Yî-sî-kiet Sû 34

Yî-set-lie̍t ke Mu̍k-ngìn

1Song-chú lâu ngài kóng-fa; 2Kì kóng: “Ngìn-chṳ́ â, ngì oi chit-phi Yî-set-lie̍t ke thúng-chhṳ-chá, hiong kì-têu kóng yi-ngièn. Ngì oi lâu kì-têu kóng, Ngài — Chṳ-kô ke Song-chú tui kì-têu án-ngiòng kóng: Yî-set-lie̍t ke mu̍k-ngìn â, ngì-têu voi tù-tó châi-nan lé! Ngì-têu chṳ́-yû ku chhṳ-kâ, mu̍k-ngìn kám m̀-he oi mu̍k-yông yòng-khiùn mâ? 3Ngì-têu lîm yòng-nen, chok yòng-mô sâm, chhṳ̀ chhin-phì ke yòng, sṳ̍t yòng-ngiuk, chúng-he chhiùng-lòi m̀-hi cheu-ku yòng-khiùn. 4Ngiôn-ngio̍k ke, ngì-têu mò hiuk-to khiòng-chong; pot-phiang ke, ngì-têu mò yî-chhṳ; su-sông ke, ngì-têu mò pâu hó-se; mì-lu ke, ngì-têu mò thu chón-lòi; sṳt-lo̍k ke, ngì-têu mò hi chhìm chón-lòi. Ngì-têu fán-chón yung phau-li̍t ap-chṳ kì-têu. 5Yîn-vi mò mu̍k-ngìn, yòng-khiùn chhiu fûn-san, sàng-cho yâ-chhu ke sṳ̍t-vu̍t; 6chṳ-to Ngài ke yòng-khiùn liù-long chhai sân-chûng, yu chhai kô-sân táng, fûn-san chhiòn-thi, mò-ngìn cheu-ku, ya mò-ngìn hi chhìm.

7“Só-yî, mu̍k-ngìn â, ngì-têu oi thâng Ngài — Song-chú ke fa: 8Ngài — Chṳ-kô ke Song-chú chṳ́-tén Ngài yún-yén ke sâng-miang fat-sṳ: Ngài ke yòng-khiùn yîn-vi mò mu̍k-ngìn chhiu pûn yâ-chhu thûn sṳ̍t-thet. Ngài ke mu̍k-ngìn m̀ hi-chhìm; kì-têu chṳ́-yû ku chhṳ-kâ, m̀ mu̍k-yông Ngài ke yòng-khiùn. 9Só-yî, ngì liá-têu mu̍k-ngìn â, thâng Ngài kóng! 10Ngài — Chṳ-kô ke Song-chú oi lâu ngì-têu cho tui-thi̍t. Ngài oi sû-chón Ngài ke yòng-khiùn, m̀-chún ngì-têu chai cho kì-têu ke mu̍k-ngìn, ya m̀ pûn ngì-têu ki-siu̍k chṳ́-yû ku chhṳ-kâ. Ngài oi tui ngì-têu ke choi-khûng kiu Ngài ke yòng, m̀-chún ngì-têu sṳ̍t kì-têu ke ngiuk.”

Hó Mu̍k-ngìn

11“Ngài — Chṳ-kô ke Song-chú án-ngiòng kóng, Ngài oi chhîn-chhṳ chiông Ngài ke yòng-khiùn chhìm chón-lòi. 12Mu̍k-ngìn ngióng-pân chhìm-chón sṳt-san ke yòng, Ngài ya oi cheu-yong chhìm Ngài ke yòng chón-lòi. Kì-têu chhai vû-thiên am-thi, tô-châi tô-nan ke sṳ̀, pûn-ngìn kiuk-to kok só-chhai, Ngài oi tui ke-têu só-chhai chiông kì-têu kiu chón-lòi. 13Ngài oi thu kì-têu lì-khôi ngoi-koet, chiông kì-têu si̍p-ha̍p hí-lòi, tai-chón ku-hiông. Ngài oi thu kì-têu chón-to Yî-set-lie̍t ke sân-táng lâu hâi-súi piên, pin chhai yit-chhiet chhin-phì ke chhó-chhòng mu̍k-yông kì-têu. 14Ngài oi chhai Yî-set-lie̍t sân-táng ke chhó-ngièn hiuk kì-têu, pûn kì-têu chhai sân-táng lâu ke-têu yu-phì yu-chiâng ke chhó-chhòng ôn-sîm sṳ̍t-chhó. 15Ngài oi chhîn-chhṳ cho Ngài yòng-khiùn ke mu̍k-ngìn, vi kì-têu chhìm cho-tet ôn-sîm hiet-khun ke só-chhai. Ngài — Chṳ-kô ke Song-chú án-ngiòng siên-pu lé.

