Yî-sî-kiet Sû 28

Chit-phi Thai-ngì-vòng

1Song-chú lâu ngài kóng-fa; 2Kì kóng: “Ngìn-chṳ́ â, oi lâu Thai-ngì-vòng kóng, Ngài — Chṳ-kô ke Song-chú án-ngiòng kóng: Ngì khoâ-khiéu kóng, ngì he sṳ̀n, ngì chhiong sṳ̀n-mìn chhô chhai hói tûng-ông ke pó-chho táng. Sûi-yèn ngì khon chhṳ-kâ chhiong sṳ̀n-mìn khiung-yong án chhûng-mìn, khì-sṳ̍t, ngì he ngìn, m̀-he sṳ̀n. 3Ngì chhṳ-ngin pí Tan-yî-lî#28:3 “Tan-yî-lî” ya-he yi̍t-cho “Tha̍t-nì-ngí”, 14:14, 20 khiung-yong. chhûng-mìn, mìn-pha̍k khong-tén ke pi-me̍t. 4Ngì yung chhûng-mìn lâu chṳ-sṳt chhon chhin-tô chhièn, pó-khu tú chit-chhùn chhin-tô kîm-ngiùn. 5Ngì chhin tî cho sên-lî ke fông-fap, kín lòi kín hó-ngiak. Ngì yîn-vi chhṳ-kâ ke hó-ngiak sîm-tú kiêu-ngau!

6“Só-yî, Ngài — Chṳ-kô ke Song-chú án-ngiòng kóng: Yîn-vi ngì khon chhṳ-kâ chhiong sṳ̀n-mìn khiung-yong án chhûng-mìn, 7Ngài oi tai-liâng lie̍t-koet chûng chui hiûng-ok ke thi̍t-ngìn lòi kûng-tá ngì. Ngì yung chhûng-mìn lâu chṳ-sṳt só tet-tó ke ke-têu chiâng ke pó-vu̍t, chhiòn-phu voi pûn kì-têu yung tô-é fí-fái thet, sṳ́ ngì ke yùng-kông su siû-yu̍k. 8Kì-têu voi chiông ngì chhṳ̀-sí, fit-to hói-tú hi. 9Kì-têu lòi chhṳ̀ ngì ke sṳ̀, ngì hàn-kám khon chhṳ-kâ cho sṳ̀n-mìn mò? Ngì mien-tui chhṳ̀ ngì ke ngìn ke-sṳ̀, ngì chhiu voi tî chhṳ-kâ he ngìn, m̀-he sṳ̀n. 10Ngì oi sí chhai mò kin-khièn ke ngoi-koet-ngìn sú-chûng. Ngài — Chṳ-kô ke Song-chú án-ngiòng siên-pu lé.”

