Tan-yî-lî Sû 7

Tan-yî-lî Ke Yi-siong

(7:1–12:13)

Khon-tó Si-chak Yâ-chhu

1-2Chhai Pak-sâ-sat cho Pâ-pí-lùn-vòng ke thi-yit ngièn, yû yit am-pû, ngài — Tan-yî-lî pot yit-chak mung, khon-tó yit-ke yi-siong. Ngài chiông ke am-pû só khon-tó ke ki-liu̍k hâ-lòi:

Yû yit-chhṳn fûng tui si-mien pat-fông chhôi-lòi, tá-to thai-hói mien-táng. 3Yu yû hìn-chhong mò khiung-yong ke si-chak chhin-thai ke yâ-chhu tui hói-tú sông-lòi.

4Thi-yit chak yâ-chhu chhiong sṳ̂-é, chúng-he yû ên-tiâu ke yi̍t-kap. Ngài yu khon-tó, kì ke yi̍t-kap pok-thet lé; kì khî hí-lòi, chhiong ngìn án-ngiòng lióng-kiok khî chhai thi-mien song; yu pûn kì yû ngìn ke sîm.

5Thi-ngi chak yâ-chhu chhiong ngìn-yùng, yung lióng-chak heu-kiok khî hí-lòi; kì ke ngà-chhṳ́ ngâu-tén sâm-kî yám-pâi-kut. Yû sâng-yîm tui kì kóng: “Sṳ̍t â, chhin-liong sṳ̍t-ngiuk!”

6Ngài yu khon-tó, nang-ngoi yit-chak yâ-chhu chhut-hien. Kì chhiong pau-é, chúng-he poi-nòng yû si-chak yi̍t-kap, chhiong tiâu-é ke yi̍t-kap, yu yû si-chak thèu; kì tet-tó thúng-chhṳ-khièn.

7Ngài yu khon-tó, thi-si chak yâ-chhu chhut-hien lé. Kì tông khiòng-chong, yu chhin tet-ngìn-kiâng. Kì yung thai thiet-ngà ngâu-sui lia̍p-vu̍t, yèn-heu yung kiok chhio-tha̍p. Kì lâu thèu-chhièn sâm-chak yâ-chhu mò khiung-yong, kì yû sṳ̍p-kî kok. 8Ngài kín khon liá-têu kok ke sṳ̀, kok chûng-kiên sâng-chhut nang-ngoi yit-kî se-kok; liá se-kok chiông ngièn-lòi yû ke sṳ̍p-kî kok pâng-thet sâm-kî. Liá-kî se-kok yû chhiong ngìn ke muk-chû lâu yit-chông kóng thai-fa ke choi.

Khon-tó Yún-chhùn Ke

9Ngài yu khon-tó, yû sat-li̍p kí-chak pó-chho, táng-kô chhô-tén ke Van-kú Yún-chhùn ke. Kì ke sâm chhiong siet án-pha̍k, thèu-nà-mô chhiong tông-pha̍k ke yòng-mô. Kì ke pó-chho he fó, pó-chho ke lin-é chhiong lie̍t-fó. 10Tui Kì mien-chhièn phun-chhut lie̍t-fó, chhiong yit-thiàu thai hò-pa. Chhai pó-chho chhièn fu̍k-sṳ Kì ke yû chhiên-chhiên; khî chhai Kì mien-chhièn ke yû van-van. Kì siên-pu khôi-thìn, sû-kién ya tá khôi-lòi.

11Ngài chu-yi khon ke sṳ̀, yu thâng-tó ke-kî se-kok kóng thai-fa. Ngài chu-muk yit-khon, thi-si chak yâ-chhu chhṳ̀-thet lé, sṳ̂n-sṳ̂ su fí-fái, yu fit-lo̍k fó-chûng sêu-thet. 12Chhûn hâ-lòi ke sâm-chak yâ-chhu, kì-têu ke khièn-piang chhióng-chéu lé, chúng-he hàn liù kì-têu ke sâng-miang, chhṳ̍t-to só-thin ke sṳ̀-khì.

13Chhai am-pû-sṳ̀ chhut-hien ke yi-siong chûng, ngài khon-tó yû yit-vi tông-chhiong ngìn-chṳ́, chhô-tén yùn lòi, to ke Van-kú Yún-chhùn ke mien-chhièn, 14chiap-su khièn-piang, yùng-kông lâu vòng-khièn, sṳ́ tak-koet, tak-chhu̍k, kóng tak-chúng fa ke ngìn chhiòn-phu fu̍k-sṳ Kì. Kì ke thúng-chhṳ voi yún-yén chhòng-chhùn; Kì ke chú-khièn yún-yén mò khiùng-chhin.

