Levitiku 23

1OKLUNỌ lọ so dọhó hlan Moṣe, dọmọ, 2Dọhó hlan ovi Islaeli tọn lẹ, bo dọ hlan yé dọmọ, Osà didè OKLUNỌ lọ tọn le lọ, he mìwlẹ na lá nado yín opli wiwe lẹ, yèdọ ehelẹ wẹ hùnwhẹ dido ṣie le. 3Azán ṣidopo azọ́n na yín wiwà hò: ṣigba sinaw etọ wẹ gbọjẹzán ogbọjẹ ayidego tọn de, opli wiwe de; mìlẹ ma na wà azón hunkọ de tọn gba: gbọjezán de hlan OKLUNỌ lọ wẹ to fininò mìtọn lẹpo me. 4Ehelẹ wẹ hùnwhè dido OKLUNỌ lọ tọn lẹ, yèdo opli wiwe lẹ, he mìlẹ na nọ lá to osã dìdè yetọn me. 5To osùn tintan lọ mẹ, to azán wienẹtọ osùn lọ tọn mẹ to whèjai awe le ṣẹnṣẹn, wẹ juwayi OKLUNỌ tọn lọ. 6Podọ to azán fọtọntọ osùn dopolọ tọn gbé wẹ hùnwhè akla madotónnọ tọn lọ hlan OKLUNỌ lọ: azán ṣinawe mìlẹ na dù akla madotónnọ hò 7To azán tintan lọ mẹ mìlẹ na tindo opli wiwe de: mìlẹ ma na wà azọn ohẹ́kúkú tọn de gba. 8Ṣigba mìlẹ na yí avọ́nunina yè basi gbọn miyọn dali de na hlan OKLUNỌ lọ họ̀ azán ṣinawe: azán sinawetọ wẹ opli wiwe de te; mìlẹ ma na wà azón ohẹ́kúkú tọn de gba.

9OKLUNỌ lo sọ dọhó hlan Moṣe, dọmo, 10Dọhó hlan ovì Islaeli tọn lẹ lọ, bo dọ hlan yé dọmọ, Whenuena mìlẹ yín hinhẹnwa biọ aigba lọ me he yẹn na hlan mì, bo na gbẽn ojijẹ etọn, whenẹnu wẹ milẹ na hẹn okò sinséntìntan lọ tọn lẹ sọn ojijẹ mìtọn mẹ wá yẹwhenọ lọ de: 11ewọ bo na zé okò lọ hia to OKLUNỌ lọ nukọn, nado yín tẹalọyí na mì: to aihọngbe to gbọjẹzán lọ godo wẹ yẹwhenọ lọ na zé e hia. 12To azán he mẹ mì zé okò lọ hia te, wẹ mì na yí lẹngbọsú madazòngo dopo owhè tintan lọ tọn mẹ na avọ́nunina mimẹ̀ de hlan OKLUNỌ lọ 13Podọ avọ́nunina jinulili eton tọn lọ na yin madaotọ efa olinfín dagbedagbe tọn de he yè yi amì do hò, avọ́nunina de yè basi gbọn miyọn dali hlan OKLUNỌ lọ na owán vivi de: podọ avọ́nunina nùnù eton na yín ovẹ̃n tọn, madoẹnẹtọ hinni dopo tọn. 14Podọ mìlẹ ma na dù akla de, kavi gbadó sisọ, kavi gbadófẹ́ kakajẹ azán dopo he lọ gbè, kaka mìlẹ ko do hẹn avọ́nunina Jiwheyẹwhe mìtọn tọn lọ wá: aṣẹdai de wẹ kakadoi gbọn whẹndo mìtọn lẹ mẹ to fininọ̀ mìtọn lẹpo mẹ.

