Tan-yî-lî Sû 6

Tan-yî-lî Chhai Sṳ̂-é Fut

1Thai-liù-sṳ-vòng kiet-thin phai yit-pak ngi-sṳ̍p ke sén-chóng chhṳ-lî chhiòn ti-koet. 2Nang-ngoi, kì yu chṳ́-phai Tan-yî-lî lâu khì-thâ lióng-ke ngìn kam-tuk liá-khiùn sén-chóng, lòi vì-fu vòng ke khièn-li. 3Tan-yî-lî tông-kiak chhiu péu hien-chhut kì pí khì-thâ kam-tuk ya-he sén-chóng hàn-kha voi kón-lî. Yîn-vi Tan-yî-lî yû-siu ke chhòi-nèn, vòng sióng-oi sat-li̍p kì chhṳ-lî kûi-chak ti-koet. 4Só-yî, khì-thâ ke kam-tuk lâu sén-chóng sióng-chhin phan-fap chhai kì chhú-lî ke koet-chṳn-song chhìm ko-sṳt, chúng-he chhiòn-phu chhìm m̀-tó, yîn-vi Tan-yî-lî sṳ̀n-sṳ̍t khó-kho, mò pan-tiám chho-ngu. 5Kì-têu chhiu thai-kâ chhâm-siòng kóng: “Chhù-liáu tui liá Tan-yî-lî ke chûng-kau sin-ngióng ha-sú, ngài-têu yit-thin chhìm m̀-chhut ngim-hò khúng-ko kì ke lî-yù.”

6Só-yî, kì-têu chheu-tén hi kien vòng, tui kì kóng: “Thai-liù-sṳ-vòng van-soi! 7Ngài liá-têu kam-tuk, sén-chóng, fu sén-chóng, lâu só-yû ke kôn-yèn chhiòn-phu thùng-yi chhiáng koet-vòng siên-pu yit-thiàu kim-lin, mò-lun má-ngìn, chhai sâm-sṳ̍p ngit nui cho-m̀-tet hiong ngim-hò ke sṳ̀n-mìn khì-tó, ya-he hiong yit-chhiet ke ngìn khiù má-ke, tân-chhiang cho-tet hiong koet-vòng yit-sà khì-khiù. Má-ngìn vì-fam liá kim-lin, má-ngìn chhiu oi pûn-ngìn te̍p-ngi̍p sṳ̂-é fut. 8Chhiáng koet-vòng pân-pu liá-thiàu kim-lin, pin kâ tun vòng-yin, sṳ́ kì yû-háu. Cheu Mí-tí-â lâu Pô-sṳ̂ ke fap-li̍t, án-ngiòng ke min-lin he cho-m̀-tet kói-pien ke.” 9Só-yî Thai-liù-sṳ-vòng chhai liá sṳn-chṳ́ mien-táng kâ tun vòng-yin. 10Tan-yî-lî thâng-tó liá min-lin yí-kîn kâ tun vòng-yin, chhiu chón vuk-hâ hi. Kì ke lèu-táng yû yit-ke fòng-kiên, chhûng-mùn mien-hiong Yâ-lu-sat-lâng. Tan-yî-lî chhai khôi-tén ke chhûng-é chhièn khúi hâ-hi, cheu kì phìn-sòng ke si̍p-koan, tak-ngit sâm-pái hiong Song-ti hien-song kám-chhia lâu khì-tó.

11Tan-yî-lî ke thi̍t-ngìn chheu-tén hi, khon-tó kì hiong Song-ti khì-tó, 12chhiu khiung-ha to vòng ke-vi ko kì. Kì-têu tui vòng kóng: “Koet-vòng â, ngì sṳt siên-pu yit-thiàu kim-lin, kûi-thin mò-lun má-ngìn, chhai sâm-sṳ̍p ngit nui cho-m̀-tet hiong ngim-hò ke sṳ̀n-mìn khì-tó, ya-he hiong yit-chhiet ke ngìn khiù má-ke, tân-chhiang cho-tet hiong koet-vòng yit-sà khì-khiù. Má-ngìn vì-fam liá kim-lin, má-ngìn chhiu oi pûn-ngìn te̍p-ngi̍p sṳ̂-é fut.”

Vòng kóng: “Mò m̀-chho̍k; liá he yit-thiàu sṳn-chṳ́; cheu Mí-tí-â lâu Pô-sṳ̂ ke fap-li̍t, cho-m̀-tet kói-pien.”

