Yî-sî-kiet Sû 33

Song-ti Phai Yî-sî-kiet Cho Sú-mong-chá

(Yî-sî-kiet Sû 3:16-21)

1Song-chú lâu ngài kóng-fa; 2Kì kóng: “Ngìn-chṳ́ â, oi lâu ngì ke thùng-pâu kóng, tak-pái Ngài sṳ́ yit-ke koet-kâ tù-tó chan-lon, ke-koet ke ngìn-mìn voi sién-chhut yit-sà lòi cho sú-mong-chá. 3Sú-mong-chá khon-tó thi̍t-ngìn lòi kûng-kit ke-thi, chhiu phùn yòng-kok kín-ko ngìn-mìn. 4Na-he yû-ngìn thâng-tó kín-po m̀ tap kì, pûn thi̍t-ngìn chhṳ̀-sí, kì ke chhui chhiu kûi chhṳ-kâ. 5Yîn-vi kì m̀ tap kín-po, kì ke chhui chhiu kûi chhṳ-kâ. Na-he kì chiap-su kín-po, kì yit-thin voi kiu-tó chhṳ-kâ ke miang. 6Chúng-he, sú-mong-chá na-he khon-tó thi̍t-ngìn lòi kûng-kit ke-thi, mò phùn yòng-kok, thi̍t-ngìn lòi-to, chhṳ̀-sí kì-têu tông-chûng ke ngìn, chhiu-son pûn thi̍t-ngìn chhṳ̀-sí ke he chhui-ngìn, Ngài ya oi hiong sú-mong-chá lòi-thó hiet-chai.

7“Ngìn-chṳ́ â, Ngài liá-ha phai ngì cho Yî-set-lie̍t-ngìn ke sú-mong-chá. Ngì yit-thin oi chiông Ngài chhîn-sṳ̂n lâu ngì kóng ke fa kín-ko kì-têu. 8Na-he Ngài siên-pu mêu yit-ke fái-ngìn yit-thin oi sí, ngì m̀ hi kín-ko kì, khien kì hi-sià kûi-chṳn, kì sûi-yèn voi yîn-vi chhṳ-kâ ke chhui sí-thet, Ngài sa oi chûi-kiu ngì liù kiâ hiet ke chit-ngim. 9Na-he ngì kín-ko ke fái-ngìn, kì m̀-hén kói-ko, hàn-he cho fái-sṳ, kì oi yîn-vi chhṳ-kâ ke chhui sí-thet, chúng-he ngì voi kiu-tó chhṳ-kâ ke miang.”

Ke-ngìn ke Chit-ngim

10Song-chú lâu ngài kóng: “Ngìn-chṳ́ â, ngì oi tui Yî-set-lie̍t-ngìn kóng: ‘Ngì-têu sòng-sòng kóng: Ngài-têu ke chhui-ok ko-fam chhiu-chhiong tâm-thèu chak chhai ngài-têu sṳ̂n-song, ngài-têu thin-chho̍k voi chhiam-chhiam sêu-me̍t-thet, ngióng-nèn sên-chhùn hâ-hi nè?’ 11Lâu kì-têu kóng, Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ, Ngài m̀ fôn-hí khon-tó fái-ngìn sí-thet, Ngài kha fôn-hí khon-tó kì fí-kói lòi sên-chhùn. Yî-set-lie̍t-ngìn â, ngì-têu oi fí-kói, lì-khôi fái hàng-vì! Ngì-têu ngióng oi-sṳ́ hi-sí nò?

12“Ngìn-chṳ́ â, oi lâu Yî-set-lie̍t-ngìn kóng, hó-ngìn fam-chhui, kì yî-chhièn só-cho ke hó-sṳ mò fap-thu kiu kì. Fái-ngìn fí-kói, m̀-sṳ́ su hìn-fa̍t; hó-ngìn fam-chhui, ya cho-m̀-tet yîn-vi kì sṳt hàng-ko hó-sṳ chhiu m̀-sṳ́ sí. 13Chhiu-son Ngài yin-hí hó-ngìn kì yit-thin voi yû sâng-miang, na-he kì láu-tó chhṳ-kâ yí-kîn cho chhin-tô hó-sṳ chhiu khôi-sṳ́ fam-chhui, Ngài chhie̍t-tui m̀-voi ki-ngiam kì yî-chhièn ke hó hàng-vì. Kì yit-thin oi yîn-vi chhṳ-kâ ke chhui lòi sí. 14Chhiu-son Ngài kín-ko fái-ngìn kì yit-thin voi sí, na-he kì fí-kói, cho chṳn-chhṳ̍t kûng-tong ke sṳ, 15chhiu-chhiong chiông ngìn nâ-lòi tí-ap ke tûng-sî kûi-vàn ngièn-chú, ya-he chiông thêu-lòi ke tûng-sî kûi-vàn ngièn-chú — kì fí-kói, chûn-hàng su sâng-miang ke fap-li̍t, kì chhiu m̀-voi sí, fán-chón voi yû sâng-miang. 16Ngài oi sa-miên kì só-fam ke yit-chhiet chhui; kì yit-thin oi yîn-vi chhṳ-kâ só-cho chṳn-chhṳ̍t kûng-tong ke sṳ lòi sên-chhùn.

