Osọha lẹ 16
16
1DINVIE Kola, visunnu Izali ton lọ, visunnu Kohati tọn lo, visunnu Levi tọn lo, po Datani po po Abilami po, visunnu Eliabi ton le lọ, po Oni po, visunnu Pelẹti ton lọ visunnu Leubeni tọn lé lọ, bẹ́ gbẹtó lẹ: 2yé sọ fonṣite to Moṣe nukọn, po delẹ po sọn ovi Islaeli tọn lẹ lọ mẹ, ogán fodekandeao sọn agun lọ mẹ, ylọ hlan agunpipli lọ, sunnusi yínditọ lẹ: 3ye sọ pli yede dopo do Moṣe ji podọ do Aalọn yi, yé bo sọ dọ hlan yé dọmọ, E pé na mì, mimọ agùn lọ lẹpo wẹ wiwe, dopodopo yé tọn, podọ OKLUNỌ lọ sọ tin to yé ṣẹnṣẹn: whẹnẹnu etẹwutu mìlẹ zé mi de daga do agùnpipli OKLUNỌ lọ tọn ta? 4Whenuena Moṣe sè e, é họ́ jẹ nukunme etọn ji: 5é bo sọ dọhó hlan Kola podọ hlan ogbẹ́ eton lẹpo, dọmọ, To afọnnu OKLUNỌ lọ na do mehe yín eton hia, po mẹhè yín wiwe po, mehe ewọ na hẹn nado wá sẹpo e de 6Ehe mì ni wà; mi yí nuwhẹnwangban lẹ, Kola, po ogbẹ́ etọn lẹpo po, 7bo yí miyọn do e mẹ fìnẹ, bò yi nuyọnwán do yé ji to OKLUNỌ lọ nukọn to osọ̀: é bo nasọ yíndọ omẹ lọ mẹhe OKLUNỌ lọ na de, ewọ wẹ na yín wiwe: mì visunnu Levi tọn lẹ, mì tọn jẹglanglán. 8Podọ Moṣe sọ dọ hlan Kola dọmọ, Sè dinvie, mì visunnu Levi ton le: 9onú pevi de e lẹzùn hlan mì, dọ Jiwheyẹwhe Islaeli tọn lọ ko klan mì sọn agùn Islaeli tọn lọ mẹ, nado hẹn mì wá sẹpo ede de; nado nọ wà sinsẹ̀nzọ́n gohọtúntún OKLUNỌ lọ tọn ton, podọ nado nọ nọte to agùn lọ nukon nado wàdevizọ́n hlan yé; 10podọ na é ko hẹn we wá sẹpọ ẹ, po mẹmẹṣunnu towe lẹpo po visunnu Levi tọn le lọ po hi po? mìlẹ bo sọ to yẹwhenọzọ́n din ga? 11Enẹwutu wẹ ye bẹ́ hiẹ́ po ogbẹ́ towe lẹpo po pli dopọ do OKLUNỌ lọ ji: podọ Aalon etẹ́wẹ́ wutu we mì do to hùnhlun do e ji? 12Podọ Moṣe sọ domẹhlan nado ylo Datani po Abilami pó, visunnu Eliabi ton lẹ: yé bo sọ dọmọ, Mìwlẹ ma heji ja gba: 13onú pẹvi de é yin bọ hiẹ ko hẹn mí hẹji-jẹgbonu son aigba lọ ji wá he yí oyìnno po owín po do to sisa, nado hù mí to zùngbo lọ mẹ, adavó le hiẹ mananọma, yí dewe do basi ogán de to mí ji ga? 14Humọ hiẹ ma ko hẹn mí wá aigba de mẹ hé to sisà na oyìnnọ́ po owín po, mọ ma kó ná ogú ogle lẹ tọn mí po vẹ̃npa lẹpo gba hiẹ na dè nukun sunnusi helẹ tọn lẹ jẹgbonu wẹ? mìlẹ ma hẹji ja gba, 15Moṣe bo sọ yín homẹgblenọ talala, bo dọ hlan OKLUNỌ lọ dọmọ, A hò avọ́nunina yetọn pọ́n blo: yẹn ma yí kẹtẹkẹtẹ dopo sọn yé si, mọ yẹn ma sọ gbleawuna ode ye tọn gba. 16Moṣe sọ dọ hlan Kola dọmọ, Hiẹ po ogbé towe lẹpo po ni tin to OKLUNỌ lọ nukọn, hiẹ, po yé po, po Aalọn po, to osò: 17mì omẹ dopodopo ni yí nuwhẹnwángbán etọn, bo yí nuyọnwán do yé ji, mì omẹ dopodopo ni hẹn nuwhẹnwángbán etọn wá OKLUNỌ lọ nukọn, nuwhẹnwángbán fọdekandeao: hiẹ ga, po Aalọn po, mẹdopodopo nuwhẹnwángbán etọn. 18Yé sọ yí omẹ dopodopo nuwhẹnwángbán etọn, bo yí miyọn do yé mẹ, bo yí nuyọnwán do yé ji, bo nọte to ohọ̀n ogohọ̀ opli tọn lọ tọn kọ̀n po Moṣe po po Aalọn po. 19Kola sọ bẹ́ agùn lọ lẹpo pli do yé ji jẹ ohọ̀n ogohọ̀ opli tọn lọ tọn kọ̀n; gigo OKLUNỌ lọ tọn sọ sọawúhia hlan agùn lọ lẹpo.
