Osọha lẹ 10

1OKLUNỌ lọ sọ dọhó hlan Moṣe, dọmọ, 2Basi opẹ́n fataka tọn awe na dewe; azón tùntùn tọn wẹ hiẹ na basi yé do: hiẹ bo na nọ zán yé na yiylọ agùn lọ tọn, podọ na gbéjizọnlinzìnzìn osla lẹ lọ tọn. 3Podọ whenuena yé na kun ye, agùn lọ lẹpo na bé yéde plidopọ do de we to ohòn ogohò opli tọn lọ tọn kòn. 4Podọ eyín dọ dopo we yé kún, whenẹnu ogán lẹ lọ, nukuntọ fọtọ́n Islaeli tọn lẹ lọ tọn lẹ, na bé yéde plidopọ do de we. 5Podọ whenuena yé kún zínhihò de, osla he tin to awà whèyihọ tọn ji lẹ na yí gbéjizọnlin yetọn. 6Podọ whenuena yé sọ kún zínhihò de whla awetọ lọ, osla he tin to awà huwaji tọn lẹ lọ na yí gbéjizọnlin yetọn: yé na kún zínhihò de na gbéjizọnlin yetọn lẹ. 7Ṣigba whenuena agùnplidopọ tin nado yín bibẹ́ plidopọ, mìlẹ na kúnpẹ́n, ṣigba mì ma na kún zínhihò de gba. 8Visunnu Aalọn tọn lẹ lọ, yẹwhenọ lẹ lọ, wẹ na nọ kún opẹ́n lẹ lọ; yé bo na tin hlan mì na aṣẹdai de kakadoi gbọn whẹndo mìtọn lẹ mẹ. 9Podọ whenuena mì yì jẹ awhàn kọn to aigba mìtọn ji hẹ mẹglatọ he to nukunbiana mì lẹ, whenẹnu mì na yí opẹ́n lẹ lọ do kún zínhihò de; mìlẹ bo nasọ yín fìnflin to OKLUNỌ lọ Jiwheyẹwhe mìtọn nukọn, mìlẹ bo nasọ yín whinwhlẹn sọn kèntọ mìtọn lẹ si. 10To azán homẹhùn mìtọn tọn lọ mẹ ga, podọ to hùnwhẹ dido mìtọn lẹ mẹ, podọ to saunsaunwhenu losùn mìtọn lẹ lọ tọn mẹ, mì na yí opẹ́n lẹ lọ do kúnpẹ́n do avọ́nunina mimẹ̀ mìtọn lẹ ta, podọ do avọ́sánnu avọ́nunina jijọho tọn mìtọn lẹ ta; yé bo nasọ tin hlan mì na oflinnú de to Jiwheyẹwhe mìtọn nukọn: yẹn wẹ OKLUNỌ lọ Jiwheyẹwhe mìtọn.

