EZEKIELI 46

1LE wẹ OKLUNỌ JIWHEYẸWHE dọ: Họngboji otògùn homẹtọn tọn he pọ̀n hlan whèzẹtẹn dali na tin súsú azán ṣidopo azọ́nwà tọn lẹ mẹ; ṣigba to ogbọjẹzán ji é na yín hùnhùn, podọ to azán osùn yọ́yọ́ lọ na yin hùnhùn, 2Podọ ahọvi lọ na gbọn aliho awánu họngboji gbonu tọn tọn mẹ biọwhégbè, bo na ṣite to odòtin họngbo lọ tọn dali, yẹwhenọ lẹ na sọ wleawu avọ̀ nunina mìmẹ etọn etọn po avọ̀ nunina jijọho tọn etọn lẹ po, ewọ na sọ litai to ohọ̀ntònu họngbo lọ tọn ji; whenẹnu wẹ ewọ na jẹgbonu yì: ṣigba họngbo lọ ma na yín súsú kakajẹ whèjai. 3Gbẹtọ aigba lọ ji tọn lẹ na sọ nọ Titái to ohọ̀n họngbo nẹ tọn go to OKLUNỌ nukọn to gbọjezán lẹ mẹ podọ to osùn yọ́yọ̀ lẹ mẹ. 4Podọ avọ́ nunina mimẹ̀ tọn he ahọvi lọ na do sánvọ́ hlan OKLUNỌ na yín to gbọjẹzán lọ mẹ lẹngbọvú ṣidopo matin azọ̀n po agbò dòpo po matin azọ̀n; 5podọ avọ́ nunina jinulili tọn lọ na sọ yín ẹfa dopo na agbò dopo, podọ avọ̀ nunina jinulili tọn lọ na lẹngbọvú lẹ dole ewọ tin sọgan nado na do, po hini amì tọn dopo po hlan ẹfa dopo. 6Podọ to azán osùn yọ́yọ́ lọ tọn mẹ é na yín oyìnsú winyanwinyan dopo matin azọ̀n; po lẹngbọvú ṣidopo po, po agbò dopo po; yé na yín matin azọ̀n: 7ewọ na sọ wleawu avọ nunina jinulili de tọn, ẹfa dopo na oyìnsú lọ, po ẹfa dopo po na agbò lọ, podọ na lẹngbọvú le kẹdẹdi le alọ etọn na pé e go do, po hini dopo amì tọn po hlan ẹfa dopo. 8Podọ whenuena ahọvi lọ na biọ whégbè, ewọ na gbọn aliho awánu họngboji lọ tọn ton mẹ biọ whégbè yì, é bo na sọ gbọn aliho etọn lọ mẹ jẹgbonu yì. 9Ṣigba whenuena gbẹtọ aigba lọ tọn lẹ na wá OKLUNỌ nukọn to hùnwhẹ didè le lọ mẹ, ewọ he gbọn aliho họngbo agéwaji tọn jibiọ whégbè nado litai na gbọn aliho họngbo huwàji tọnji jegbonu yì; podọ ewọ he sọ gbọn aliho họngbo huwàji tọn ji biọ whégbè na gbọn aliho họngbo agéwaji tọn ji jẹgbonu yì; ewo ma na gbọn aliho họngbo fie ewọ gbọn biọ whégbè tọn lọ ji lẹ́gọ̀ gba, ṣigba na jẹgbonu yì titegbe to ewọ nukọn. 10Pòdọ ahọvi lọ, whenuena yéwlẹ yì whégbè, na yì whégbè to gblagbla yé tọn mẹ; podọ whenuena yéwlẹ jẹgbonu yì, ewọ na sọ jẹgbonu yì. 11Podọ to hùnwhẹ lẹ lọ mẹ podọ to hùnwhẹ didè lẹ lọ mẹ avọ̀ nunina jinulili tọn lọ na yín ẹfa dopo na oyìnsú dopo, po ẹfa dopo po na agbò dopo, podọ na lẹngbọvú lẹ dole ewọ tin sọgan nado na do, po hini amì ton dopo po hlan ẹfa dopo. 12Podọ whenuena ahọvi lọ na wleawu avọ́ nunina ojlomẹ tọn de tọn, avọ̀ nunina mimẹ̀ tọn de kavi avọ nunina jijọho tọn lẹ di avọ̀ nunina ojlomẹ tọn de hlan OKLUNỌ, mede na hùn họngbo he pòn hlan whèzẹtẹn dali tọn na ẹn, ewọ bo na sọ wleawu avọ̀ nunina mimẹ̀ tọn étọn po avọ̀ nunina jijọho tọn etọn po, dole ewọ wà to azán ogbọjẹ tọn ji do; whenẹnu ewọ na jẹgbonu yì; podọ to gbonujẹ yì etọn godo mẹde na sọ sú họngbo lọ. 13Hiẹ bo na; sọ wleawu lengbọvú owhè tintan tọn de matin azọ̀n na avọ̀ nunina mimẹ̀ tọn de hlan OKLUNỌ egbesọegbesọ: afọnnu-afọnnu wẹ hiẹ na nọ wleawu e tọn. 14Hiẹ bo na sọ wleawu avọ́ nunina jinulili tọn de po e po to afọnnuafọnnu, mádosidopotọ ẹfa dopo tọn, po mádatòntọ sọn hini amì tọn dopo mẹ, nado yí do hò linfin dagbedagbe lọ; avọ́ nunina jinulili tọn de hlan OKLUNỌ jeijei gbọn asẹdai de dali whẹ̃whẹ̀. 15Le wẹ yé ná wleawu lẹngbọvú lọ tọn do, po avọ́ nunina Jinulili lọ tọn po, po amì lọ po, to afọnnu-afọnnu, ná avọ́ nunina jei jei de.

