Yî-sî-kiet Sû 39

Kô-kiet ke Sṳt-phai

1Chṳ-kô ke Song-chú kóng: “Ngìn-chṳ́ â, ngì oi kóng yi-ngièn chit-phi Mí-sat lâu Thú-pâ lióng-koet ke thúng-chhṳ-chá Kô-kiet. Oi lâu kì kóng, Ngài — Chṳ-kô ke Song-chú án-ngiòng kóng: Ngài oi lâu ngì cho tui-thi̍t. 2Ngài oi chiông ngì lit chón-thèu lòi, tai ngì lì-khôi pet-fông ke só-chhai, thu ngì to Yî-set-lie̍t ke khiùn-sân táng. 3Yèn-heu, Ngài oi tá-thet ngì chó-sú kha̍k-tén ke kiûng, yu-sú nâ-tén ke chien. 4Ngì lâu ngì ke kiûn-chhui, pin kok-koet ke lièn-kiûn chhiòn-phu voi sí chhai Yî-set-lie̍t ke-têu sân-táng. Ngài oi chiông ngì-têu ke sṳ̂-thí pûn fî-niâu lâu yâ-chhu cho sṳ̍t-vu̍t. 5Ngì-têu ke sṳ̂-thí voi vang chhai yâ-ngoi. Ngài — Chṳ-kô ke Song-chú án-ngiòng siên-pu lé. 6Ngài oi piong-fó sêu Mâ-kok ke thú-thi lâu chhai hói-sùn ôn-kî lo̍k-ngia̍p ke ngìn-mìn. Án-ngiòng, kì-têu chhiu voi tî Ngài he Song-chú. 7Ngài oi Ngài ke chṳ́-mìn Yî-set-lie̍t ngin-sṳt Ngài ke sṳn-miàng, Ngài chhie̍t-tui m̀-voi chai pûn Ngài ke sṳn-miàng su-tó vú-yu̍k. Án-ngiòng, lie̍t-koet chhiu voi tî Ngài — Song-chú he Yî-set-lie̍t sṳ̀n-sṳn ke Song-ti.”

8Chṳ-kô ke Song-chú kóng: “Ngài só yi-ngièn ke-ngit yit-thin voi lòi-to. 9Yî-set-lie̍t tak sàng-sṳ ke ngìn-mìn oi chhut-hi ngiâm pûn-ngìn fit-thet ke vú-hi tông-cho chhèu. Kì-têu oi nâ tún-phài, kiûng, chien, kun-é, màu-chhiông tông-cho chhèu lòi sêu; liá-têu tûng-sî tô-to la kì-têu sêu chhit-ngièn. 10Kì-têu m̀-sṳ́ to yâ-ngoi hi ngiâm-chhèu, ya m̀-sṳ́ to su-lìm hi chám su-é, yîn-vi kì-têu yû pûn-ngìn fit-thet ke vú-hi hó cho chhèu. Kì-têu oi chhióng ke-têu lòi chhióng kì-têu ke ngìn, kiap ke-têu lòi kiap kì-têu ke ngìn.” Chṳ-kô ke Song-chú án-ngiòng siên-pu lé.

Mài-chong Kô-kiet

11Song-chú kóng: “Liá-sṳ fat-sên yî-heu, Ngài oi chhai Yî-set-lie̍t, chhai Sí-hói tûng-phién ke ‘Lî-hak sân-lak’ chhìm yit-te chhúng-pû pûn Kô-kiet. Ko-lu ke lî-hak voi hàng m̀ ko-hi, yîn-vi Kô-kiet lâu kì ke kiûn-chhui chhiòn-phu voi pûn-ngìn chong chhai ke-vi. Liá sân-lak chhiu oi ham-cho ‘Kô-kiet-kiûn sân-lak’. 12Yî-set-lie̍t-ngìn oi yung chhit-chak ngie̍t ke sṳ̀-kiên mài-chong só-yû ke sṳ̂-thí, lòi sṳ́ ke-te thú-thi tet-tó chhiang-li. 13Kì-têu oi si̍p-ha̍p chhiòn-koet ke ngìn lòi cho mài-chong ke kûng-chok; chhai Ngài tet yùng-yeu ke ngit-è, kì-têu voi yîn-vi liá-ke sṳ pien tông-yû hó miàng-sâng. Ngài — Chṳ-kô ke Song-chú án-ngiòng siên-pu lé. 14Chhit-chak ngie̍t heu, kì-têu oi phai-ngìn ki-siu̍k sùn-chhà tak só-chhai, lâu ko-lu ke ngìn khiung-ha chiông ke-têu hàn chhai thi-mien-song ke sṳ̂-thí mài-hó, án-ngiòng kì-têu chang nèn sṳ́ thú-thi tet-tó chhiang-li. 15Kì-têu chhai chhiòn-koet sùn-chhà, yit khon-tó yû sí-ngìn ke kut-thèu chhiu chhai kut-hài sùn-thèu cho ki-ho, tén mài-chong ke ngìn chiông kì chong chhai ‘Kô-kiet-kiûn sân-lak’. 16(Fu-khiun yû yit-ke chhûn-chông voi yung liá kiûn-chhui ôn-miàng Ha̍p-mô-nâ.) Án-ngiòng, thú-thi chhiu tet-tó chhiang-li lé.”

