Yî-sî-kiet Sû 38

Tui Kô-kiet ke Yi-ngièn

1Song-chú lâu ngài kóng-fa; 2Kì kóng: “Ngìn-chṳ́ â, ngì oi chit-phi Mâ-kok thi-khî Mí-sat lâu Thú-pâ lióng-koet ke thúng-chhṳ-chá Kô-kiet. Ngì oi kóng yi-ngièn chit-phi kì, 3lâu kì kóng, Ngài — Chṳ-kô ke Song-chú án-ngiòng kóng: Kô-kiet â, Ngài oi lâu ngì cho tui-thi̍t. 4Ngài oi chiông ngì lit chón-thèu lòi, yung kiêu-é kiêu ngì ke hòi-sôi, chiông ngì lâu ngì tai-liâng ke kiûn-chhui khiung-ha lâi-chéu. Ngì ke kiûn-chhui yû tông-tô chan-mâ lâu chông-phi chṳ́n-chhè ke khì-pîn. Tak-ke pîn-é chhiòn-phu yû tún-phài lâu kiam. 5Ngì ke kiûn-chhui chûng hàn-yû tui Pô-sṳ̂, Kú-sṳ̍t lâu Fut chhiáng-lòi ke pîn-é; kì-têu chhiòn-phu nâ-tén tún-phài, tai-tén thiet-mo. 6Nang-ngoi hàn-yû tui Kô-me̍t lâu pet-fông ke Thò-kâ-mâ lòi ke kiûn-chhui, pin tui khì-thâ kok-koet lòi ke kiûn-chhui. 7Ngì oi chhi-si̍p kiûn-chhui, chiông kì-têu hiun-lien hó, ngì chhṳ-kâ oi cho kì-têu ke chṳ́-fî-kôn. 8Ko kí-ngièn, Ngài oi phai ngì hi cham-liâng yit-ke koet-kâ; ke-koet ke ngìn-mìn he tui kok-koet chón-lòi ke, liá-ha hióng-su thai-phìn. Ngì oi cham-liâng Yî-set-lie̍t ke-têu sân; liá só-chhai yî-chhièn pûn-ngìn fit-thet, fî-sòng fông-liòng, chúng-he liá-ha yû chhin-tô tui kok-koet chón-lòi ke ngìn chhai ke-vi ôn-kî. 9Ngì só tai-liâng ke kiûn-chhui, lâu tui kok-koet lòi thùng ngì khiung-ha ke kiûn-chhui, voi chhiong vû-yùn châ-tén liá-te thú-thi, chhiong khòng-fûng kûng-kit chhiòn-thi.”

10Chṳ-kô ke Song-chú tui Kô-kiet kóng: “To ke-sṳ̀, ngì voi yû fái sîm-su̍t, yîm-mèu kúi-kie, 11chhîm-lio̍k ke-têu mò sat-fòng ke hiông-chhûn — ke-têu mò sàng-chhiòng, mò mùn-chhôn, ngìn-mìn ôn-hióng thai-phìn ke hiông-chhûn. 12Ngì voi sióng chhióng-kiap pin chhut-sú kûng-kit yî-chhièn fông-thet, liá-ha chhin-tô ngìn he̍t ke só-chhai. Ke-têu ngìn-mìn he tui kok-koet chhi-si̍p to liá sṳ-kie ke chûng-sîm lòi he̍t ke. Kì-têu yû tet-tó chhin-tô thèu-sâng lâu chhòi-vu̍t. 13Sṳ-pâ-ngìn, Tí-tan-ngìn, lâu tui Thâ-sṳ̂ tak sàng-sṳ lòi ke sên-lî-ngìn voi mun ngì: ‘Ngì seu-si̍p thai-kiûn lòi kûng-tá he vi-tó oi chhióng-kiap he-mò? Ngì sióng-oi chhióng kîm-ngiùn, tai-chéu thèu-sâng, chhióng-chéu yit-chhiet ke chhòi-vu̍t cho chan-li-phín he-mò?’

