HOSEA 9

1A jaya blo, hiẹ Islaeli, hlan zizé daga taidi akọta lẹ; na hiẹ ko lọgà de yì sọn Jiwheyẹwhe towe de, hiẹ ko yiwanna padidà to gbadógba lẹpo ji. 2Ogbadógba lọ po vẹ̃nfinọnnú lọ po ma na yìn yé gba, podọ ovẹ̃n yọ́yọ́ na dẹ́n ewọ. 3Yé ma na nò aigba OKLUNỌ tọn lọ mẹ gba; ṣigba Éflaimi na lẹ́gọ̀ do Egipti, yé na sọ dù núdùdù mawé to Asilia mẹ. 4Yé ma na kòn avọ́ nunina ovẹ̃n tọn lẹ jẹgbonu hlan OKLUNỌ gba, mọ avọ̀sánnu yetọn lẹ ma na yín homẹhùnnú hlan ẹn gba: akla yetọn na tin hlan yé di akla awublanọ lẹ tọn; yé mẹhe dù sọn e mẹ lẹ na yín fuflu; na akla yetọn na tin na nugbòtọ́n yetọn; é ma na wá biọ ohọ̀ OKLUNỌ tọn mẹ gba. 5Eté mìwlẹ na wà to azán obẹ́pli ayidego tọn lọ mẹ, to azán ohùnwhẹ OKLUNỌ tọn tọn lọ mẹ? 6Na, pọ́n, yè hẹn yé yì sọn Vivà mẹ, gãnṣo Egipti na ṣinyan yé pli, Mẹmfìsi na di yé onú dagbe yetọn fataka tọn lẹ, atinunnọ lẹ na yí ye na nutindo: oun lẹ na tin to gohọ̀ yeton lẹ mẹ. 7Yè hẹn azán odlapón tọn lẹ wá, yè hẹn azán ahọsu tọn lẹ wá, Islaeli na yọ́n ẹn: OKLUNỌ de wẹ yẹwhegán lọ, nulunọ wẹ dawe lọ he tindo gbigbọ lọ, na ogégé oylanwà towe tọn, podọ na daho wẹ okẹ̀n lọ wutu. 8Eflaimi họ́nú to núhọtọ de ji hẹ Jiwheyẹwhe; na yẹwhegán lọ tọn, omọ̀ hẹ̀hùtọ de tọn tin to aliho etọn lẹpo mẹ, po okẹ̀n po to ohọ̀ Jiwheyẹwhe etọn tọn mẹ. 9Yé kó gble yéde susususu, di to azán Gibea tọn lẹ mẹ: ewọ naflin oylanwà yetọn, ewọ na sọ dla ylando yetọn lẹ pọ́n. 10Yẹn mọ Islaeli taidi ovẹnsìnsẹ́n lẹ to zùngbo mẹ; yẹn sọ mọ otọ́ mìtọn lẹ di bìbiatintan to ovotin lọ mẹ to osã etọn tintan mẹ: ṣigba yé wá jẹ Baali-peọli, bo klan yéde dovo hlan owinyan, bo sọ lẹzùn osùnú taidi enẹ hé yé yiwanna. 11Na Eflaimi tọn; gigo yetọn na zlọn yì taidi ohẹ̀ de: sọn oho dido whenu, podọ sọn oho mẹ, kaka jẹ jiji whenu etọ́n. 12Yín yé tlẹ pọ́n ovi yetọn lẹ whẹ́n gãnṣo yẹn na fọ̀ yé, na yè ma na pò omẹ dẽ dai finẹ gba: mọwẹ, dindọn hlan yé ga whenuena yẹn fọ́nyì sọn yé de! 13Yè do Eflaimi to otẹn dagbedagbe de mẹ, taidi le yẹn ko mọ Tile do: ṣigba Eflaimi na hẹn ovi etọn lẹ jẹgbonu wá jẹ hùhùtọ lọ de. 14Na yé, OKLUNỌ E: etẹ́ hiẹ na na? na adọ̀ hòkìnkòn tọn de yé po anọ́ húhú lẹ po. 15Yinylan yetọn lẹpo tin to Gilgali mẹ; na finẹ wẹ yẹn gbẹwanna yé te: na yinylan wiwà yetọn lẹ tọn tọn wutu yẹn na yàn yé sọn ohọ̀ ṣie mẹ: yẹn ma na yiwanna yé ba gba; atẹsitọ wẹ ahọvi yetọn lẹpo. 16Yè hò Eflaimi, yè hẹn adọ̀ yetọn hú, yé ma na hẹn sinsẹ́n de gba: mọwẹ, yín yé tlẹ jẹgbonu wá, gãnṣo yẹn na hù sinsẹ́n yiwanna adọ̀ yetọn tọn lọ. 17Jiwheyẹwhe ṣie na zé yé dlangbé, na yé ma tuntóai hlan ẹn wutu; Yé na sọ yín dindanpétọ to akọta lẹ ṣẹnṣẹn.

Currently Selected:

HOSEA 9: BWL23

Highlight

Copy

Compare