20OKLUNỌ lọ sọ dọhó hlan Moṣe podọ hlan Aalọn, dọmọ, 21Mì klan mìde sọn agùn he ṣẹnṣẹn, na yẹn nido sú yé do to jlẹvude mẹ. 22Yé sọ họ́ jẹ nukunmẹ yetọn lẹ ji, bo dọmọ, Jiwheyẹwhe Èjiwheyẹwhe gbigbọ agbasalan lẹpo lẹ tọn lọ tọn, omẹ dopo na wàylando bọ hiẹ na yín homẹgbletọ po agùn lọ lẹpo po? 23OKLUNỌ lọ sọ dọhó hlan Moṣe, dọmọ, 24Dọhó hlan agùn lọ, dọmọ, Mì hẹji yì sọn gohọ̀túntún Kola, Datani, po Abilami po tọn dali. 25Moṣe sọ tite bo yì jẹ Datani po Abilamì po de; mẹho Islaeli tọn lẹ lọ hodo e. 26Ewọ sọ dọhó hlan agùn lọ, dọmọ, Yẹn vẹ̀ mì, mì fọ́nyì sọn ogohó omẹ ylankan helẹ tọn mẹ, bo sọ doalọ onú yetọn de go blọ, mìlẹ nikã yín súsúdo to ylando yetọn lẹpo mẹ. 27Mọwẹ yé hẹn yéde hẹji yì sọn gohọ̀túntún Kola, Datani po Abilami po tọn lọ mẹ, to awà lẹpo ji: Datani po Abilami po jẹgbonu wá, bo ṣite to ohọ̀n ogohọ̀ yetọn lẹ tọn kọ̀n, po asi yetọn lẹ po, po visunnu yetọn lẹ po, po omẹ flinflin yetọn lẹ po. 28Moṣe sọ dọmọ, Ehe dali mì na yọnẹn dọ OKLUNỌ lọ ko do mì hlan nado wà azọn helẹ pó; na yẹn ma wà yé sọn ayiha ṣie titi mẹ gba. 29Eyín omẹ helẹ kú okú vótọ gbẹtọ lẹpo tọn, kavi eyín yé yín didlapọ́n kẹdẹdi odlapón gbẹtọ lẹpo tọn; whenẹnu OKLUNỌ lọ ma ko do mi hlan gba. 30Ṣigba eyín OKLUNỌ basi onú yọyọ de, bọ aigba kẹ onù etọn, bo zé yé mì, po ehe yín yé tọn lẹpo po, bọ yé jẹte gbẹte yì odò lọ mẹ; whenẹnu mì na tunwun dọ omẹ helẹ ko vlẹ OKLUNỌ lọ. 31E sọ wá jọ, le é basi opòdo didọ ohó helẹ pó tọn, wẹ aigba lọ he tin to oglọ yé tọn zè doawe: 32aigba lọ sọ kẹ̀ onù etọn, bo zé yé mì, po whégbètọ yetọn lọ po, po omẹ he yín Kola tọn lẹpo po, po agbàn yetọn lẹpo po. 33Mowẹ yé, po ehe yín yé tọn lẹpo po jẹte yì odò lọ mẹ gbẹte: aigba lọ sọ bọnùdo yé, yé sọ và sọn agùnpipli lọ ṣẹnṣẹn. 34Islaeli he tin to odali yetọn lẹpo họ̀nyì na awhá yé tọn wutu: na yé dọmọ, Aigba lọ nikã zé mi mí. 35Miyọn sọ jẹgbonu sọn OKLUNỌ lọ de wá, bo fiọ sunnusi fọdekandeao lẹ lọ he yí nuyọnwán lọ na.
