Tan-yî-lî Sû 8

Khon-tó Mièn-yòng-kú lâu Sân-yòng-kú

1Pak-sâ-sat-vòng chhai-vi ke thi-sâm ngièn, ngài — Tan-yî-lî khon-tó thi-ngi chak yi-siong#8:1 Tui liá-vi to 12:13 ngièn-vùn he fî-fu̍k yung Hî-pak-lòi-vùn siá ke (khon 2:4).. 2Chhai yi-siong chûng, ngài fut-yèn fat-hien chhṳ-kâ chhai Yî-làn-sén ke kîn-sàng Sû-sân. Ngài khî chhai Vû-lòi hò-pa sùn, 3khon-tó yit-chak mièn-yòng-kú khî chhai ke-vi, kì yû lióng-kî chhòng-kok, chúng-he chhòng-tón mò khiung-yong, kha-chhòng ke kok he kha-man sâng chhut-lòi ke. 4Ngài khon-tó mièn-yòng-kú yung kok hiong sî-phién, pet-phién, nàm-phién teu ko-hi; só-yû ke thung-vu̍t chhiòn-phu mò fap-thu tí-khong kì, ya mò fap-thu sám-khôi kì ke vî-li̍t. Kì fôn-hí ngióng-pân cho chhiu ngióng-pân cho, ye̍t-lòi ye̍t khiòng-thai.

5Ngài tông sióng ke he má-ke yi-sṳ ke sṳ̀, fut-yèn khon-tó yit-chak sân-yòng-kú tui sî-phién chéu ko-lòi, hàng-ko chhiòn-thi, kiak-to chhiong kiok mò tap-thi. Kì lióng-chak muk-chû chûng-kiên sâng yit-kî chhin ngiâ-muk ke kok. 6Kì hiong ngài thèu-ha khon-tó ke-chak khî chhai hò-pa sùn lióng-kî kok ke mièn-yòng-kú fat-khién chhong-tén ko-hi. 7Ngài khon-tó kì kûng-kit mièn-yòng-kú, fat-khién lòi chhong kì, chhong-thôn mièn-yòng-kú ke lióng-kî kok. Mièn-yòng-kú mò-li̍t hó tí-khong, vang chhai thi-song, su chhio-tha̍p, mò-ngìn nèn kiu mièn-yòng-kú thot-lì kì ke sú.

8Ke sân-yòng-kú kín chhṳ-kô chhṳ-thai; chúng-he tông kì ke khièn-li̍t tha̍t-to chui-khiòng ke sṳ̀, kì ke kok thôn-thet. Chhai ngièn-lòi ke só-chhai nang-ngoi sâng-chhut si-kî chhin ngiâ-muk ke kok, chṳ́-hiong thiên ke si-fông. 9Tui liá si-kî kok chûng-kiên ke yit-kî kok yu sâng-chhut yit-kî se-kok; liá se-kok hiong nàm-phién, tûng-phién, lâu ke tông-chiâng ke thi#8:9 “ke tông-chiâng ke thi” chṳ́ Yî-set-lie̍t. khok-chông sṳ-li̍t. 10Kì ke li̍t-liong khiòng-thai to nèn kûng-kit thiên-kiûn lâu sên-sṳ̀n, chiông yû-têu thiên-kiûn lâu sên-sṳ̀n te̍p-to thi-song, pin chhio-tha̍p kì-têu. 11Kì sṳm-chṳ kûng-yèn tui-khong thiên-kiûn ke ngièn-soi, tak-ngit chú-tóng ngìn hiong Kì hien-chi, yu fí-fái Kì ke sṳn-thien. 12Kì pet ngìn-mìn chhai ke-vi fam-chhui, tak-ngit hien mò yin-kôi hien ke chi#8:12 “Kì pet ngìn-mìn ... chi” ya-he yi̍t-cho “Kì phai-lòi ke kiûn-chhui chhai ke-vi fam-chhui, m̀-chún ngìn hien tak-ngit oi hien ke chi” (chhâm-kháu 11:31), Hî-pak-lòi-vùn ke yi-sṳ mò chhîn-chhú., chiông chṳ̂n-lî fit-lo̍k chhai thi-song. Liá se-kok yit-chhiet ke só-cho chhiòn-phu sun-li.

13Chiap-tén, ngài thâng-tó yit-ke thiên-sṳ́ mun nang-ngoi yit-ke thiên-sṳ́: “Chhai yi-siong chûng chhut-hien ke liá-têu sṳ oi ki-siu̍k kí-kiú nè? Tak-ngit yin-kôi hien ke chi, von-cho ke tet-ngìn-nâu ke chhui-ok oi to kí-kiú nè? Thiên-kiûn lâu sṳn-thien pûn kì chhio-tha̍p oi to kí-sṳ̀ nè?#8:13 “Tak-ngit ... oi to kí-sṳ̀ nè?” Hî-pak-lòi-vùn ke yi-sṳ mò chhîn-chhú.”

