Yî-sî-kiet Sû 36

Song-ti Su-fuk Pûn Yî-set-lie̍t

1Song-chú kóng: “Ngìn-chṳ́ â, ngì oi hiong Yî-set-lie̍t ke sân chhòn-kóng Ngài ke sin-sit, ham kì-têu thâng Ngài ke fa. 2Ngài — Chṳ-kô ke Song-chú án-ngiòng kóng: Yî-set-lie̍t ke thi̍t-ngìn sṳt chhṳ́-seu ngì-têu kóng: ‘Hàn-hó ô! Ke-têu kú-ló ke sân-liâng chhiòn-phu kûi ngài-têu lé!’

3“Só-yî, ngì oi kóng yi-ngièn, siên-pu Ngài — Chṳ-kô ke Song-chú án-ngiòng kóng: Si-vì ke koet-kâ chien-tha̍p ngì-têu, sṳ́ ngì-têu fông-liòng, cham-liâng ngì-têu, ngì-têu pûn-ngìn sâu-nat, fí-pong. 4Só-yî, Yî-set-lie̍t ngì liá-têu thai-sân, se-sân, hò-pa, sân-lak, mò-yung ke fông-phû lâu pûn si-vì ke koet-kâ cham-liâng vú-yu̍k ke sàng-sṳ â, ngì-têu chhiòn-phu oi thâng Ngài — Chṳ-kô ke Song-chú tui ngì-têu kóng ke fa.

5“Ngài — Chṳ-kô ke Song-chú fat-khién chit-phi si-vì ke koet-kâ, thi̍t-phe̍t he Yî-tûng. Kì-têu fôn-hí na-thiên, tông khon-khiâng Ngài, cham-liâng Ngài ke thú-thi, chún-cho chhṳ-kâ ke sán-ngia̍p.

6“Só-yî, ngì oi tui Yî-set-lie̍t ke thú-thi kóng yi-ngièn; oi lâu thai-sân se-sân, hò-pa, sân-lak kóng: Yîn-vi kì-têu pûn lie̍t-koet vú-yu̍k, Ngài — Chṳ-kô ke Song-chú tông fat-khién. 7Só-yî Ngài — Chṳ-kô ke Song-chú khià-sú fat-sṳ kóng: Ngì si-vì ke koet-kâ yit-thin oi su vú-yu̍k. 8Chúng-he, Yî-set-lie̍t ke sân â, ngì-têu ke su-é voi chai yit-pái chiâng hí-lòi, vi Ngài ke chṳ́-mìn kiet-chhut kó-chṳ́. Ngài ke chṳ́-mìn â, ngì-têu tông-kiak chhiu voi chón ku-hiông lé. 9Ngài oi pông-chhu ngì-têu, chón-hiong ngì-têu; Ngài pó-chṳn ngì-têu ke thú-thi voi yû-hó lài-thièn ve-chúng. 10Ngài oi sṳ́ ngì-têu ke ngìn-khiéu chen-kâ; ngì-têu oi he̍t chhai sàng-tú, chhùng-kien kâ-yèn. 11Ngài oi sṳ́ ngìn lâu liuk-hiuk hîn-vong; ngì-têu voi tô-chṳ́ tô-sûn, ngìn-khiéu pí yî-chhièn kâ chhin-tô. Ngài oi pûn ngì-têu he̍t chhai yî-chhièn he̍t-ko ke só-chhai, sṳ́ ngì-têu pí yî-chhièn kien-kâ fàn-yùng. Án-ngiòng, ngì-têu chhiu voi tî Ngài he Song-chú. 12Ngài ke chṳ́-mìn Yî-set-lie̍t â, Ngài oi tai ngì-têu chón-lòi, pûn ngì-têu chhùng-sîn he̍t chhai Yî-set-lie̍t ke thú-thi. Kì voi sàng-cho ngì-têu chhṳ-kâ ke thú-thi, m̀-voi chai pûn ngì-têu ke chṳ́-ńg ngo-tó.