13Só-yî kì-têu tui vòng kóng: “Tui Yù-thai chok-lòi ke Tan-yî-lî, kì m̀ chûn-chhung koet-vòng, m̀ fu̍k-chhiùng koet-vòng siên-pu ke min-lin, hàn-he cheu-sòng yit-ngit khì-tó sâm-pái.”

14Vòng thâng liá-fa, sîm-kôn fî-sòng kân-khú, kiet-sîm oi kiu Tan-yî-lî, kûi-ngit sióng phan-fap, chhṳ̍t-to lìm-am-é. 15Heu-lòi ke-têu ngìn yu chheu-tén lòi hiong vòng kóng: “Koet-vòng tî, cheu Mí-tí-â lâu Pô-sṳ̂ ke fap-li̍t, vòng só fat-chhut ke sṳn-chṳ́ he cho-m̀-tet kói-pien ke.”

16Só-yî, vòng ha-lin, ngìn chhiu chiông Tan-yî-lî chok hí-lòi, te̍p-ngi̍p sṳ̂-é fut. Vòng tui Tan-yî-lî kóng: “Ngien ngì só chûng-sîm sṳ-fung ke Song-ti kiu ngì.” 17Fut-héu yung yit-te thai sa̍k-thèu khièm-tén; vòng yung vòng-yin lâu ke-têu thai-sṳ̀n ke yin-é kâ-fûng, péu-sṳ chhú-fa̍t Tan-yî-lî ke sṳ cho-m̀-tet kói-pien. 18Vòng chón-to vòng-kiûng, kûi-ya sṳ̍t m̀-lo̍k, soi m̀-thet, ya mò-oi yit-chhiet ke ngu-lo̍k.

19Thiên yit-kông, vòng chhiu hong-hí-lòi, kón-kín chéu-to sṳ̂-é fut-sùn. 20Vòng yit-to fut-sùn, chhiu ôi-sông chhin-hêm: “Tan-yî-lî, yún-sên Song-ti ke phu̍k-ngìn â! Ngì chûng-sîm sṳ-fung ke Song-ti yû kiu ngì lì-khôi ke-têu sṳ̂-é mò?”

21Tan-yî-lî en-kóng: “Ngien vòng van-soi! 22Ngài ke Song-ti phai thiên-sṳ́ lòi fûng-tén liá-têu sṳ̂-é ke choi, sṳ́ kì-têu mò phan-fap sông-hoi ngài. Song-ti án-ngiòng cho, yîn-vi Kì tî ngài mò-chhui, ngài ya mò cho má-ke tet-chhui koet-vòng ke sṳ.”

23Vòng fî-sòng fôn-hí, min-lin phu̍k-ngìn chiông Tan-yî-lî kiu chhut-lòi. Yîn-vi án-ngiòng, kì-têu chiông Tan-yî-lî tui fut-tái lâi sông-lòi, khon-tó kì yit-si̍t-é ya mò su-sông, yîn-vi kì sin-kho Song-ti. 24Heu-lòi, vòng min-lin chiông só-yû ko Tan-yî-lî ke ngìn chok hí-lòi, chiông kì-têu lâu kì-têu ke pû-ngiòng, chṳ́-ńg chhiòn-phu te̍p-ngi̍p sṳ̂-é fut-tú. Kì-têu hàn-màng lo̍k-to fut-tái, sṳ̂-é chhiu kiak-kiak pêu sông-hi, ngâu-sui kì-têu ke kut-thèu.

25Sṳ-heu, Thai-liù-sṳ-vòng thûng-ko sṳ-kie tak-koet, tak-chhu̍k, kóng tak-chúng fa ke ngìn-mìn kóng:

“Ngien ngì-têu thai-hióng phìn-ôn! 26Ngài liá-ha min-lin, ngài chhṳ-lî ke ti-koet ngìn-mìn, chhiòn-phu oi kin-vi, chûn-chhùng Tan-yî-lî ke Song-ti!

Kì he yún-sên ke Song-ti;

Kì ke thúng-chhṳ yún-yén mò-thìn.

Kì ke chú-khièn yún-yén chhòng-chhùn;

Kì ke khièn-piang chhṳ̍t-to van-thoi.

27Kì kié-kiu ngìn, pông-chhu ngìn,

chhai thiên-táng lâu thi-mien hàng sṳ̀n-chiak khì-sṳ.

Kì chṳ́n-kiu Tan-yî-lî lì-khôi sṳ̂-é ke choi.”

28Tui án-ngiòng, Tan-yî-lî chhai Thai-liù-sṳ lâu Pô-sṳ̂-vòng Sai-lû-sṳ chhai-vi ke sṳ̀ fàm-sṳ sun-li.

Currently Selected:

Tan-yî-lî Sû 6: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)