Yî-sî-kiet Sû 37

Kut-hài Fán-sâng

1Song-chú ke thai-nèn lìm-to ngài sṳ̂n-song; Kì ke Lìn tai ngài to sân-lak tú. Ke sân-lak tú mân-phien he kut-hài. 2Kì tai ngài kîn-ko ke-têu kut-hài tông-chûng, ngài khon-tó sân-lak tú tôi-mân chhin-châu ke kut-thèu. 3Kì lâu ngài kóng: “Ngìn-chṳ́ â, liá-têu kut-hài voi fán-sâng mò?”

Ngài en-kóng: “Chṳ-kô ke Song-chú â, chṳ́-yû Ngì chang tî!”

4Kì kóng: “Oi hiong liá-têu kut-hài kóng yi-ngièn, lâu châu kut-hài kóng, oi thâng Song-chú ke fa. 5Oi lâu kì-têu kóng, Ngài — Chṳ-kô ke Song-chú tui kì-têu kóng: Ngài oi phùn-hi ngi̍p ngì-têu tî-poi, sṳ́ ngì-têu fán-sâng. 6Ngài oi sṳ́ ngì-têu sâng-kîn yu sâng-ngiuk, yèn-heu pâu yit-chhèn phì. Ngài oi phùn-hi ngi̍p ngì-têu tî-poi, sṳ́ ngì-têu fán-sâng. Án-ngiòng, ngì-têu chhiu voi tî Ngài he Song-chú.”

7Só-yî, ngài cheu Song-chú ke min-lin kóng yi-ngièn. Ngài kóng ke sṳ̀, ngài thâng-tó thîn-thûng ke sâng, khon-tó kut-thèu lâu kut-thèu lièn-kiet hí-lòi. 8Ngài tông-khon ke sṳ̀, kut-thèu khôi-sṳ́ sâng-kîn yu sâng-ngiuk, yèn-heu pâu yit-chhèn phì, chúng-he sṳ̂n-thí hàn m̀-voi théu-hi.

9Song-chú lâu ngài kóng: “Ngìn-chṳ́ â, ngì oi hiong fûng#37:9 “fûng”: Hî-pak-lòi-vùn “fûng” “lìn” “hi” he khiung yit-chak sṳ. kóng yi-ngièn, lâu kì kóng, Chṳ-kô ke Song-chú án-ngiòng kóng: Tui si-mien pat-fông chhôi-lòi, chhôi-ngi̍p liá-têu pûn-ngìn chhṳ̀-sí ke, sṳ́ kì-têu fán-sâng.”

10Só-yî, ngài cheu Song-chú ke min-lin kóng yi-ngièn, hi chin-ngi̍p to kì-têu tî-poi, kì-têu chhiu fán-sâng ko-lòi, yu khî hí-lòi. Kì-têu chhiu sàng-cho khi̍t-thai ke kiûn-chhui.

11Song-chú lâu ngài kóng: “Ngìn-chṳ́ â, Yî-set-lie̍t chhiòn-koet ngìn chhiu-chhiong liá-têu kut-hài. Kì-têu ngin-vì chhṳ-kâ kut-thèu châu-thet, yí-kîn mò hî-mong, pûn-ngìn sêu-me̍t chhiang-chhiang. 12Só-yî, ngì oi hiong Ngài ke chṳ́-mìn Yî-set-lie̍t kóng yi-ngièn, lâu kì-têu kóng, Ngài — Chṳ-kô ke Song-chú án-ngiòng kóng: Ngài oi tá-khôi ngì-têu ke fùn-mu, sṳ́ ngì-têu hong hí-lòi, thu ngì-têu chón-to Yî-set-lie̍t pún-thi. 13Ngài tá-khôi ngì-têu ke fùn-mu, sṳ́ ngì-têu hong hí-lòi yî-heu, ngì-têu chhiu voi tî Ngài he Song-chú. 14Ngài oi chiông Ngài ke Lìn phùn-ngi̍p ngì-têu tî-poi, sṳ́ ngì-têu fán-sâng, pûn ngì-têu he̍t chhai chhṳ-kâ ke thú-thi. Án-ngiòng, ngì-têu chhiu voi tî Ngài he Song-chú. Ngài kóng-ko ke, Ngài yit-thin voi sṳ̍t-hàng. Ngài — Song-chú án-ngiòng siên-pu lé.”