11E sọ wá jọ to owhè awetọ lọ mẹ, to osùn awetọ lọ mẹ, to azán òkotọ osùn lọ tọn gbè wẹ yè zé aslọ lọ daga sọn gohọ̀túntún okunnuhó lọ tọn ta. 12Ovi Islaeli tọn lẹ lọ sọ dèdo nukọn kẹdẹdi gbéjizọnlin yetọn lẹ sọn zùngbo Sinai tọn lọ mẹ; aslọ lọ sọ nọ́ zùngbo Pilani tọn lọ mẹ. 13Yé sọ ṣẹ̀ do gbéjizọnlin yetọn ji kẹdẹdi gbèdide OKLUNỌ lọ ton gbọn alọ Moṣe tọn mẹ 14Podọ to otẹn tintan lọ mẹ awhansia osla ovi Juda tọn lẹ lọ tọn lọ tọn dèdo nukọn kẹdẹdi awhànpa yetọn lẹ; Nasoni visunnu Aminadabi tọn lọ wẹ tin to awhànpa etọn nu. 15Podọ Nẹtanẹli visunnu Zuali tọn lọ wẹ tin to awhànpa whẹndo ovi Issakali tọn lẹ lọ tọn nu. 16Podọ Eliabi visunnu Heloni tọn lọ wẹ tin to awhànpa whẹndo ovi Zẹbuluni tọn lẹ lọ tọn nu. 17Yè sọ hẹn gohọtúntún lọ wà odò; visunnu Gẹlsoni tọn le lọ po visunnu Melali tọn lẹ lọ po, mẹhe zé gohòtúntún lọ hẹn, dèdo nukọn. 18Awhànsia osla Lẹubeni tọn lọ tọn sọ dèdo nukọn kẹdẹdi awhànpa yetọn lẹ: Elizuli visunnu Sedeuli tọn lọ wẹ tin to awhànpa etọn nu. 19Ṣelumieli visunnu Zulisadai tọn lọ wẹ tin to awhànpa whẹndo ovi Simeoni tọn lẹ tọn lọ nu. 20Podọ Eliasafi visunnu Deuli tọn lọ wẹ tin to awhànpa whẹndo ovi Gadi tọn lẹ tọn lọ nu. 21Kohatinu lẹ sọ dèdo nukọn, zizé fìwiwe lọ hẹn: omẹ devo lẹ sọ ze gohọ̀túntún lọ dote pọ́n wiwá yé tọn. 22Podọ awhànsia osla ovi Ẹflaimi tọn lẹ tọn lọ dèdo nukọn kẹdẹdi awhànpa yetọn lẹ: podọ Elisama visunnu Amihudi tọn lọ wẹ tin to awhànpa etọn nu. 23Podọ Gamalieli visunnu Pẹdazuli tọn lọ wẹ tin to awhànpa whẹndo ovi Manasse tọn lẹ lọ tọn nu. 24Podọ Abidani visunnu Gideoni tọn lọ wẹ tin to awhànpa whẹndo ovi Bẹnjamini tọn lẹ lọ tọn nu. 25Awhànsia osla ovi Dani tọn lẹ tọn lọ tọn, he yin godotọ osla lẹpo lọ tọn, dèdo nukọn kẹdẹdi awhànpa yetọn lẹ: Ahiezeli visunnu Amisadai tọn lọ wẹ tin to awhànpa etọn-nu. 26Podọ Pagieli visunnu Oklani tọn lọ wẹ tin to awhànpa whẹndo ovi Aṣeli tọn lẹ tọn lọ tọn nu. 27Podọ Ahila visunnu Enani tọn lọ wẹ tin to awhànpa whẹndo ovi Naftali tọn lẹ tọn lọ nu. 28Le wẹ gbéjizọnlinzìnzìn ovi Islaeli tọn lẹ tọn lẹ yin kẹdẹdi awhànpa yetọn lẹ; yé sọ dèdo nukọn. 29Moṣe sọ dọ hlan Hobabi visunnu Leueli tọn lọ Midianinu lọ, aṣitó Moṣe tọn dọ, Mí zingbéjizọnlinjei otẹn lọ mẹ ehe tọn OKLUNỌ lọ dọmọ, yẹn na na ẹn mì: wá gọ́na mí, míwlẹ bo nasọ wà dagbe na we: na OKLUNỌ lọ ko dọhó dagbe gbọn Islaeli tọn dali. 30Ewọ bo sọ dọ hlan ẹn domọ, Yẹn ma jei gba; ṣigba yẹn na fọnyì jẹ aigba ṣie lọsu ji, podọ jẹ hẹnnumẹ ṣie lẹ de. 31Ewọ sọ dọmọ, A jó mí do blo, yẹn vè we; mimọ le hiẹ yón le mí tin nado dosla to zùngbo lọ mẹ do, hiẹ bo na tin hlan mí to otẹn nukun le tọn mẹ. 32E nasọ yín, eyín hie yì hẹ mí, nugbo, é na yín, dọ dagbe depope OKLUNỌ lọ na wà hlan mí, doponẹ wẹ mí na wà hlan we.

33Yé sọ dèdo nukọn sọn osé OKLUNỌ lọ tọn kòn gbéjizọnlin azán atọ̀n tọn; alki alẹ̀nu OKLUNỌ lọ tọn lọ tọn to gbéjizọnlin azán atọ̀n tọn yì to ye nukọn, nado din gbọjẹ tẹnmẹ de mọ na yé. 34Aslọ OKLUNỌ lọ tọn sọ tin to yé ta to okle, whenuena yé dèdo nukọn sọn osla lọ mẹ.

35E sọ wá jọ, whenuena alki lọ dèdo nukọn, wẹ Moṣe dọmọ, Tite, OKLUNỌ E, bo gbọ kóntọ towe lẹ ni yín vúnvúnvunvun; bo sọ gbọ yé he gbẹwanna we lẹ ni họ̀nyì to nukọn towe. 36Podọ whenuena é gbọjẹ, é sọ dọmọ, Légò, OKLUNỌ È, do fọfọn ao fọtọ́n Islaeli tọn lẹ lọ de.

Currently Selected:

Osọha lẹ 10: BWL23

Highlight

Copy