13“Ngài — Chṳ-kô ke Song-chú kóng: Ngìn-mìn kóng liá-te thú-thi voi sṳ̍t ngìn, he voi hoi ngìn mòng-koet, chhie̍t-chṳ́ chhie̍t-sûn ke thú-thi. 14Chúng-he, chhiùng-kîm yî-heu liá-te thú-thi m̀-voi chai sṳ̍t ngìn, m̀-voi chai hoi ngì-têu mòng-koet, chhie̍t-chṳ́ chhie̍t-sûn. Ngài — Chṳ-kô ke Song-chú án-ngiòng siên-pu lé. 15Liá-te thú-thi m̀-voi chai hoi ngì-têu pûn ngoi-koet-ngìn vú-yu̍k, pûn-ngìn sâu-nat, ya m̀-voi chai hoi ngì-têu mòng-koet. Ngài — Chṳ-kô ke Song-chú án-ngiòng siên-pu lé.”

Yî-set-lie̍t ke Sîn Sên-fa̍t

16Song-chú yu lâu ngài kóng-fa; 17Kì kóng: “Ngìn-chṳ́ â, Yî-set-lie̍t-ngìn he̍t chhai kì-têu pún-koet ke sṳ̀, kì-têu ke sên-fa̍t lâu hàng-vì tá-lá-sap ke-te thú-thi. Chhai Ngài ngién-chûng, kì-têu ke hàng-vì tông-chhiong kîn-khì chûng ke fu-ngìn-kâ án-ngiòng mò chhiang-li#36:17 “mò chhiang-li”: Chhâm-kháu Li-vi Ki 15:19.. 18Kì-têu chhai ke-te thú-thi song chhṳ̀-ngìn, pai ngiéu-siong, tá-lá-sap thú-thi, só-yî Ngài hiong kì-têu piang-chhut Ngài ke thai fat-khién. 19Ngài yîn-vi kì-têu mò chhiang-li ke sên-fa̍t lâu hàng-vì chit-fa̍t kì-têu, chiông kì-têu kiuk-to ngoi-koet hi, fûn-san to thiên-ha. 20Kì-têu mò-lun to nai-vi chhiu hoi Ngài ke sṳn-miàng su siû-yu̍k; ke-têu ngìn ngi-lun kóng: ‘Liá-têu ngìn kám m̀-he Song-chú ke chṳ́-mìn, ngióng-voi lì-khôi Song-chú ke thú-thi nè?’ 21Yî-set-lie̍t-ngìn mò-lun liù-long to nai-vi, chhiu hoi Ngài ke sṳn-miàng su siû-yu̍k, chúng-he Ngài hàn-he siak Ngài ke sṳn-miàng.