17“Sûi-yèn ngì ke thùng-pâu kóng Ngài án-ngiòng cho mò kûng-phìn, khì-sṳ̍t, kì-têu só-cho ke chang he mò kûng-phìn. 18Hó-ngìn mò chai cho hó-sṳ, fán-chón hi cho fái-sṳ, kì yit-thin voi yîn-vi án-ngiòng lòi sí. 19Fái-ngìn fí-kói, cho chṳn-chhṳ̍t kûng-tong ke sṳ, kì chhiu yit-thin voi yîn-vi án-ngiòng lòi kiu-tó sâng-miang. 20Yî-set-lie̍t-ngìn â, ngì-têu kóng: ‘Chú án-ngiòng cho mò kûng-phìn.’ Chúng-he Ngài oi cheu ngì-têu tak-sà ke hàng-vì lòi sṳ́m-phan ngì-têu.”

Yâ-lu-sat-lâng Ham-lo̍k ke Sêu-sit

21Ngài-têu pûn-ngìn chok-hi ke thi sṳ̍p-ngi ngièn sṳ̍p-ngie̍t chhû-ńg, yû yit-ke tui Yâ-lu-sat-lâng chéu-chhut lòi ke nan-mìn lòi lâu ngài kóng: “Yâ-lu-sat-lâng ham-lo̍k lé!” 22Liá-ke ngìn lòi ke chhièn yit am-pû, Song-chú ke Lìn kong#33:22 “Lìn kong”: Hî-pak-lòi-vùn chhṳ̍t-yi̍t he “sú on”. chhai ngài sṳ̂n-song, khôi ngài ke choi. Thi-ngi chêu-sṳ̀n, liá-ke ngìn lòi-to yî-chhièn, Song-chú yí-kîn fî-fu̍k ngài kóng-fa ke nèn-li̍t.

Ngìn-mìn ke Chhui

23Song-chú lâu ngài kóng-fa; 24Kì kóng: “Ngìn-chṳ́ â, Yî-set-lie̍t kin-nui ke-têu fông-liòng só-chhai ke ngìn-mìn kóng: ‘Â-pak-lâ-hón yit-sà chhiu tet-tó liá-te thú-thi, ngài-têu ngìn-su án-tô, hàn-kha yin-kôi tet-tó liá-te thú-thi cho sán-ngia̍p.’

25“Ngì oi lâu kì-têu kóng, Ngài — Chṳ-kô ke Song-chú án-ngiòng kóng: Ngì-têu sṳ̍t tai-hiet ke ngiuk, pai ngiéu-siong, chhṳ̀-ngìn liù-hiet, ngì-têu phìn má-ke hàn kám-kóng liá-te thú-thi he ngì-têu ke nè? 26Ngì-têu yí-kho vú-li̍t, cho sià-ok ke sṳ, sà-sà khiòng-kiên lìn-sa ke pû-ngiòng, ngì-têu phìn má-ke hàn kám-kóng liá-te thú-thi he ngì-têu ke nè?

27“Ngì oi lâu kì-têu kóng, Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ kóng: He̍t chhai fông-liòng só-chhai ke ngìn-mìn voi pûn-ngìn chhṳ̀-sí; he̍t chhai yâ-ngoi ke ngìn voi pûn yâ-chhu sṳ̍t-thet; khong chhai sân-táng yeu-sai ya-he sân-lùng tú ke ngìn voi pot-vûn sí-thet. 28Ngài oi sṳ́ liá-thi chha̍t-tái fông-fi; kì-têu só khoâ-khiéu ke li̍t-liong chhiòn-phu voi mò-thet. Yî-set-lie̍t ke sân-thi voi chha̍t-tái fông-thet, mò-ngìn kîn-ko ke-vi. 29Ngài yîn-vi kì-têu só-hàng yit-chhiet sià-ok ke sṳ, sṳ́ thú-thi chha̍t-tái fông-fi ke sṳ̀, kì-têu chhiu voi tî Ngài he Song-chú.”

Siên-tî Chhòn-kóng Sin-sit ke Kiet-kó

30Song-chú kóng: “Ngìn-chṳ́ â, ngì ke thùng-pâu chhai sàng-chhiòng sùn ya-he vuk mùn-héu chhi-si̍p ke sṳ̀, chhiòn-phu chhai ke-vi kóng ngì. Kì-têu fu-siông kóng: ‘Ngài-têu lòi-hi thâng-khon, Song-chú oi kóng má-ke fa!’ 31Só-yî Ngài ke chṳ́-mìn yê-kông tá-chhṳn, oi thâng ngì kóng. Chúng-he kì-têu thâng-liáu, m̀-hi sṳ̍t-hàng. Kì-têu choi kóng hiûn-mu ngì ke fa, hàn-he khiung-yong ko thâm-sîm ke sên-fa̍t. 32Chhai kì-têu lòi-khon, ngì he yit-ke kô-sú thin-thin, tân-chhiang voi chhong chhìn-kô, thàn su-khìm. Ngì ke fa, kì-têu tak-ki yû thâng-tó, chúng-he yit-ki ya m̀ hi sṳ̍t-hàng. 33Tông ngì só-kóng ke fa sṳ̍t-hien lé — khon â, yit-thin voi sṳ̍t-hien — ke-sṳ̀ kì-têu chhiu voi tî yû yit-ke siên-tî chhai kì-têu tông-chûng.”

Currently Selected:

Yî-sî-kiet Sû 33: THV12Rdb

Highlight

Copy