36OKLUNỌ lọ sọ dọhó hlan Moṣe, dọmọ, 37Dọhó hlan Eleazali visunnu Aalọn yẹwhenọ lọ tọn, dọ é ni bẹ́ nuwhẹnwángbán lẹ lọ tọn sọn fifiọ lọ mẹ, hiẹ ni bo sọ vúnvún miyọn lọ hlandọn; na wiwe wẹ yé. 38Yèdọ nuwhẹnwángbán omẹ helẹ tọn mẹhe ko wàylando: do ogbẹ́ yetọn ta do alindọn yetọn titi go, bo sọ gbọ yé ni yín tùntùn do basi flẹgbán lẹ na oṣinyọn agbà lọ tọn de: na yé yí yé na to OKLUNỌ lọ nukọn, enẹwutu wiwe wẹ yé: yé nasọ yín ohia de hlan ovi Islaeli tọn lẹ. 39Eleazali yẹwhenọ lọ sọ bẹ́ nuwhẹnwángbán gànvẹ̃ tọn lẹ lọ, ehe yé he yè fiọ lẹ ko yína; yé sọ tùn yé na oṣinyọn agbà lọ tọn de: 40nado yín oflinnú de hlan ovi Islaeli tọn lẹ lọ, hlan opòdo lọ dọ ojónọ de, he ma yín okún Aalọn tọn mẹ tọn ma na wá sẹpọ nado mẹ̀ nuyọnwán to OKLUNỌ lọ nukọn gba; na ewọ ma na do tin di Kola, podọ di ogbẹ́ etọn lẹ gba: dile OKLUNỌ lọ dọhó hlan ẹn do gbọn alọ Moṣe tọn mẹ.
41Ṣigba to azán awetọ gbè agùn ovi Islaeli tọn lẹ tọn lẹpo to hùnhlun do Moṣe ta podọ do Aalọn ta, dọmọ, Mìlẹ ko hù omẹ OKLUNỌ lọ tọn lẹ. 42E sọ wá jọ, whenuena yè pli agùn lọ do Moṣe ta podọ do Aalọn ta, bọ yé pọ́n hlan ogohò opli tọn lọ dali: bo, dayi e go, aslọ lọ ṣinyọn ẹn, gigo OKLUNỌ lọ tọn sọ sọawúhia. 43Moṣe po Aalọn po sọ wá jẹ nukọn ogohò opli tọn lọ tọn. 44OKLUNỌ lọ sọ dọhó hlan Moṣe, dọmọ, 45Mì hẹji yì sọn agùn he ṣẹnṣẹn, na yẹn nido và yé to jlevude mẹ ye sọ họ jẹ nukunmẹ yẹtọn lẹ ji. 46Moṣe sọ dọ hlan Aalọn, dọmọ, Yí nuwhẹnwángbán towe, bo yí miyọn do e me finẹ sọn agba lọ ji, bo yí nuyónwán do e ji, bo ze e yì jẹ agùn lọ de plaun, bo basi ovẹ̀se na ye: na yè hẹn homẹgble jẹgbonu yì sọn OKLUNỌ lọ de; yè ko sẹ́ dọ azònylankan lọ go 47Aalon sọ yí dole Moṣe dọhó do, bo họ̀nwezun biọ gblagbla agùnpipli lọ tọn mẹ; bo, dayi e go, yè ko ṣẹ̀ do azònylankan lọ go to gbẹtọ lẹ lọ ṣẹnṣẹn: é sọ yí nuyónwán lọ do e ji, bo basi ovẹ̀se na gbẹtọ lẹ lọ. 48E bo sọ ṣite to oṣiọ po mẹgbè lẹ po ṣẹnṣẹn; yè sọ hẹn azọ̀nylankan lọ doalọte. 49Dinvie yé he kú gbọn azònylankan lọ dali yin fọtọ́n wiẹnẹ po nuontọnkanweko po, mahia yé he kú to whẹ́hó Kola tọn dali lẹ dogọ. 50Aalọn bo sọ lẹ́gọ̀ jẹ Moṣe de jẹ ohọ̀n ogohọ̀ opli tọn lọ tọn kọ̀n: yè bo sọ hẹn azònylankan lọ doalọte.
Currently Selected:
Osọha lẹ 16: BWL23
Highlight
Share
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