15Mìlẹ bo nasọ ma hlan mì sọn osò lọ to gbọjẹzán lọ godo, sọn azán he gbè mì hẹn okò avọ́nunina zehia tọn lọ wá; gbọjẹzán ṣinawe na yin vivò finẹ: 16yèdọ jẹ osò to gbọjezán sinawetọ lọ godo wẹ mìlẹ na yísọhana azán kandeao; mì bo nasọ yí avọ́nunina jinulili yọ́yọ́ de tọn na hlan OKLUNỌ lọ. 17Mìwlẹ na hẹn aklamimlin awe zéhia tọn jẹgbonu sọn onọtẹn mìtọn lẹ mẹ wá sọn madaotọ awe efa dopo lọ tọn mẹ; yé na yín sọn olinfin dagbedagbe mẹ, yè na yí otón do só yé, na sinséntintan lẹ hlan OKLUNỌ lọ, 18podọ mì na na lẹngbọvú ṣinawe madazọ̀ngo owhè tintan lọ tọn po akla lọ po, po oyìnsúvu dopo po, po agbo awe po: yé na yín avọ́nunina mimẹ̀ de hlan OKLUNỌ lọ, po avọ́nunina jinulili yetọn po, po avọ́nunina nùnù yetọn lẹ po, yèdọ avọ́nunina yè basi gbọn miyọn dali de, owan vivi de tọn hlan OKLUNỌ lọ. 19Mìwlẹ nasọ yí alunkùn dopo na na avọ́nunina ylando de tọn, po agbòvú owhè tintan tọn awe po na avọ́sánnu avọ́nunina jijọho ton lẹ. 20Yẹwhenọ lọ nasọ zé yé hia po akla sinséntintan lẹ lọ tọn po na avọ́nunina zizéhia de to OKLUNỌ lọ nukon po lẹngbọvú awe po: yé na yín wiwe hlan OKLUNỌ lọ na yẹwhenọ lọ. 21Mìwlẹ nasọ basi hlá to azán doponẹ lọ gbè; opli wiwe de na tin finẹ hlan mì: mìlẹ ma na wà azọ́n ohékúkú tọn de: aṣẹdai de wẹ kakadoi to fininọ̀ mìtọn lẹpo mẹ gbọn whẹndo mìtọn lẹ mẹ.

22Whenuena mì gbẹ̀n ojijẹ aigba mìtọn tọn, hiẹ ma na gbọn olọnglọnẹn ogle towe tọn lẹ pete, mọ hiẹ ma na bẹ́ owelu ojijẹ towe tọn pli gba: hiẹ na jó yé do na wamọnọ lọ, podọ na ojónọ lọ: yẹn wẹ OKLUNỌ lọ Jiwheyẹwhe mìtọn.

23OKLUNỌ lọ sọ dohó hlan Moṣe, dọmọ, 24Dọhó hlan ovi Islaeli tọn lẹ lọ, dọmọ, To osùn sinawetọ lọ mẹ, to azán tintan osùn lọ tọn mẹ, na yín ogbọjẹ ayidego de hlan mì, oflinnú kúnkún opèn lẹ tọn de, opli wiwe de. 25Mìwlẹ ma na wà azón ohékúkú tọn de: mìwlẹ nasọ yí avọ́nunina de yè basi gbọn miyọn dali na hlan OKLUNỌ lọ.

26OKLUNỌ lọ sọ dọho hlan Moṣe, dọmọ, 27Gãnṣo to azán aotọ osùn sinawetọ he tọn gbè wẹ azán ovẹ̀se tọn: é na yín opli wiwe de hlan mì, mìwlẹ nasọ bianukunna alindọn mìtọn lẹ; mí nasọ yí avọ́nunina yè basi gbọn miyọn dali de na hlan OKLUNỌ lọ. 28Mìwlẹ ma na wà azón hunkọ de tọn to azán doponẹ lọ gbè gba: na azán ovẹ̀se tọn de wẹ, nado basi ovẹ̀se na mì to OKLUNỌ lọ Jiwheyẹwhe mìtọn nukọn. 29Na alindọn depope é yín he ma na yín nukunbiana to azán doponẹ gbè gba, é na yin sinsán sẹ́ sọn omẹ etọn lẹ ṣẹnṣẹn. 30Podọ alindọn é yín he wà azón hunkọ de tọn to azán doponẹ gbè, alindọn nẹ wẹ yẹn na súdo sọn omẹ etọn lẹ ṣẹnṣẹn. 31Mìwlẹ ma na wà azọn hunkọ de tọn gba: asẹdai kakadoi de wẹ gbọn whẹndo mìtọn lẹ me to fininò mìtọn lẹpo mẹ. 32E na yín gbọjẹzán ayidego tọn de hlan mì, mì bo nasọ bianukunna alindọn mìtọn lẹ: to azán sinẹnnẹtọ osùn lọ tọn mẹ to whèjai sọn whèjai jẹ whèjai, wẹ mì na nọ payi gbọjẹzán mìtọn go.

