JẸLEMIA 5

1MI hònwezun yinukọn yìgodo gbọn alihogbo Jeluaalẹm tọn lẹ mẹ luntòn, bo pọ́n dinvie, bo sọ yọnẹn, bo sọ dinpé to otẹn gbigblo etọn lẹ mẹ, eyín mi sọgan mọ sunnu de, eyín depope tin finẹ he to dódó wa, he to nugbowà din; Yẹn bo na sọ jona ẹn. 2Yin yé tlẹ nọ dọmọ, Le OKLUNỌ togbẹ̀; lalo wẹ yé do to whiwhle nugbonugbo. 3OKLUNỌ E, bé nukun towe lẹ ma to nugbowà pọ́n? hiẹ ko linú yé, gãnṣo yé ma yín homegblenọ; hiẹ ko fiọ yẹ, gãnṣo yé ko gbẹ́ nado mọ oplọn yí: Yé ko hẹn nukunmẹ yetọn lẹ sinyẹn hú osé de; yé ko gbẹ́ nado diọkọ. 4Whenẹnu wẹ yẹn domọ, Wamọnọ wẹ ehelẹ nugbonugbo: oklenọ wẹ yé: na yé ma yòn aliho OKLUNỌ tọn, kavi whẹ̀dida Jiwheyẹwhe yetọn tọn. 5Yẹn na hẹn dẽ jẹ omẹ kiklo lẹ de, bo na dọhó hlan yé; na yé yòn aliho OKLUNỌ tọn, po whẹ̀dida Jiwheyẹwhe yetọn tọn po. Ṣigba ehelẹ ko yí okọndo dopo do wẹ́n oglepọ̀nu lọ, bo sọ tlu ogàn lẹ. 6Enẹwutu wẹ kinnikinni de sọn nukàn mẹ na hú yé, ohia aigba kukú ji tọn de na hẹn yé gble, opò de na nọ hò tòdaho yetọn lẹ, omẹ depope he tọ́n yì sọn finẹ na yín tintlẹn do flinflin: na oylando yetọn lẹ yín susu wutu, podọ agòjijo yetọn lẹ yín jideji. 7Nawẹ yẹn na jona we do? ovi towe lẹ ko gbẹ́ mi dai, bo nọ whle gbọn yé he ma yín yẹwhe lẹ de dali: whenuena yẹn hẹn yé whle, yé dèayọ, bo sọ pli yede to opònọ mẹ do owhé ogàlọtọ lẹ tọn gbè. 8Yé tin di osò yìnyìn lẹ bo to sàdè pó: omẹ dopodopo to wantun hodo asi kọmẹnu etọn tọn. 9Bé yẹn ma na dlapọ́n na onú helẹ̃? wẹ OKLUNỌ dọ: bé alindọn ṣie má na yín ahọsuyítọ to akọta mọnkọ di ehe go?

10Mì hẹji yì adó etọn lẹ ji, bo và; ṣigba mì basi opodo gigọ̀ de blo: dè alà etọn lẹ sẹ̀: na ye ma yín OKLUNỌ tọn gba 11Na owhé Islaeli tọn po owhé Juda tọn po ko yí odanú susu do zán do ogo e, wẹ OKLUNỌ dọ 12Yé ko mọ̀n OKLUNỌ, bo dọmọ, E ma yín ewọ gba; mọ oylan ma to mí ji na wá gba; mọ mìwlẹ ma to ohi kavi hùvẹ́ na mọ: 13yẹwhegán lẹ na lẹzùn ojẹhọn, ohó lọ ma tin to yé mẹ gba: le wẹ é na yín wiwà hlan yé do. 14Enẹwutu le wẹ OKLUNỌ dọ, Jiwheyẹwhe awhanpa lẹ tọn, Na mìwlẹ dọ ohó he wutu, dayi e go, yẹn na hẹn ohó ṣie lẹ tò onù towe mẹ zùn mìyọn, podọ omẹ he lẹ onake, é bo na sọ dù yé súdo. 15Pọ́n, yẹn na hẹn akota de wá mì ji sọn aganu, Mì owhé: Islaeli tọn emi, wẹ OKLUNỌ dọ: akọta linsinyentọ de wẹ, akota hóhótọ de wẹ, akọta de ogbè mẹhetọn hiẹ ma yọnẹn, kavi tùnwun nuhe yé to didọ. 16Ogágò yeton wẹ olídò hùnhùn de, gbẹtọ hlọnhlọnnọ wẹ yé mẹpó. 17Yé na sọ dù ojijẹ towe lepo, po aklẹ towe po, ehe visunnu towe lẹ po viyọnnu towe lẹ po do dù: yé na dù lẹngbọpa towe lepo po kanlinpa towe lẹ po: yé na dù ovẹ́ngle towe lẹ po ovotìn towe lẹ po: yé na dohẹn tòdaho dokọnọ towe lẹ, ehe go hie dotudo, po ohi towe po. 18Ṣigba yèdọ to azán nẹlè mẹ, OKLUNỌ dọ, Yẹn ma na basi opòdo gigọ́ de to mì de gba. 19E na sọ wá jọ, whenuena mìwlẹ na dọmọ, Etẹwutu wẹ OKLUNỌ Jiwheyẹwhe mítọn ko wà onú he lẹpo hlan mí? whenẹnu wẹ hiẹ na dọ hlan yé dọ, Taidi le mìwlẹ gbé mi, bo to yẹwhe jonọ lẹ sèn to aigba mitọn mẹ, mọwẹ mì na sọ nọ sèn ojonọ lẹ to aigba de mẹ he ma yín mitọn.