Thai-ngì-vòng ke Kiet-khiu̍k

11Song-chú yu lâu ngài kóng-fa; 12Kì kóng: “Ngìn-chṳ́ â, ngì oi vi Thai-ngì-vòng chhong ôi-kô. Oi lâu kì kóng, Ngài — Chṳ-kô ke Song-chú án-ngiòng kóng: Ngì yî-chhièn he vàn-mî ke mù-fam, fî-sòng chhûng-mìn yu hó-khon. 13Ngì he̍t chhai Song-ti ke Yî-thien-yèn tú, yung fùng-pó-sa̍k, chon-sa̍k, vòng-pó-sa̍k, súi-chhông-ngiu̍k, fùng-mâ-nó, pit-ngiu̍k, làm-pó-sa̍k, liu̍k-pó-sa̍k lâu fùng-ngiu̍k lòi tá-pan chhṳ-kâ, ya yung kîm-hi tá-pan. Ngì su-chho ke-ngit, Ngài chhiu vi ngì chún-phi hó-se. 14Ngài sat-li̍p yit-ke kî-lu-pak hi pó-fu ngì#28:14 “Ngài ... pó-fu ngì” ya-he yi̍t-cho “Ngài sat-li̍p ngì cho su-kâu ke kî-lu-pak, khon-sú pó-fu”, Hî-pak-lòi-vùn ke yi-sṳ mò chhîn-chhú.; Ngài pûn ngì he̍t chhai Ngài ke sṳn-sân táng, chhai voi hâu-kông ke chû-pó tông-chûng hàng-lòi hàng-hi. 15Tui ngì su chhóng-chho to phai-fái yî-chhièn, ngì ke hàng-vì he mò hó-hiàm ke. 16To ngì sên-lî fat-tha̍t chhon thai-chhièn, ngì chhiu chhûng-mân phau-li̍t, sòng-sòng fam-chhui. Só-yî, Ngài pet ngì lì-khôi Ngài ke sṳn-sân; ke pó-fu ngì ke kî-lu-pak kiuk ngì#28:16 “ke pó-fu ngì ke kî-lu-pak kiuk ngì” ya-he yi̍t-cho “khon-sú pó-fu ke kî-lu-pak â, Ngai kiuk ngì”. lì-khôi voi hâu-kông ke chû-pó tông-chûng. 17Ngì yîn-vi chhṳ-kâ án yèn-tàu chhiu kiêu-ngau; ngì vi-tó miàng-sâng hoi chhṳ-kâ ngong-tong fú-phai. Só-yî Ngài chiông ngì piâng chhai thi-nài-hâ, yung án-ngiòng lòi kín-ko lie̍t-vòng. 18Ngì fái-sṳ cho-chhin, cho sên-lî mò kûng-tho, chṳ-to tá-lá-sap ngì ke-têu sṳn-só. Só-yî Ngài piong-fó sêu ngì, sṳ́ ngì pien-cho fó-fôi lòi-pûn ngìn khon. 19Ngì chhám lé, yún-yén me̍t-mòng lé. Ngin-sṳt ngì ke koet-kâ chhiòn-phu voi chho̍k-kiâng, kiâng kì-têu voi tù-tó lâu ngì khiung-yong ke kiet-khiu̍k.”

Chit-phi Sî-tun

20Song-chú lâu ngài kóng-fa; Kì kóng: 21“Ngìn-chṳ́ â, ngì oi kóng yi-ngièn chit-phi Sî-tun-sàng. 22Oi lâu kì-têu kóng, Ngài — Chṳ-kô ke Song-chú án-ngiòng kóng: Sî-tun â, Ngài oi lâu ngì cho tui-thi̍t! Ngìn oi yîn-vi Ngài chit-fa̍t ngì lòi chhṳ̂n-siung Ngài. Ngài yit hién-mìn Ngài ke sṳ̀n-sṳn, sṳ̂-hàng sṳ́m-phan, kì-têu chhiu voi tî Ngài he Song-chú. 23Ngài oi sṳ́ chhiòn-sàng pot-vûn, hiet-liù mân-kiê. Thi̍t-ngìn voi tui si-mien pat-fông lòi kûng-tá ngì, chhṳ̀-thet ngì ke ngìn-mìn. Án-ngiòng, ngì chhiu voi tî Ngài he Song-chú.”

Yî-set-lie̍t Oi Mùng-fuk

24Song-chú kóng: “Pún-lòi khon-khiâng Yî-set-lie̍t si-vì ke koet-kâ, m̀-voi chai chhiong net-è án-ngiòng chhiuk-sông Yî-set-lie̍t; ngìn chhiu voi tî Ngài he Chṳ-kô ke Song-chú.”

25Chṳ-kô ke Song-chú án-ngiòng kóng: “Ngài oi chiông si-san chhai kok-koet ke Yî-set-lie̍t-ngìn tai chón-lòi; án-ngiòng, lie̍t-koet chhiu voi tî Ngài he sṳ̀n-sṳn ke. Yî-set-lie̍t-ngìn voi he̍t chhai kì-têu chhṳ-kâ ke thú-thi song, chhiu-he Ngài su-pûn Ngài phu̍k-ngìn Ngâ-kok ke thú-thi. 26Kì-têu voi hí vuk-è, khôi-khién phù-thò-yèn, chhai ke-vi ôn-kî lo̍k-ngia̍p. Ngài oi chit-fa̍t khon-khiâng Yî-set-lie̍t ke lìn-koet, Yî-set-lie̍t chhiu voi hióng-su phìn-ôn. Án-ngiòng, kì-têu chhiu voi tî Ngài he Song-chú — kì-têu ke Song-ti.”

Currently Selected:

Yî-sî-kiet Sû 28: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)