14“Só-yî, ngìn-chṳ́ â, ngì oi kóng yi-ngièn, tui Kô-kiet kóng, Ngài — Chṳ-kô ke Song-chú án-ngiòng kóng: Ngài ke chṳ́-mìn Yî-set-lie̍t hàn ôn-kî lo̍k-ngia̍p ke sṳ̀, ngì oi chhut-fat#38:14 “chhut-fat” he kîn-kí yit kú yi̍t-pún, Hî-pak-lòi-vùn he “tî”.. 15Ngì oi lì-khôi chui pet-fông ke pún-thú, tai-liâng kok-koet lièn-ha̍p chû-sṳ̀n, thai-chhṳn yu tông-khiòng ke khì-pîn-chhui, 16hi kûng-tá Ngài ke chṳ́-mìn Yî-set-lie̍t; ngì ke kiûn-chhui voi chhiong vû-yùn án-ngiòng chiông chhiòn-thi châ-thet. Ke-sṳ̀, Ngài oi phai ngì sông-hi chhîm-lio̍k Ngài ke thú-thi, sṳ́ lie̍t-koet ngin-sṳt Ngài; Ngài ya oi yung ngì só-cho ke hiong kì-têu chṳn-mìn Ngài he sṳ̀n-sṳn ke. 17Ngì chhiu-he Ngài yî-chhièn só yi-ko oi lòi ke ngìn. Ke-sṳ̀, Ngài thûng-ko Ngài ke phu̍k-ngìn — Yî-set-lie̍t ke-têu siên-tî siên-ko kóng, chiông-lòi Ngài oi ham yit-ke ngìn lòi kûng-tá Yî-set-lie̍t.” Chṳ-kô ke Song-chú án-ngiòng siên-pu lé.

Song-ti Chit-fa̍t Kô-kiet

18Chṳ-kô ke Song-chú kóng: “Kô-kiet chhîm-lio̍k Yî-set-lie̍t ke-ngit, Ngài oi thai fat-khién. 19Ngài fî-sòng su-hi, thai fat-fó, siên-pu kóng: Chhai ke-ngit, Yî-set-lie̍t voi yû thai thi-thûng. 20Hói-tú ke ǹg, khûng-chûng ke tiâu-é, thi-song ke thai-se thung-vu̍t, lâu ngìn-lui chhiòn-phu voi yîn-vi kiâng Ngài chhiu pi̍t-pi̍t-chhat. Ke-têu sân lâu sân-ngàm voi pên-lie̍t, sàng-chhiòng voi vang-thet. 21Ngài oi yung kok-chúng châi-nan#38:21 “yung kok-chúng châi-nan” he kîn-kí yit kú yi̍t-pún, Hî-pak-lòi-vùn he “chhai Ngài ke chung sân-táng”. kûng-kit Kô-kiet. Ngài — Chṳ-kô ke Song-chú án-ngiòng siên-pu lé. Ngài oi sṳ́ kì ke kiûn-chhui fat-sên nui-lon, kok-ngìn chhàn-sat thùng-pâu. 22Ngài oi yung pot-vûn lâu liù-hiet ke sṳ-khien lòi chit-fa̍t kì. Ngài oi yung thai-súi, pên-pho̍k, thai-fó, liù-vòng kong-lo̍k chhai kì lâu kì tai-liâng ke kiûn-chhui pin kì chṳ́-fî ke kok-koet kiûn-chhui sṳ̂n-song. 23Ngài oi yung án-ngiòng lòi hiong lie̍t-koet chṳn-mìn Ngài he ví-thai, sṳ̀n-sṳn ke Song-ti. Ke-sṳ̀, kì-têu chhiu voi tî Ngài he Song-chú.”

Currently Selected:

Yî-sî-kiet Sû 38: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)