EZEKIELI 47

1E sọ hen mi wá godo jẹ ohọ̀n ohọ̀ lọ tọn kọ̀n; bo dayi e go, osìn lẹ to vivi jẹgbonu sọn oglọ họ̀ntònu ohò lọ tọn mẹ hlan whèzẹtẹn dali, na onukọn ohọ̀ lọ tọn tin hlan whèzẹtẹn dali: osìn lẹ sọ jẹte sọn oglọ wà, sọn adà adusi ohọ̀ lọ tọn mẹ, to huwàji agbà lọ tọn go. 2Whenẹnu wẹ ewọ sọ hẹn mi gbọn aliho họngbo agewàji dali tọn ji jẹgbonu wá, bo plan mi lédo gbọn aliho gbonu jẹ họngbo gbonutọn ji, gbọn aliho họngbo he pọ́n hlan whèzẹtẹn dali tọn ji; bo dayi e go, osìn lẹ to sisa jẹgbonu to awà adusi ji. 3Whenuena dawe lọ jẹgbonu yì whèzẹtẹn dali po okàn lọ po to alọ etọn mẹ, é jlẹ awàgbà fọtọ́n dopo, é sọ hẹn mi nado ju gbọn osìn lẹ lọ mẹ wáyi, osìn he tin jẹ afọgomẹ lẹ. 4E sọ jlẹ fọtọ́n dẽvo, bo hen mi nado ju gbọn osìn lẹ lọ mẹ wáyi, osìn lẹ he tin jẹ okligonu lẹ. E sọ vó fọtọ́n dẽvo jlẹ, bo hẹn mi nado ju gbọn osìn lẹ lọ mẹ wáyi, osìn lọ tin jẹ adàmẹ. 5Hlangodo é sọ jlẹ fọtọ́n dopo; é bo sọ yín otò de he yẹn ma sogan ju gbọn e mẹ wáyi: na yè to osìn lẹ lọ hẹn fọ́n, osìn lẹ nado nọ linsìn to e mẹ, otò he yè ma sọgan gbigbopla. 6Ewọ sọ dọ hlan mi dọ, Visunnu gbẹtọ tọn, hiẹ ko mọ ehe? whenẹnu wẹ é sọ hẹn mi wá, bo hẹn mi nado lẹ́gọ̀ jẹ otónu otò lọ tọn. 7Dinvie whenuena yẹn ko lẹ́gọ̀, dayi e go, atin susu tin to otónu otọ̀ lọ tọn to adà ode ji podọ to awetọ ji. 8Whenẹnu wẹ é dọ hlan mi dọ, Osìn helẹ sà jẹgbonu hlan agbègbè whèzẹtẹn tọn dali, bo na jẹte yì biọ Àlaba mẹ: yé bo na sọ sọkọ̀ yì ohù dali; ohù mẹ wẹ osìn lẹ lọ he yè hẹn nado to sisà jẹgbonu na biọ yì; yè bo na sọ hẹnazọngbọna osìn lẹ lọ. 9E na sọ wá jọ, dọ núdida gbẹ̀te dopodopo he to sìnlìn, to otẹn fie otò awe lẹ wá lẹpo mẹ, na nọgbẹ̀; ogégé susu talala owhèvi lọ tọn de na sọ tin to finẹ: na yè hẹn osìn helẹ wá finẹdali, na onú lẹpo nido yín azọ̀nhẹngbọna bo sọ nọgbẹ̀, onú lẹpo na sọ nọgbẹ̀ to fidepope otọ̀ lọ wá. 10E na sọ wá jọ, dọ owhèvi lọ na ṣite to e go: sọn Ẹni-gẹdl mẹ yèdọ jẹ Ẹni-ẹglaimi na yín otẹn de na dindlẹn odọ̀ lẹ tọn; owhèvi yetọn lẹ na tin kẹdẹdi hùnkọ yetọn lẹ, di owhèvi ohù daho tọn lẹ, susu pọ́gégé. 11Ṣigba otẹn ogbọ̀n etọn tọn lẹ po ogbàmẹ etọn lẹ po, wẹ yè ma na hẹnazọ̀ngbọna gba; yè na jó e na ojẹ̀. 12Podọ to otò lọ go to otónu etọn ji, to adà he ji podọ to adà nẹ ji, wẹ atin lẹpo na wú te na núdùdù, amà ehetọn ma to na yé, mọ sinsẹ́n etọn ma to na pòali: é na nọ hẹn sinsẹ́ntintan lẹ jẹgbonu wá, na osìn etọn lẹ to sisa sọn fiwiwe mẹ wutu: sinsẹ́n etọn bo na sọ tin na núdùdù, podọ amà etọn na azọ̀nhẹngbọ.