Kié-sṳt Yi-siong

15Ngài — Tan-yî-lî só khon-tó ke yi-siong hoi ngài yù-sèu, chhâu-fàn mò phìn-ôn. 16Ngài hàng-to yit-ke sṳ-chhiùng mien-chhièn, chhiáng kì vi ngài kié-sṳt liá yit-chhiet ke sṳ. Só-yî kì vi ngài kié-sṳt liá yi-siong. 17Kì kóng: “Liá si-chak thai yâ-chhu he chṳ́ chiông-lòi sṳ-kie-song voi hîn-hí si-ke ti-koet. 18Chúng-he Chṳ-kô Song-ti ke sṳn-mìn voi chiap-su vòng-khièn, chóng-kón liá vòng-khièn chhṳ̍t-to yún-yún yén-yén.”

19Ngài sióng-oi kha chhîn-chhú tî thi-si chak yâ-chhu ke sṳ, yîn-vi liá-chak chhin tet-ngìn-kiâng ke yâ-chhu lâu khì-thâ sâm-chak yâ-chhu mò khiung-yong. Kì yung thùng-cháu thiet-chhṳ́ ngâu-sui lia̍p-vu̍t, yèn-heu yung kiok chhio-tha̍p. 20Ngài ya sióng-oi tî kì thèu-nà-táng ke sṳ̍p-kî kok lâu heu-lòi chang sâng chhut-lòi, pâng-thet nang-ngoi sâm-kî kok ke-kî se-kok he má-ke yi-sṳ. Ke-kî se-kok yû muk-chû lâu kóng thai-fa ke choi, khon hí-lòi pí khì-thâ ke kok hàn-kha tet-ngìn-kiâng.

21Chiap-tén ngài yu khon-tó, ke-kî se-kok lâu Song-ti ke sṳn-mìn siông-chhṳ̀, tá-yàng kì-têu, 22chhṳ̍t-to ke Van-kú Yún-chhùn ke lòi-to, vi Chṳ-kô Song-ti ke sṳn-mìn sṳ̂n-yên. Song-ti sṳn-mìn chiap-su vòng-khièn ke sṳ̀-chiet chhiu to lé.

23Ke sṳ-chhiùng yu tui ngài kié-sṳt kóng: “Ke thi-si chak yâ-chhu he chṳ́ chiông-lòi sṳ-kie-song hîn-hí ke thi-si ke ti-koet. Kì lâu khì-thâ ke ti-koet mò khiung-yong, kì voi thûn-thet chhiòn sṳ-kie, chhio-tha̍p, tá-sui chhiòn-thi. 24Ke sṳ̍p-kî kok he chṳ́ chiap-tén thúng-chhṳ liá ti-koet ke sṳ̍p-ke kiûn-vòng. Heu-lòi nang-ngoi yit-ke vòng hîn hí-lòi, lâu yî-chhièn ke vòng mò khiung-yong; kì voi chṳ̂n-fu̍k khì-chûng sâm-ke vòng. 25Kì voi kóng phoi-ngia̍k ke fa, lâu Chṳ-kô ke Song-ti cho tui-thèu, yu pet-hoi Song-ti ke sṳn-mìn. Kì sióng-oi kói-pien kì-têu ke chûng-kau fap-li̍t lâu chiet-khì. Song-ti ke sṳn-mìn voi su kì thúng-chhṳ yit sṳ̀-khì, lióng sṳ̀-khì, yu ko pan sṳ̀-khì#7:25 “yit sṳ̀-khì ... pan sṳ̀-khì” ya-he yi̍t-cho “sâm-ngièn-pan”.. 26Heu-lòi, thiên-táng ke sṳ́m-phan-chá oi khôi-thìn sṳ́m-phan, chiông kì ke thúng-chhṳ-khièn chhióng-chéu, chha̍t-tái sêu-me̍t kì. 27Chṳ-kô ke Song-ti oi chiông thiên-ha ke koet-kâ, vòng-khièn lâu nèn-li̍t su-pûn Kì ke sṳn-mìn. Kì-têu ke vòng-khièn yún-yén vù-khiùng; sṳ-kie só-yû ke thúng-chhṳ-chá chhiòn-phu oi fu̍k-sṳ pin sun-fu̍k kì-têu#7:27 “Kì-têu ke vòng-khièn ... sun-fu̍k kì-têu” ya-he yi̍t-cho “Kì ke vòng-khièn ... sun-fu̍k Kì”..”

28Liá-khien sṳ to liá vì-chṳ́. Ngài — Tan-yî-lî fî-sòng chho̍k-kiâng, mien-set pien-to la̍k-chhiâng. Ngài chiông liá yit-chhiet ke sṳ chhiòn-phu piong chhai sîm-tú.

Currently Selected:

Tan-yî-lî Sû 7: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)