22“Só-yî, ngì oi lâu Yî-set-lie̍t-ngìn kóng, Ngài — Chṳ-kô ke Song-chú án-ngiòng kóng: Yî-set-lie̍t-ngìn â, Ngài oi cho ke sṳ m̀-he vi ngì-têu, he vi Ngài chhṳ-kâ ke sṳn-miàng, chhiu-he ngì-têu chhai kok-koet só siû-yu̍k ke miàng. 23Ngì-têu sṳt chhai lie̍t-koet chûng hoi Ngài ke sṳn-miàng su siû-yu̍k; Ngài oi yung ngì-têu chṳn-mìn, pûn kì-têu khon Ngài ke miàng he sṳ̀n-sṳn ke. Án-ngiòng, lie̍t-koet chhiu voi tî Ngài he Song-chú. Ngài — Chṳ-kô ke Song-chú án-ngiòng siên-pu lé. 24Ngài oi tai-liâng ngì-têu lì-khôi kok-koet; Ngài oi tui tak só-chhai chiông ngì-têu seu-si̍p hí-lòi, tai ngì-têu chón ku-hiông. 25Ngài oi yung chhiang-li ke súi hia ngì-têu, pûn ngì-têu chhiang-li. Ngài oi sé-thet ngì-têu só-yû ke ô-chô, chhù-thet ngì-têu só-yû ke ngiéu-siong. 26Ngài oi su-pûn ngì-têu sîn ke sîm, chiông sîn ke lìn piong chhai ngì-têu tî-poi; Ngài oi chhù-thet ngì-têu chhiong sa̍k-thèu án-ngang ke sîm, su-pûn ngì-têu yû-hiet yû-ngiuk ke sîm. 27Ngài oi chiông Ngài ke Lìn piong chhai ngì-têu tî-poi, sṳ́ ngì-têu voi chûn-hàng Ngài ke fap-li̍t, chôn-sîm fu̍k-chhiùng Ngài ke kie-min. 28Án-ngiòng, ngì-têu chhiu voi he̍t chhai ke-te Ngài su-pûn ngì-têu chú-siên ke thú-thi song. Ngì-têu oi cho Ngài ke chṳ́-mìn; Ngài oi cho ngì-têu ke Song-ti. 29Ngài oi kiu ngì-têu thot-lì só-yû ke vû-ve. Ngài oi ham ńg-kuk fûng-sû, Ngài m̀-voi chai pûn ngì-têu tù-tó kî-fông. 30Ngài oi sṳ́ ngì-têu ke kó-su kiet kó-chṳ́ tô-tô, thièn-yèn chen-kâ sên-sán, ngì-têu chhiu m̀-voi chai yîn-vi kî-fông su-tó lie̍t-koet ke vú-yu̍k. 31Ngì-têu voi sióng-tó chhṳ-kâ ke fái hàng-vì lâu só-fam ke ko-sṳt, yu yîn-vi chhṳ-kâ ke chhui-ok chhin-nâu chhṳ-kâ. 32Yî-set-lie̍t-ngìn â, Ngài — Chṳ-kô ke Song-chú oi ngì-têu tî, Ngài cho liá yit-chhiet m̀-he vi-tó ngì-têu. Ngì-têu oi vi chhṳ-kâ só-cho ke kám-kok chhin kien-seu.”

33Chṳ-kô ke Song-chú án-ngiòng kóng: “Ngài sé-chhiang ngì-têu ke chhui yî-heu, oi pûn ngì-têu he̍t chhai sàng-tú, chhùng-kien kâ-yèn. 34Yî-chhièn, ko-lu ke ngìn chhiòn-phu kóng ngì-têu ke thú-thi ngióng-voi án fông-liòng, chúng-he Ngài oi pûn ngì-têu chhùng-sîn kâng-chung liá thièn-thi. 35Kì-têu voi kóng, yî-chhièn chhiong khóng-yâ ke thièn-thi, liá-ha chhiong Yî-thien-yèn; yî-chhièn pûn-ngìn fi-thet, pho-fái ke fông-sàng, liá-ha ngìn-khiéu chung-tô, sàng-pó kiên-ku lé. 36Ke-sṳ̀, si-vì hàn-màng me̍t-mòng ke lìn-koet chhiu voi tî Ngài — Song-chú chhùng-sîn kien-sat fông-sàng, chhùng-sîn kâng-chung fông-thi. Ngài — Song-chú án-ngiòng siên-pu lé. Ngài kóng-ko ke, Ngài yit-thin voi sṳ̍t-hàng.”

37Chṳ-kô ke Song-chú án-ngiòng kóng: “Ngài oi ham Yî-set-lie̍t-ngìn chai hiong Ngài khì-khiù pông-chhu; Ngài oi sṳ́ kì-têu ke ngìn-khiéu chhiong yòng-khiùn án-ngiòng chen-kâ. 38Fông-thet ke sàng-sṳ voi chhûng-mân ngìn-khiùn, chhiu-chhiong yî-chhièn Yâ-lu-sat-lâng chhai chiet-khì ke sṳ̀ chiâm-mân hien-chi yung ke yòng-khiùn khiung-yong. Án-ngiòng, kì-têu chhiu voi tî Ngài he Song-chú.”

Currently Selected:

Yî-sî-kiet Sû 36: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)