Yî-sî-kiet Sû 27

Chûi-tho Thai-ngì ke Ôi-kô

1Song-chú lâu ngài kóng-fa; Kì kóng: 2“Ngìn-chṳ́ â, ngì oi vi Thai-ngì chhong ôi-kô, 3chûi-tho ke khî chhai kóng-héu, lâu chhin-tô hói-tó koet-kâ cho sên-lî ke kóng-héu. Oi lâu Thai-ngì kóng, Chṳ-kô ke Song-chú án-ngiòng kóng:

Thai-ngì â, ngì khoâ-khiéu chhṳ-kâ

he sṳ̍p-chhiòn sṳ̍p-mî ke sàng-sṳ.

4Ngì chiông thai-hói tông-cho vuk-hâ;

ngì pûn-ngìn hí-to chhiong he chhin-chiâng ke sòn-è.

5Kì-têu yung Het-mùn-sân ke chhiùng-su cho sòn-piông,

yung Lì-pâ-nun ke hiông-pak-su cho sòn-chhû.

6Kì-têu yung Pâ-sân ke siong-su cho sòn-chióng,

yung Sai-phú-lu-sṳ̂#27:6 “Sai-phú-lu-sṳ̂” Hî-pak-lòi-vùn chhṳ̍t-yi̍t he “Kî-thì-tó”. ke chhiùng-su siông siong-ngà cho sòn mien-táng ke piông.

7Ngì ke fàm-pu yung song-tén ke siu-fâ mà-sâ cho ke,

he Âi-khi̍p chhut-sán ke,

yén-yén khon-hi chhiu tông mìn-hién.

Ngì ke phùng-pu yung chui-hó ke pu-liau cho ke,

he tui Yî-li-sâ-tó yun-lòi ke làm-set, chṳ́-set pu.

8Vi ngì chhang-sòn ke he Sî-tun-ngìn, Â-fat-ngìn;

vi ngì hon-thò ke he pún-thi sṳ̂-fu.

9Sòn-táng ke muk-siong he Kâ-pâ-le̍t lòi ke ló sú-lu,

tû chhai ngì ke chûng-kiên cho pú sòn-phung ke kûng-chok;

hói-song ke sòn lâu sòn-yèn chhiòn-phu chhai ngì ke tiam-tú cho sên-lî.

10“Ngì ke kiûn-chhui yû Pô-sṳ̂, Lî-tí-â lâu Fut chhiáng-lòi ke chan-sṳ. Kì-têu chiông tún-phài lâu thiet-mo koa chhai ngì ke yàng-fòng. Kì-têu vi ngì chên-chhí kông-yùng. 11Â-fat lâu Kî-li-kâ#27:11 “Kî-li-kâ” ya-he yi̍t-cho “ngì ke kiûn-chhui”. lòi ke chan-sṳ vi ngì chóng sàng-chhiòng; Kâ-mâ-tí lòi ke chan-sṳ thoi ngì pó-fu sàng-lèu. Kì-têu chiông tún-phài koa chhai ngì ke chhiòng-thèu táng. Kì-têu sṳ́ ngì sṳ̍p-chhiòn sṳ̍p-mî.

