MATIU 16
16
1FALESI lẹ po Sadusi lẹ po wá, to whiwhle e pọ́n, kanbiọ ẹ nado do ohia de hia yé sọn olọn mẹ 2Ṣigba é gblọn bo dọ hlan yé, dọmọ, Whenuena é jẹ tenu, mìwlẹ na dọmọ, Osàn na yón; na olọn bia wutu. 3Podọ to afọnnu, Osàn na Yín yinylan to egbé: na olọn yín bibia bo sọ súyu góngón wutu. Mì yẹnuwàtọ, mìwlẹ yón nado fọyẹna nukunmẹ olọn tọn: ṣigba mì ma sọgan fọyẹna ohia ojlẹ helẹ tọn? 4Whẹndo ylanylan ayòdetọ de to ohia de din, Ye ma na na ohia depope hlan ẹn gba adavo ohia Jona yẹwhegán tọn. E sọ jo yé dai, bo tón yí. 5Nuplọntọ etọn lẹ wá jẹ awà awetọ ji, yé wọnji nado hen akla.
6Jesu dọ hlan yé domọ, Mi payi, bo sọ nọ hó mìde do oton Falesi lẹ tọn po Sadusi le tọn po go. 7Yé sọ to linlẹn to yede ṣẹnṣẹn, dọmọ, Mìwlẹ ma hen akla wutu wẹ 8Podọ Jesu mimọ en hlan dọmọ, Mì yisepẹvinọ, etẹwutu wẹ mì to linlẹn to mìde ṣẹnṣẹn na mì ma hẹn akla wutu? 9Mì ma mọhlan kavi mì ma sọ flin akla atón gbẹtọ degbadefọtón tọn, podọ oha nẹmu he mì bé pli? 10Kavi akla ṣinawe gbẹtọ degbade tọn, oha nẹmu he mì bé pli? 11Etẹwutu wẹ mì ma mọhlan dọ, yẹn ma dọhó na mì na akla tọn wutu, dọ mì ni payi otón Falesi lẹ tọn po Sadusi lẹ tọn po go gba? 12Whenẹnu wẹ ye tunwun dọ, é ma dosẹ́n na yé nado payi otón akla tọn go gba, adavo do núplónmẹ Falesi lẹ po Sadusi lẹ tọn po go.
13Dinvie whenuena Jesu wá jẹ Sesalea Filippi tọn dali, é kanse nuplọntọ etọn lẹ dọmọ, Mẹnu wẹ gbẹtọ lẹ dọ yẹn, Ovi gbẹtọ ton, yin? 14Yé sọ domọ, Mẹdelẹ dọ, Johanu Baptisti: mẹdelẹ dọmọ, Eli; mẹdele dọ, Jẹlemia, kavi, dopo to yẹwhegán lẹ mẹ. 15E so do hlan yé, dọmọ, Ṣigba mẹnu wẹ mìlẹ do yẹn yín? 16Simoni Pita gblọn bo dọmọ, Hiẹ wẹ Klisti lọ, Ovi Jiwheyẹwhe ogbènọ tọn 17Jesu sọ gblọn bọ dọ hlan ẹn dọ, Donanọ wẹ hiẹ Simọni Bal-jona: na agbasalan po ohùn po ma wẹ ko dè e hia hlan wẹ gba, adavo Oto ṣie he tin to olọn me. 18Podọ yẹn so dọ hlan we ga, dọ, Hiẹ wẹ Pita, podọ ose he ji yẹn na do agùn ṣie do; huhlọn hongbo Kútòmẹ tọn lẹpo ma na pé e go gba. 19Yẹn na sọ na savi ahọludu olọn tọn le tọn we: podọ nudepope hiẹ na tún to aigba ji, na yín túntún to olọn mẹ. 20Whenẹnu wẹ é kóna nuplontọ lẹ lọ dọ yé dọ na mẹde dọ ewọ wẹ Klisti lọ blo. 21Sọn ojlẹ nẹ mẹ wẹ Jesu sè nado didohia hlan nuplọntọ etọn lẹ, le dọ ewọ mananoma yì jẹ Jelusalẹm do, bo jiya onú susu tọn sọn mẹho lẹ po ogan yẹwhenọ lẹ tọn po po wekantọ le po si, bo yín hùhù, podọ to azán atọ̀ntọ gbè yín zize daga. 22Pita sọ yí i, bo sè nado wiwóhẹ ẹ dọmọ Jiwheyẹwhe ní walẹblanu to oji we, Oklunọ: ehe ma na tin hlan we gba. 23Ṣigba é lẹ́godo bo sọ dọ hlan Pita, dọmọ, Tón sọn godo ṣie, Satani: zannuagbali wẹ hiẹ hlan mi: na hiẹ ma hà onú he yín Jiwheyẹwhe tọn gba, adavo onú gbẹtọ tọn lẹ. 24Whenẹnu wẹ Jesu dọ hlan nuplọntọ etọn lẹ, dọmọ, Eyín mẹdepope jlo na hodo mi gbọ e ni mon ede, bo sọ zé satin etọn, bo hodo mi. 25Na mẹdepope he jlo na whlẹn alindọn etọn gan, na hẹn ẹn bu: podọ mẹdepope he na hẹn alindọn etọn bú na yẹn tọn wutu, nasọ mọ ẹn. 26Na eté we gbẹtọ de na do yin alenọ, eyín é duale aihọn pete tọn, bo hẹn alindọn eton siai? kavi etẹwẹ gbẹtọ na na to nadiona mẹ na alindọn etọn? 27Na Ovi gbẹtọ tọn na wá to gigo Otọ́ etọn tọn mẹ, po angẹli etọn lẹ po; whenẹnu we é na suahọ omẹ dopodopo dile azón etọn te. 28Nugbo wẹ yẹn dọ hlan mì, Mẹdelẹ tin to yé mẹhe nọte to ofi lẹ mẹ, he ma na dọ okú pọn to alọdepope mẹ, kaka yé na do mọ Ovi gbẹtọ tọn ja to ahọludu etọn mẹ.
Currently Selected:
MATIU 16: BWL23
Highlight
Share
Copy

Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.