33OKLUNỌ lọ sọ dọhó hlan Moṣe, dọmọ, 34Dọhó hlan ovi Islaeli tọn lẹ lọ, dọmọ, To azán fọtọ̀ntọ osùn sinawetọ he tọn wẹ hùnwhẹ́ oflò lẹ tọn gbè na azán ṣinawe hlan OKLUNỌ lọ. 35Azán tintan lọ gbè na yín opli wiwe de: mìlẹ ma na wà azọ́n ohékúkú tọn de gba. 36Azán ṣinawe mì na yí avọ́nunina yè basi gbọn miyọn dali de na hlan OKLUNỌ lọ: azán ṣinatóntọ na yín opli wiwe de gbè hlan mì; mìlẹ bo nasọ yí avọ́nunina yè basi gbọn miyọn dali de na hlan OKLUNỌ lọ: hùnwhẹ́ titlọ de wẹ; mìwlẹ ma na wà azọn ohékúkú tọn de gba.

37Ehelẹ wẹ hùnwhẹ́ dido OKLUNỌ lọ tọn lẹ, he mìlẹ na lá nado yín opli wiwe lẹ, nado yí avọ́nunina yè basi gbọn miyọn dali de na hlan OKLUNỌ lọ, avọ́nunina mimẹ̀ de, po avọ́nunina jinulili tọn de po, avọ́sánnu de, avọ́nunina nùnù lẹ, dopodopo to azán etọn lọsu gbè: 38dogó gbọjezán OKLUNỌ lọ tọn lẹ, podọ dogọ nunina mìtọn lẹ, podọ dogó opadido mìtọn lẹ lọ lẹpo, podọ dogọ́ avọ́nunina ojlomẹtọn mìtọn lẹ lọ lẹpo, he mì na hlan OKLUNỌ lọ.

39Gãnṣo to azán fọtọ̀ntọ osùn sinawetọ lọ tọn gbè, whenuena mì ko bẹ́ sinsẹ̀n aigba mìtọn tọn lẹ pli wá whégbè, mì na payi hùnwhẹ́ OKLUNỌ lọ tọn go hò azán ṣinawe: azán tintan na yín ogbọjẹ ayidego de tọn gbè, podọ azán sinatòntọ nasọ yín ogbọjẹ ayidego de tọn gbè. 40Podọ míwlẹ na yí na mìde to azán tintan lọ gbè sinsẹ̀n atin dagbedagbe lẹ lọ tọn òdepá òdetin lẹ tọn lẹ, po alà atin titli tọn lẹ po, po ofán otọ̀pa tọn lẹ po: miwlẹ naso jaya to OKLUNỌ lọ Jiwheyẹwhe mìtọn nukọn hò azán ṣinawe. 41Mìlẹ nasọ payi e go na hùnwhẹ́ de hlan OKLUNỌ lọ hò azán ṣinawe to owhè lọ mẹ: asẹdai de wẹ kakadoi to whẹndo mìtọn lẹ mẹ: osùn sinawetọ mẹ wẹ mì na nọ payi e go. 42Oflo lẹ mẹ mì na nò azán ṣinawe; yé he yín owhevi to Islaeli mẹ lẹpo na nò oflò lẹ mẹ: 43dọ whẹndo mìtọn lẹ nido yọnẹn dọ yẹn hẹn ovi Islaeli tọn lẹ nado nọnó oflò lẹ mẹ, whenuena yẹn hẹn yé jẹgbonu sọn aigba Egipti tọn lọ mẹ wá: yen wẹ OKLUNỌ lọ jiwheyẹwhe mìtọn. 44Moṣe sọ dọ hùnwhẹ́ dido OKLUNỌ lọ tọn lẹ lọ hlan ovi Islaeli tọn lẹ.

Currently Selected:

Levitiku 23: BWL23

Highlight

Copy