16“Sṳt-lo̍k ke, Ngài oi chhìm chón-lòi; mì-lu ke, Ngài oi thu chón-lòi; su-sông ke, Ngài oi pâu hó-se; pot-phiang ke, Ngài oi yî hó-lòi. Chúng-he ke-têu phì-chong ke, Ngài oi fí-me̍t, yîn-vi Ngài oi cheu kûng-tho mu̍k-yông yòng-khiùn.

17“Kóng-tó Ngài ke yòng-khiùn, Ngài — Chṳ-kô ke Song-chú án-ngiòng kóng: Ngài oi chhai yòng lâu yòng chûng-kiên, mièn-yòng-kú lâu sân-yòng-kú chûng-kiên sṳ̂-hàng sṳ́m-phan. 18Ngì-têu tông-chûng yû-têu sṳ̍t song-tén ke chhó-liau hàn m̀-tî chiuk, fán-chón châu-tha̍p sṳ̍t-chhûn ke chhó! Ngì lîm chhîn-súi, chón ko-lòi yu yung kiok chiông lîm-chhûn ke súi lòi-luk vùn-vùn. 19Ngài khì-thâ ke yòng-è kô-put-chiông sṳ̍t ngì-têu châu-tha̍p ko ke chhó, lîm ngì-têu luk-vùn ke súi.

20“Só-yî, Ngài — Chṳ-kô ke Song-chú án-ngiòng kóng: Ngài oi chhai ngì liá-têu phì-chong lâu chheu-ngio̍k ke yòng chûng-kiên chú-chhṳ̀ kûng-tho. 21Ngì-têu yung kiên-thèu súng ngiôn-ngio̍k ke, chiâm kì-têu, yung kok teu kì-têu, chiông kì-têu kiuk-san to kok só-chhai. 22Chúng-he, Ngài oi kiu Ngài ke yòng, m̀-pûn kì-têu chai pûn-ngìn ap-chṳ. Ngài oi chhai yòng lâu yòng chûng-kiên sṳ̂-hàng sṳ́m-phan. 23Ngài oi vi kì-têu sat-li̍p yit-ke chhiong Ngài phu̍k-ngìn Thai-ví án-ngiòng ke kiûn-vòng, kì voi cho kì-têu ke mu̍k-ngìn, mu̍k-yông kì-têu. 24Ngài — Song-chú oi cho kì-têu ke Song-ti; chhiong Ngài ke phu̍k-ngìn Thai-ví án-ngiòng ke kiûn-vòng voi lòi thúng-chhṳ kì-têu. Ngài — Song-chú án-ngiòng siên-pu lé. 25Ngài oi lâu kì-têu li̍p phìn-ôn ke yok. Ngài oi chhù-thet koet-nui hiûng-ok ke yâ-chhu, sṳ́ Ngài ke yòng ôn-chhiòn chhai khóng-yâ sṳ̍t-chhó, chhai su-lìm chûng hiet-khun.

26“Ngài oi su-fuk pûn kì-têu, pûn kì-têu chhai Ngài sṳn-sân ke si chû-vì ôn-kî lo̍k-ngia̍p. Ngài oi cheu sṳ̀-chiet lo̍k-súi, ya oi kong-hâ fuk-hi chhiong kâm-lìm. 27Thièn-yèn ke kó-su voi kiet-mân kó-chṳ́, thi voi chhut-sán ńg-kuk; tak-sà voi yû-hó ôn-sîm he̍t chhai chhṳ-kâ ke thú-thi song. Ngài chám-thôn Ngài chṳ́-mìn ke só-lien, tui thúng-chhṳ kì-têu ke ngìn sú-chûng sṳt-fong kì-têu ke sṳ̀, kì-têu chhiu voi tî Ngài he Song-chú. 28Lie̍t-koet m̀-voi chai chhióng-kiap kì-têu; yâ-chhu ya m̀-voi chai thûn-sṳ̍t kì-têu. Kì-têu voi yû-hó ôn-kî lo̍k-ngia̍p, m̀-voi chai su-tó khiúng-hak. 29Ngài oi sṳ́ kì-têu ke thú-thi pien-cho tông yû-miàng, hó kâng-chung ke só-chhai; kì-têu ke koet-nui m̀-voi chai yû kî-fông. Lie̍t-koet m̀-voi chai vú-yu̍k kì-têu. 30Yî-set-lie̍t-ngìn voi tî Ngài — Song-chú, kì-têu ke Song-ti lâu kì-têu khiung-ha; kì-têu chhiu-he Ngài ke chṳ́-mìn. Ngài — Chṳ-kô ke Song-chú án-ngiòng siên-pu lé.

31“Ngì-têu he Ngài ke yòng, he Ngài chhó-chhòng song ke yòng-khiùn. Ngì-têu he Ngài ke chṳ́-mìn, Ngài he ngì-têu ke Song-ti.” Chṳ-kô ke Song-chú án-ngiòng siên-pu lé.

Currently Selected:

Yî-sî-kiet Sû 34: THV12Rdb

Highlight

Copy