20Mì dọ ehe tọ́n to owhé Jakob tọn gbè, bo sọ dèmisẽluna en to Juda mẹ, dọmọ, 21Sè ehe dinvie, Mì gbẹtọ oklenọ emi, podọ matin ayiha; he tindo nukun lẹ, bo ma mọná; he tindo otọ́ lẹ, bo ma sènú: 22Mìwlẹ ma dibusi mi? wẹ OKLUNỌ dọ: bé mìwlẹ ma na sisọ to nukọn ṣie, he ko dotẹnna otòkẹn na agbó ohú tọn, aṣẹdoai madopodo de he ma sọgan gble? Yín agbówhẹn etọn lẹ tlẹ to yéde zédlan, gãnṣo yé ma sọgan yla ẹ gba; yín yé tlẹ to gbigbó, gãnṣo yé ma sọgan jugbọn e ji yì gba. 23Ṣigba omẹ he lẹ tindo ayiha atẹnọ de po tasinyẹnnọ de po; yè hẹn yé ṣiatẹ bo sọ yì. 24Mọ yé ma sọ dọ to ayiha yetọn mẹ dọ, Gbọ mí ni dibusi OKLUNỌ Jiwheyẹwhe mítọn to dinvie, he to ojikun namẹ, nukọntọn po godotọn po, to osã etọn mẹ; he to osè didè ojije tọn lẹ hladai hlan mí. 25Oylanwà mitọn lẹ ko lé onú helẹ, podọ ylando mitọn lẹ ko hẹn dagbe dote sọn mì de. 26Na omẹ ṣie lẹ ṣẹnṣẹn wẹ yè mọ omẹ ylankan lẹ te: yé to hihó, di ohwletọ lẹ to owu mẹ; yé do omò de, yé wle gbẹtọ lẹ. 27Le ohèja de tin gó na ohè lẹ do, mọ wẹ owhé yetọn lẹ gó na oklọ do: enẹwutu wẹ yé do lẹzùn kiklo, bo sọ wàdọkun. 28Yé tin dojo, yé sisé: mọwẹ, yé pèvè to owàlọ kanyinylan tọn lẹ mẹ: yé ma yí owhẹhó lọ dọ gba, owhẹ̀hó tóṣiọvi lẹ tọn, na yé na do dùale: podọ ojlọjẹ agbátọnọ lẹ tọn wẹ yé ma dawhèna gba. 29Bé yẹn ma na dlapọ́n na onú helẹ? wẹ OKLUNỌ dọ: bé alindọn ṣie ma na yín ahọsuyitọ to akọta mọnkọ de di ehe go?

30Àwujiji po obudaho po wẹ yè hẹn wá jọ to aigba lọ mẹ; 31yẹwhegán lẹ to dọdai lalo dọ, yẹwhenọ lẹ to gándù to alọ yetọn lẹ mẹ; omẹ ṣie lẹ sọ jlo na tindo e do mọ: etẹ́ wẹ mì na wà to opòdo etọn mẹ?

Currently Selected:

JẸLEMIA 5: BWL23

Highlight

Copy

Compare