Yî-sî-kiet Sû 29

Chit-phi Âi-khi̍p

1Ngài-têu pûn-ngìn chok-hi ke thi-sṳ̍p ngièn sṳ̍p-ngie̍t sṳ̍p-ngi, Song-chú lâu ngài kóng-fa. 2Kì kóng: “Ngìn-chṳ́ â, ngì oi hiong Âi-khi̍p-vòng kóng yi-ngièn; ngì oi chit-phi kì lâu Âi-khi̍p chhiòn-koet. 3Oi lâu kì kóng, Chṳ-kô ke Song-chú án-ngiòng kóng: Âi-khi̍p-vòng â, Ngài oi lâu ngì cho tui-thi̍t! Ngì chhiong khong chhai hò-pa tú ke thai ngo̍k-ǹg. Ngì kóng Nì-lò-hò he ngì ke, he ngì chho ke. 4Ngài oi yung kiêu-é kiêu ngì ke hòi-sôi, sṳ́ hò-pa tú ke ǹg ngiàm-tén ngì ke lìn-kap, yèn-heu chiông ngì lâi-chhut Nì-lò-hò, lièn ke-têu ngiàm-tén ngì ke ǹg ya khiung-ha lâi chhut-lòi. 5Ngài oi chiông ngì lâu ǹg chhiòn-phu vok-to khóng-yâ. Ngì ke sṳ̂-thí voi vang chhai fông-thi, mò-ngìn mài-chong. Ngài oi yung ngì ke sṳ̂-thí vi fî-niâu chéu-chhu. 6Án-ngiòng, só-yû ke Âi-khi̍p-ngìn chhiu voi tî Ngài he Song-chú.”

Song-chú kóng: “Âi-khi̍p-ngìn â, Yî-set-lie̍t-ngìn yí-kho ngì-têu; khì-sṳ̍t, ngì-têu he yit-kî lù-chuk cho ke khú-chhóng thin-thin. 7Kì-têu yit khú-tén ngì-têu, ngì-têu chhiu thôn-thet, yu chhiuk-sông kì-têu ke hia̍p-hâ, kì-têu ke yêu-kut ya sám-tó. 8Só-yî, Ngài — Chṳ-kô ke Song-chú án-ngiòng kóng: Ngài oi sṳ́ ngì-têu tù-tó chan-chên, ngìn lâu thèu-sâng chhiòn-phu pûn-ngìn chhṳ̀ chhiang-chhiang. 9Âi-khi̍p ke thú-thi voi fông-fi. Án-ngiòng, ngì-têu chhiu voi tî Ngài he Song-chú.

“Yîn-vi ngì kóng Nì-lò-hò he ngì ke, he ngì chho ke, 10Ngài oi lâu ngì pin ngì ke Nì-lò-hò cho tui-thi̍t. Ngài oi sṳ́ Âi-khi̍p ke thú-thi, tui pet-phu ke Me̍t-thot-sàng, to nàm-phu ke Set-fut-nì-sàng#29:10 “Set-fut-nì-sàng” ya ôn-to “Hî-nì sàng” (chhâm-kháu Yî-soi-â Sû 49:12), hien-thoi miàng ôn-to Â-sṳ̂-vùn-sṳ; 30:6 khiung-yong., yit-chhṳ̍t to Kú-sṳ̍t kâu-kie, chhiòn-phu fông-fi, 11khon m̀-tó ngìn, ya khon m̀-tó yâ-chhu kîn-ko. Si-sṳ̍p ngièn-kiú, Âi-khi̍p voi mò-ngìn he̍t. 12Ngài oi sṳ́ Âi-khi̍p sàng-cho chhiòn sṳ-kie chui fông-liòng ke só-chhai; si-sṳ̍p ngièn-kiú, Âi-khi̍p ke sàng-chṳ́n voi pí ngim-hò fông-liòng ke sàng hàn-kha chhî-liòng. Ngài oi sṳ́ Âi-khi̍p-ngìn pien-cho nan-mìn, thò-nan to kok-koet, he̍t chhai ngoi-koet-ngìn tông-chûng.”

13Chṳ-kô ke Song-chú án-ngiòng kóng: “Si-sṳ̍p ngièn-heu, Ngài oi chiông Âi-khi̍p-ngìn tui fûn-san ke kok-koet si̍p-ha̍p hí-lòi, 14thu kì-têu chón-to Âi-khi̍p nàm-phu ke kâ-hiông. Chhai ke-vi, kì-têu oi chû-chṳt yit-ke se koet-kâ, 15he sṳ-kie-song chui-se ke vòng-koet; kì chhie̍t-tui mò phan-fap chai thúng-chhṳ phe̍t ke koet-kâ. Ngài oi sṳ́ kì kong-cho chhiòn-mò thi-vi ke se-koet, m̀-sṳ́ sióng-oi thúng-chhṳ phe̍t ke koet-kâ. 16Yî-set-lie̍t-ngìn chhie̍t-tui m̀-voi chai yí-kho kì ke chṳ̂-chhṳ̀. Âi-khi̍p ke kiet-khiu̍k sṳ́ Yî-set-lie̍t-ngìn sióng-tó yí-kho ngìn he ngióng-pân thai ke chho-ngu. Án-ngiòng, kì-têu chhiu voi tî Ngài he Chṳ-kô ke Song-chú.”

Âi-khi̍p Pûn Pâ-pí-lùn-vòng Chṳ̂n-fu̍k

17Ngài-têu pûn-ngìn chok-hi ke thi ngi-sṳ̍p chhit-ngièn châng-ngie̍t chhû-yit, Song-chú lâu ngài kóng-fa. 18Kì kóng: “Ngìn-chṳ́ â, Pâ-pí-lùn-vòng Nì-pu-kap-nì-sat kûng-tá Thai-ngì. Kì sṳ́ kiûn-chhui pà chhûng-tâm, chṳ-to thèu-nà-mô lut chhiang-chhiang, kiên-thèu liu-phì, chúng-he vòng lâu kiûn-chhui chhiòn-phu mò tet-tó má-ke kûng-chhièn. 19Só-yî, Ngài — Chṳ-kô ke Song-chú án-ngiòng kóng: Ngài oi chiông Âi-khi̍p ke thú-thi kâu-pûn Pâ-pí-lùn-vòng Nì-pu-kap-nì-sat. Kì voi chhin-miang chhióng Âi-khi̍p, chiông tai tet-chéu ke lûng-chúng chhióng-chéu; liá-têu chan-li-phín cho-tet cho kì kiûn-chhui ke kûng-chhièn. 20Ngài chiông Âi-khi̍p kâu-pûn kì cho kûng-chhièn, yîn-vi kì ke kiûn-chhui thoi Ngài cho-se. Ngài — Chṳ-kô ke Song-chú án-ngiòng siên-pu lé.

21“Ke-sṳ̀, Ngài oi sṳ́ Yî-set-lie̍t khiòng-chong hí-lòi; Ngài oi sṳ́ ngì — Yî-sî-kiet chhai tak-sà chhiòn-phu thâng tet-tó ke só-chhai kóng-fa. Án-ngiòng, kì-têu chhiu voi tî Ngài he Song-chú.”

Currently Selected:

Yî-sî-kiet Sû 29: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)