12“Ngì lâu Thâ-sṳ̂-ngìn cho sên-lî, yung ngì fûng-fu ke chhòi-vu̍t kâu-von kì-têu ke ngiùn, thiet, siak lâu yèn. 13Ngì lâu Hî-lia̍p-ngìn, Thú-pâ-ngìn, Mí-sat-ngìn cho sên-lî, yung ngì ke fo-vu̍t kâu-von kì-têu ke nù-chhòi lâu thùng-hi. 14Ngì lâu Thò-kâ-mâ-ngìn cho sên-lî, yung ngì ke fo-vu̍t kâu-von kì-têu ke mâ, chan-mâ lâu lò-è. 15Ngì lâu Lò-tet-ngìn#27:15 “Lò-tet-ngìn” he kîn-kí yit kú yi̍t-pún, Hî-pak-lòi-vùn he “Tí-tan-ngìn”. cho sên-lî, yung ngì ke fo-vu̍t kâu-von hói-sùn kok-thi ke siong-ngà lâu vû-sîm-sa̍k ke su-liau. 16Ngì lâu Â-làn-ngìn cho sên-lî, yung ngì chhûng-chiuk ke chṳ-phín kâu-von kì-têu ke liu̍k-pó-sa̍k, chṳ́-set pu, siu-fâ pu, song-tén mà-sâ, sân-fù lâu fùng-pó-sa̍k. 17Ngì lâu Yù-thai-ngìn pin Yî-set-lie̍t-ngìn cho sên-lî, yung ngì ke fo-vu̍t kâu-von kì-têu ke thai-ma̍k#27:17 “thai-ma̍k” ya-he yi̍t-cho “Mí-ni̍t ke thai-ma̍k, piáng”, Hî-pak-lòi-vùn mò chhîn-chhú., phûng-thòng, kám-lám-yù lâu hiông-liau. 18Ngì lâu Thai-mâ-sṳ-kiet-ngìn cho sên-lî, yung ngì chhin-tô ke chṳ-phín kâu-von kì-têu Het-pún chhut-sán ke chiú lâu Sâ-ha̍p chhut-sán ke yòng-mô. 19Kì-têu#27:19 “Kì-têu”: Chhai liá-vi Hî-pak-lòi-vùn yû sâm-chak sṳ, yi-sṳ mò chhîn-chhú. ya yung chhin-hó ke kî-hi lâu hiông-liau kâu-von ngì ke fo-vu̍t. 20Tí-tan-ngìn yung phû mâ-ôn ke thán-è kâu-von ngì ke fo-vu̍t. 21Â-lâ-pak-ngìn lâu Kî-tha̍t yit-tai ke liâng-chhiu yung se yòng-è, mièn-yòng-kú, sân-yòng kâu-von ngì ke fo-vu̍t. 22Sṳ-pâ lâu Lâ-mâ ke sên-lî-ngìn yung chû-pó, kîm lâu kô-kip hiông-liau kâu-von ngì ke fo-vu̍t. 23Ha̍p-làn, Kôn-nì, Yî-thien ke-têu sàng, Sṳ-pâ ke sên-lî-ngìn, Â-sut lâu Kî-mat ke-têu sàng chhiòn-phu lâu ngì cho sên-lî. 24Kì-têu chiông chhâ-fà ke sâm-fu, chṳ́-set pu, siu-fâ pu, chhái-set ke thi-thán, chhin-chiâng ke tai-é, yung sok-è khún-tén mai-pûn ngì. 25Ngì yung Thâ-sṳ̂ chui-thai ke sông-sòn chû-sṳ̀n sòn-chhui chông-yun fo-vu̍t.

Ngì chhiong chhai hói-song hàng-sòn ke thai-sòn,

chông-mân fo-vu̍t.

26Chhang-sòn ke chiông ngì chhang-to ngoi-hói;

tûng-fûng chhai hói-song kûng-kit ngì.

27Chhṳ̀m-sòn ke sṳ̀,

só-yû kui-chhung ke fo-vu̍t,

chhiòn-phu sòn-yèn lâu hon-thò ke ngìn,

sòn-táng ke muk-siong lâu sên-lî-ngìn,

sòn-táng só-yû ke kiûn-ngìn lâu ngìn-mìn,

chhiòn-phu chhṳ̀m-to hói-tái hi.

28Chhṳ̀m-sòn ke sṳ̀,

sòn-yèn hêm kiu-miang ke sâng

chṳ-to chhai hói-sùn ke thi-phì ya voi chûn.

29Só-yû ke sòn-è chhiòn-phu pûn-ngìn fit-thet;

tak-ke sòn-yèn lâu chhang-sòn ke ngìn chhiòn-phu phà-sông hói-sùn.

30Kì-têu vi ngì khôi-sâng thai-kieu,

ve nài-fún chhai thèu-nà-táng,

chhai fó-fôi tông-chûng chan-lòi chan-hi.

31Kì-têu thi-kông-thèu, chok mà-sâm;

kì-têu vi ngì sông-sîm chhin-kieu.

32Kì-têu vi ngì chhong liá-sú ôi-kô:

Nai-chho sàng cho-tet lâu Thai-ngì pí nè?

Nai-chak sàng cho-tet lâu ke chhṳ̀m-to hói-tái ke Thai-ngì pí nè?

33Ngì hiong hói-ngoi yun-sung fo-vu̍t ke sṳ̀,

lie̍t-koet chhiòn-phu tet-tó kiûng-yin.

Ngì ke chhòi-fu lâu fo-vu̍t

sṳ́ thi-song ke kiûn-vòng pien hó-ngiak.

34Liá-ha, ngì tù-tó hói-nan;

ngì chhṳ̀m-to hói-tái.

Ngì só-yû ke fo-vu̍t lâu ngì ke chung-ngìn

chhiòn-phu lâu ngì khiung-ha chhṳ̀m-to hói-tú hi.

35“Chung hói-tó ke ngìn chhiòn-phu yîn-vi ngì ke miang-yun chho̍k-kiâng; kì-têu ke kiûn-vòng ya chhiòn-phu kiâng-to mân-mien yù-sèu. 36Ngì chhám lé, yún-yén me̍t-mòng lé! Sṳ-kiên tak só-chhai ke sên-lî-ngìn chhiòn-phu chho̍k-kiâng, kiâng-pha voi tù-tó lâu ngì khiung-yong ke miang-yun.”

Currently Selected:

Yî-sî-kiet Sû 27: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)