yi̍t he cheu yit kú yi̍t-pún, Hî-pak-lòi-vùn ke yi-sṳ mò chhîn-chhú.. 45Ke-ngìn lâu ngài kóng, hiong-nàm ke fòng-kiên he pûn chhai sṳn-thien kûng-chok ke chi-sṳ̂ yung ke, 46hiong-pet ke kiên-fòng he pûn chhai chi-thàn chhièn kûng-chok ke chi-sṳ̂ yung ke. Só-yû ke chi-sṳ̂ chhiòn-phu he Sat-tuk ke heu-thoi. Chhai Li-vi kî-chhu̍k chûng, chṳ́-yû kì-têu chang cho-tet to Song-chú mien-chhièn sṳ-fung Kì.

Nui-yen lâu Sṳn-thien

47Ke-ngìn liòng nui-yen, he ńg-sṳ̍p kûng-chhak si-fông, sṳn-thien thèu-chhièn yû yit-chak chi-thàn. 48Chiap-tén, kì tai ngài to sṳn-thien ke chhièn-thòng. Kì liòng chhièn-thòng ke mùn-héu, chhṳ̂m lióng kûng-chhak pan, fat chhit kûng-chhak#40:48 “fat chhit kûng-chhak” he kîn-kí yit kú yi̍t-pún, Hî-pak-lòi-vùn mò liá-têu sṳ., lióng-phién ke piak ke chhû-tún phûn kok yit kûng-chhak pan. 49Chhièn-thòng fat sṳ̍p kûng-chhak, chhṳ̂m liuk kûng-chhak#40:49 “liuk kûng-chhak” he kîn-kí yit kú yi̍t-pún, Hî-pak-lòi-vùn he “ńg kûng-chhak pan”.. Sông chhièn-thòng yû sṳ̍p-chak#40:49 “sṳ̍p-chak” he kîn-kí yit kú yi̍t-pún, Hî-pak-lòi-vùn mò liá-têu sṳ. ton-é. Chhièn-thòng mùn-héu lióng-phién piak ke chhû-tún sùn kok-yû yit-kî chhû-é.

Currently Selected:

Yî-sî-kiet Sû 40: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)