ISAIA 60

1FON, họ́nun; na hinhọ́n towe wá, gigo OKLUNỌ tọn to ogo we. 2Na dayi e go, zinvlu ṣinyọn aigba ji, zinvlu gọ́ngọ́n? ṣinyọn gbẹtọ lẹ: ṣigba OKLUNỌ na fọ́n to oji we, yè na sọ mọ gigo etọn to ogo we. 3Kosi lẹ na wá hinhọ́n kọ̀n, podọ ahọlu lẹ do hinhọ́n zizẹ́ towe kòn. 4Zé nukun towe doaga lẹ́do, bo pọ́n, yé omẹ pó bẹ́ yéde plidopọ, yé wá de we; visunnu towe lẹ na sọn ofi dindẹn wá, yè na sọ pọ́n ovi yọnnu towe lẹ go to adaja towe mẹ. 5Whenẹnu wẹ hiẹ na mọ, bo sọ sàplidopọ, ayiha towe na dibu, bo sọ zùn daho; na yè na diọkọna adọkun susu ohù tọn hlan we, huhlọn Kosi lẹ tọn na wá de we. 6Susugege kanklosọ-póawenọ lẹ na ṣinyọn oji we, kanklosọ-pódoponọ Madiani po Efa po tọn; yé omẹ pó na sọn Seba wá: yé na hẹn sika po nuwhẹnkun po wá; yé na do pipa OKLUNỌ tọn hia do gbonu. 7Yè na bẹ́ lẹngbọpa Kedali tọn lẹpo plidopọ do de we, agbò Nebajọti tọn lẹ na dù mẹdagun na we: yé na hẹ́ agba, ṣie ji wá po alọkẹyi po, yẹn na sọ pàgigona ohò gigo ṣie tọn. 8Mẹnu wẹ ehe to zìnzlọn di aslọ helẹ, podọ di awhànnẹ do họ̀nu yetọn mẹ. 9Nugbo olopo lẹ na nọtepọ́n mi, ohún Talsisi tọn lẹ whẹ, nado hẹn ovi towe lẹ sọn aganu wá, fataka yetọn podọ sika yetọn po yé po, na oyín OKLUNỌ Jiwheyẹwhe towe tọn, podọ na Omẹ Wiwe Islaeli tọn, na ewọ ko pagigona we wutu. 10Ovi jonọ lẹ tọn na dó odòkọ towe yì aga; ahọlu yetọn lẹ na to lizọnyí na we: na homẹgble ṣie mẹ wẹ yẹn linú we, aigba to ojọmiọn ṣie mẹ wẹ yẹn wàlẹblanuna we. 11Enẹwutu hòngbo towe na tin to hùnhùn to whepoponu: yè ma na sú yé to okle kavi to ozán mẹ; na gbẹtọ lẹ nido hẹn huhlọn Kosi lẹ tọn wá de we, podọ na yè nido hẹn ahọlu yetọn lẹ wá. 12Na akọta po ahọludu po he ma na sẹ́n we na dọ̀n; nugbo, akọta nẹlẹ yè na gbà yé kija gbidigbidi. 13Gigo Libani tọn na wá de we, atin kyple tọn, atin olme tọn, po buisi tọn po dopọ nado doasọna otẹn ofiwiwe ṣie; yẹn na sọ hẹn otẹn afọ ṣie tọn zùn gigonọ. 14Ovi sunnu yé he bianukunna we lẹ tọn ga na wá de we to taliai mẹ; yé he ko to vivlẹ we lẹpo wẹ na litaina we to afọpáhomẹ towe go; yé na ylọ we, dọ Otò OKLUNỌ tọn, Ziọni Omẹ Wiwe Islaeli tọn tọn. 15Ṣigba le yè gbẹ́ we dai, bọ yè sọ gbẹ́wanna we, sọmọ bọ mẹdepope ma ju gbọn ṣẹnṣẹn towe, yẹn na hẹn we zùn yẹyi madopodo de, ayajẹ whẹndo susu tọn de. 16Hiẹ na nù yìnnọ́ Kosi lẹ tọn, bo sọ nọ́ anọ́ ahọlu lẹ tọn: hiẹ na sọ yọnẹn dọ yẹn OKLUNỌ wẹ Whlẹngántọ towe, Omẹ asuka Jakob tọn lọ. 17To otẹn gànvẹ tọn mẹ yẹn na hẹn sika wá, to otẹn ogànyú tọn mẹ, yẹn na hẹn fataka wá, to otẹn atin tọn mẹ, ogànvẹ̃, to otẹn osé tọn mẹ, ogànyú: yẹn na basi ogán towe lẹ na jijọho, podọ azọ́ngán towe lẹ na dódó. 18Yè ma na sè owàlọ yinylan to aigba towe ji bà, gbàkija kavi dindọ̀n to dali towe: aigba hiẹ na ylọ odòkọ towe dọ, Whlẹngán, podọ ohọ̀ngbo towe dọ, Pipa. 19Owhè ma na yín hinhọ́n towe to okle bà, mọ osùn ma na yí hinhọ́n etọn hia we bà: aigba OKLUNỌ na yín hinhọ́n madopodo towe de, Jiwheyẹwhe towe gigo towe. 20Owhè towe ma na biọ bà: mọ osùn towe ma na yì zinvlu mẹ bà, na OKLUNỌ na yín hinhọ́n madopodo towe, azán awubla towe tọn lẹ na jẹ pòdo. 21Omẹ towe lẹpo na yín dódónọ: yé na dugú aigba lọ tọn kakadoi, alà núdido ṣie tọn, azọ́n alọ ṣie tọn, na yè nido pàgigona mi. 22Ómẹ vude na lẹzùn fọtọ́n, omẹ pẹvi dopo akọta huhlọnnọ: yẹn OKLUNỌ na basi i do gànji to ojlẹ etọn mẹ.

Currently Selected:

ISAIA 60: BWL23

Highlight

Compare

Copy