13Le wẹ OKLUNỌ Jiwheyẹwhe dọ: Ehe wẹ na yín olẹ́do lọ, he míwlẹ na do má aigba lọ na ogú kẹdẹdi owhèndo Islaeli tọn wiawe lẹ: Josẹfu na tindo mimá awe. 14Mìwlẹ na sọ yí i do dùgú, mẹde kedẹdi mẹawetọ; na enẹ yẹn zé alọ ṣie daga nado na ẹn hlan otọ́ mìtọn lẹ: aigba he bo na sọ flẹ jẹ mì de na ogú. 15Ehe wẹ na sọ yín olẹ́do aigba lọ tọn: to adà agéwaji tọn ji, sọn ohù daho lọ mẹ, to aliho Hẹtlọni tọn dali, jẹ bibiọ whégbè Zedadi tọn ji; 16Hamati, Belota, Siblaìmi, he tin to olẹ́do Damasku tọn po olédo Hamati tọn po ṣẹnṣẹn; Hazelihatikọni, he tin to olẹ́do Haulani tọn dali. 17Podọ olẹ́do lọ sọn ohù lọ mẹ na yín Hazali-enọni to olẹ́do Damasku tọn kọ̀n, podọ to agewàji hlan agéwaji dali wẹ olẹ̀do Hamati tọn. Ehe wẹ adà agewàji tọn. 18Podọ adà whèzẹtẹn tọn, to Haulani po Damasku po ṣẹnṣẹn po Gileadi po, po aigba Islaeli tọn po, na yín Jọdani; sọn olẹ́do agéwaji tọn jẹ ohù whèzẹtẹn tọn ji wẹ mì na jlẹ. Ehe wẹ adà whèzẹtẹnji tọn. 19Podọ adà huwaji tọn hlan huwaji dali na tin sọn Tamali me kakajẹ osìn Mẹlibotikadeṣi tọn lẹ kọ̀n, jẹ otọ̀pẹ́ṣẹ́ Egipti tọn kòn, jẹ ohù daho lọ kọ̀n. Ehe wẹ adà huwàji tọn hlan huwàji dali. 20Podọ adà whèyihọ tọn na yín ohù daho lọ, sọn olédo huwàji lọ tọn kakajẹ titegbè bibiọ Hamati mẹ tọn Ehe wẹ adà whèyihọji tọn. 21Mowẹ míwlẹ na má aigba he do hlan mì kẹdẹdi owhẹ̀ndo Islaeli tọn wiawe lẹ. 22E na sọ wá jọ, dọ mì na má ẹn gbọn vodidè dali na ogú de hlan mì podọ hlan ojonọ he wáwaṣi to mì ṣẹnṣẹn lẹ, he na dè ovi lẹ tọ́n to mì ṣẹnṣẹn; yé na sọ tin hlan míwlẹ di ojidowhé to ovi Islaeli tọn lẹ ṣẹnṣẹn; yé na tindo ogú po mì po to owhẹ̀ndo Islaeli tọn lẹ ṣẹnṣẹn. 23E na sọ wá jọ, dọ owhèndo he mẹ ojonọ wáwáṣi te finẹ wẹ mì na na ogú etọn ẹn te, wẹ OKLUNỌ JIWHEYẸWHE dọ.

Currently Selected:

EZEKIELI 47: BWL23

Highlight

Copy

Compare