17Chṳ-kô ke Song-chú lâu ngài kóng: “Ngìn-chṳ́ â, ngì oi tui si-mien pat-fông hêm kok-chúng fî-khìm chéu-chhu lòi sṳ̍t Ngài vi kì-têu chún-phi ke chi-ngiuk. Yî-set-lie̍t ke-têu sân-táng voi yû thai hien-chi ke yèn-si̍t, kì-têu oi chhai ke-vi sṳ̍t-ngiuk lîm-hiet. 18Kì-têu oi sṳ̍t yúng-sṳ ke ngiuk, lîm sṳ-kiên ke-têu liâng-chhiu ke hiet. Liá-têu kiûn-ngìn voi chhiong mièn-yòng-kú, se yòng-è, sân-yòng-kú, ngiù-kú, chhiòn-phu chhiong Pâ-sân ke phì-ngiù án-ngiòng pûn-ngìn chhṳ̀ lòi sṳ̍t. 19Ngài chhṳ̀ liá-têu yúng-sṳ chhiong chhṳ̀ hien-chi ke thèu-sâng yî-heu, fî-khìm chéu-chhu cho-tet chhin-liong sṳ̍t-ngiuk, lîm-hiet, chhṳ̍t-to chhang-páu lîm-chui. 20Kì-têu oi chhai Ngài ke fan-chok táng sṳ̍t chan-mâ, khì-pîn, lâu só-yû sṳ-pîn ke ngiuk, sṳ̍t-to páu-pi̍t-pi̍t. Ngài — Chṳ-kô ke Song-chú án-ngiòng siên-pu lé.”

Yî-set-lie̍t ke Fu̍k-hîn

21Song-chú kóng: “Ngài oi pûn lie̍t-koet khon-tó Ngài ke yùng-kông, pûn kì-têu khon-tó Ngài ngióng-pân chhut-sú chṳp-hàng Ngài kûng-chṳn ke sṳ́m-phan. 22Chhiùng ke-ngit yî-heu, Yî-set-lie̍t-ngìn voi tî Ngài he Song-chú — kì-têu ke Song-ti. 23Lie̍t-koet voi tî Yî-set-lie̍t-ngìn he yîn-vi tet-chhui Ngài chang pûn-ngìn chok-chéu. Ngài êm-mien m̀ khon-ku kì-têu, sṳ́ thi̍t-ngìn tá-phai kì-têu, chhṳ̀-thet kì-têu. 24Ngài tui kì-têu ke vû-ve lâu ko-fam sṳ̂-hàng po-yin. Ngài êm-mien m̀ khon-ku kì-têu.”

25Chṳ-kô ke Song-chú án-ngiòng kóng: “Chúng-he Ngài oi lìn-mén Ngâ-kok ke heu-thoi — Yî-set-lie̍t-ngìn, pûn kì-têu chhùng-chṳ́n#39:25 “chhùng-chṳ́n” ya-he yi̍t-cho “to-chón”. kâ-yèn, Ngài oi vì-fu Ngài ke sṳn-miàng. 26Kì-têu chhùng-sîn ôn-kî chhai chhṳ-kâ ke thú-thi, m̀-voi chai yû-ngìn lòi vî-hia̍p kì-têu ke sṳ̀, kì-têu chhiu voi m̀ ki-tet#39:26 “voi m̀ ki-tet” ya-he yi̍t-cho “voi tâm-tông”. yîn-vi phoi-ngia̍k Ngài só-su ke vú-yu̍k. 27Vi-tó oi pûn lie̍t-koet tî Ngài he sṳ̀n-sṳn ke, Ngài oi tui van-mìn chûng, tui thi̍t-ngìn ke-vi chiông kì-têu tai-chón pún-koet. 28Ke-sṳ̀, Ngài ke chṳ́-mìn chhiu voi ngin-sṳt Ngài he Song-chú — kì-têu ke Song-ti; yîn-vi yî-chhièn Ngài sṳ́ kì-têu fûn-san to lie̍t-koet, liá-ha Ngài yu seu-si̍p kì-têu, chiông kì-têu tai-chón pún-koet, lièn yit-ke ya mò liù chhai ngoi-koet. 29Ngài oi chiông Ngài ke Lìn tó chhai Yî-set-lie̍t-ngìn; Ngài chhie̍t-tui m̀-voi chai êm-mien m̀ khon-ku kì-têu. Ngài — Chṳ-kô ke Song-chú án-ngiòng siên-pu lé.”

Currently Selected:

Yî-sî-kiet Sû 39: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)