Yù-thai lâu Yî-set-lie̍t Lièn-ha̍p Vòng-koet

15Song-chú yu lâu ngài kóng-fa; 16Kì kóng: “Ngìn-chṳ́ â, ngì nâ yit-kî su kun-é lòi, táng-kô siá ‘Yù-thai vòng-koet#37:16 “Yù-thai vòng-koet” Hî-pak-lòi-vùn chhṳ̍t-yi̍t he “Vi Yù-thai lâu kì ke thùng-phân Yî-set-lie̍t-ngìn”.’, yu nâ nang-ngoi yit-kî su kun-é lòi, táng-kô siá ‘Yî-set-lie̍t vòng-koet#37:16 “Yî-set-lie̍t vòng-koet” Hî-pak-lòi-vùn chhṳ̍t-yi̍t he “Vi Yok-sit, chhiu-he vi Yî-fap-lièn, yu vi kì ke thùng-phân Yî-set-lie̍t chhiòn-kâ”.’, 17yèn-heu chiông lióng-kî su kun-é kha̍k chhai sú-chûng, lióng-thèu siông-chiap, lièn-cho yit-kî su kun-é. 18Na-he ngì ke thùng-pâu mun ngì, liá he má-ke yi-sṳ, 19ngì chhiu lâu kì-têu kóng, Ngài — Chṳ-kô ke Song-chú oi chiông thoi-péu Yî-set-lie̍t ke-kî su kun-é lâu thoi-péu Yù-thai ke-kî su kun-é chiap khiung-ha, sṳ́ lióng-kî su kun-é chhai Ngài sú-chûng sàng-cho yit-kî.

20“Ngì oi chhai ngìn-mìn mien-chhièn chiông ke lióng-kî yû siá-sṳ ke su kun-é kha̍k chhai sú-chûng, pûn kì-têu khon-tó. 21Yèn-heu, ngì oi lâu kì-têu kóng, Ngài — Chṳ-kô ke Song-chú oi chiông Ngài ke chṳ́-mìn tui kì-têu pûn-ngìn chok-hi ke kok-koet tai chhut-lòi, tui si-vì si̍p-ha̍p kì-têu, yèn-heu thu kì-têu chón-to pún-koet. 22Ngài oi chhai ke-vi, chhai Yî-set-lie̍t ke-têu sân-táng, chiông kì-têu lièn-ha̍p hí-lòi, sàng-cho yit-ke koet-kâ. Kì-têu voi su yit-ke kiûn-vòng ke thúng-chhṳ, m̀-voi chai fûn-cho lióng-chak koet-kâ. 23Kì-têu m̀-voi chai pai sià-ok ke ngiéu-siong tá-lá-sap chhṳ-kâ, ya m̀-voi chai phai-fái fam-chhui. Ngài oi kiu kì-têu lì-khôi fam-chhui lâu phoi-ngia̍k ke sên-fa̍t. Ngài oi sé-chhiang kì-têu. Kì-têu oi cho Ngài ke chṳ́-mìn; Ngài oi cho kì-têu ke Song-ti. 24Voi yû yit-ke chhiong Ngài phu̍k-ngìn Thai-ví ke kiûn-vòng chhut-hien; kì voi cho kì-têu ke vòng, cho kì-têu ke mu̍k-ngìn. Kì-têu voi sṳ̀n-sîm chûn-hàng Ngài ke fap-li̍t lâu kie-min. 25Kì-têu voi he̍t chhai Ngài su-pûn Ngài phu̍k-ngìn Ngâ-kok ke-te thú-thi, chhiu-he kì-têu ke chú-siên he̍t-ko ke thú-thi. Kì-têu lâu kì-têu ke heu-thoi voi yún-yén he̍t chhai ke-vi. Voi yû yit-ke chhiong Ngài phu̍k-ngìn Thai-ví ke kiûn-vòng yún-yén thúng-chhṳ kì-têu. 26Ngài oi lâu kì-têu li̍p phìn-ôn ke yok, he yún-yén ke yok. Ngài oi sṳ̂-ên cheu-ku kì-têu, pûn kì-têu ngìn-khiéu chen-kâ, yu oi sṳ́ Ngài ke sṳn-thien yún-yén sat-li̍p chhai kì-têu ke thú-thi. 27Ngài oi lâu kì-têu he̍t chhai ke-vi. Ngài oi cho kì-têu ke Song-ti; kì-têu oi cho Ngài ke chṳ́-mìn. 28Ngài sṳ́ Ngài ke sṳn-thien yún-yén sat-li̍p chhai kì-têu tông-chûng ke sṳ̀, van-koet chhiu voi tî Ngài — Song-chú kién-sién Yî-set-lie̍t, sṳ́ kì fûn-phe̍t vì-sṳn cho Ngài ke chṳ́-mìn.”

Currently Selected:

Yî-sî-kiet Sû 37: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)