14Kì en kóng#8:14 “Kì en kóng” he cheu yit-têu kú yi̍t-pún, Hî-pak-lòi-vùn he “Kì tui ngài kóng”.: “Liá-têu sṳ oi ki-siu̍k lióng-chhiên sâm-pak ke am-pû lâu chêu-sṳ̀n#8:14 “lióng-chhiên sâm-pak ke am-pû lâu chêu-sṳ̀n” khó-yî son-cho “lióng-chhiên sâm-pak ngit” ya-he “yit-chhiên yit-pak ńg-sṳ̍p ngit” (chhâm-kháu 7:25)., sṳn-thien chang voi fî-fu̍k chhiang-li.”

Thiên-sṳ́ Kâ-pak-lie̍t Kié-sṳt Yi-siong

15Ngài — Tan-yî-lî tông sióng-oi liáu-kié liá yi-siong to-tái he má-ke yi-sṳ, fut-yèn-kiên yû yit-ke ngoi-mau chhiong ngìn ke khî chhai ngài ke mien-chhièn. 16Ngài thâng-tó tui Vû-lòi-hò yû ngìn-sâng hêm-kóng: “Kâ-pak-lie̍t â, lâu liá-ke ngìn kóng liá yi-siong ke yi-sṳ!” 17Kâ-pak-lie̍t hàng-to ngài sùn-thèu; ngài tông-kiâng, chhiu phu̍k chhai thi-song.

Kì tui ngài kóng: “Ngìn-chṳ́ â, ngì oi liáu-kié liá yi-siong. Liá yi-siong he yû-koân li̍t-sṳ́ ke kiet-khiu̍k.” 18Kì kóng-fa ke sṳ̀, ngài phu̍k chhai thi-song, m̀-tî ngìn sṳ. Chúng-he kì chiông ngài fù hí-lòi, 19tui ngài kóng: “Ngài oi chṳ́-sṳ ngì Song-ti ke fat-khién to chui-mî voi ngióng-pân; liá yi-siong he yû-koân Kì só-thin ke kiet-khiu̍k.

20“Ngì só khon-tó ke yû lióng-kî kok ke mièn-yòng-kú he chṳ́ Mí-tí-â lâu Pô-sṳ̂ ti-koet. 21Sân-yòng-kú he chṳ́ Hî-lia̍p ti-koet, kì lióng-chak muk-chû chûng-kiên ke-kî chhin ngiâ-muk ke kok he chṳ́ thi-yit ke vòng. 22Ke-kî kok áu-thôn yî-heu chang sâng chhut-lòi ke si-kî kok he chṳ́ liá ti-koet oi fûn-cho si-ke vòng-koet, chúng-he kì-têu ke li̍t-liong mò fap-thu lâu ngièn-lòi ke ti-koet pí.

23“Liá-têu vòng-koet ke ma̍t-khì, chhui-ok tông-mân ke sṳ̀, yû yit-ke hiûng-ok, kúi-cha ke vòng voi chhut-hien. 24Kì ke sṳ-li̍t ye̍t-lòi ye̍t-thai, chúng-he m̀-he kho chhṳ-kâ ke nèn-li̍t. Kì oi chho-sṳ̀n khi̍t-thai ke fí-me̍t; kì só-cho ke yit-thin sṳ̀n-kûng. Kì oi sêu-me̍t ke-têu tông-khiòng yu tông yû-li̍t ke ngìn lâu Song-ti ke sṳn-mìn. 25Yîn-vi kì káu-koai, kì ke kúi-kie hong-hong sṳ̀n-kûng. Kì chhṳ-kô chhṳ-thai, chhai ngìn mò thì-fòng ke sṳ̀ fut-yèn-kiên chhut-sú, sêu-me̍t chhin-tô ngìn. Kì sṳm-chṳ kûng-khôi lâu Van-vòng chṳ̂ Vòng cho tui-thi̍t, chúng-he kì chui-mî voi pûn chhêu-ko ngìn ke li̍t-liong sêu-me̍t. 26Yû-koân am-pû lâu chêu-sṳ̀n ke yi-siong#8:26 “am-pû lâu chêu-sṳ̀n ke yi-siong” chhâm-kháu 8:14. yí-kîn hiong ngì kié-sṳt lé. Liá yi-siong yit-thin voi sṳ̍t-hien; chúng-he ngì liá-ha oi pó-sú pi-me̍t, yîn-vi kì he chṳ́ yén-yén ke ngit-è kóng ke.”

27Ngài — Tan-yî-lî sîm-tú tông chhâu-fàn, phiang-tó kí-ngit. Yî-heu ngài hong-hí-lòi, chón-to kûng-chok só-chhai, phan-lî vòng chṳ́-phai pûn ngài ke sṳ-vu; chúng-he ngài pûn liá-ke yi-siong luk-to mò-kat mò-sat, m̀ mìn-pha̍k khì-chûng ke yi-sṳ.

Currently Selected:

Tan-yî-lî Sû 8: THV12Rdb

Highlight

Copy