16Le wẹ OKLUNỌ JIWHEYẸWHE dọ: Eyín ahọvi lọ na nunina de hlan depope sọn visunnu etọn lẹ mẹ, ogú ewọ tọn wẹ, é na sọ yín visunnu etọn lẹ tọn; nutindo yetọn é yín gbọn ogú dali. 17Ṣigba eyín ewọ na nunina de hlan dopo sọn devi etọn lẹ mẹ sọn ogú etọn mẹ, é na yín etọn jẹ owhè mẹdekannujẹ tọn lọ mẹ; whenẹnu é na lẹ́gọ̀ jẹ ahọvi lọ de; ṣigba na ogú etọn tọn, é na tin na visunnu etọn lẹ. 18Humọ ahọvi lọ ma na yí sọn ogú gbẹtọ lẹ tọn mẹ; nado tùn yé jẹgbonu sọn nutindo yetọn mẹ gba; ewọ na na ogú hlan visunnu eton lẹ sọn nutindo etọn titi mẹ: na yè ma na do vúnvún omẹ ṣie lẹ omẹ dopodopo sọn nutindo etọn mẹ gba.

19Whenẹnu wẹ é sọ hẹn mi gbọn okule mẹ wá, he tin to adà họngbo lọ tọn ji, biọ abò wiwe na yẹwhenọ, lẹ jlẹ mẹ, he pọ́n hlan agéwaji dali: bo dayi e go, otẹn de tin finẹ to godo wàji hlan whèyihọ dali. 20Ewọ bo sọ dọ hlan mi dọ, Ehe wẹ otẹn lọ fie yẹwhenọ lẹ na nọ sọakusìn avọ̀ nunina whẹ̀ylan tọn po avọ̀ nunina ylando tọn po te, fie yé na nọ hi avọ nunina jinulili tọn te; na yé ma na do hẹn yé jẹgbonu wá biọ otògùn gbonutọn mẹ blo, nado klan gbẹtọ lẹ do wiwé. 21Whenẹnu wẹ é sọ hẹn mi jẹgbonu wá biọ, otògùn gbonutọn mẹ, bo sọ hẹn mi nado juyì gbọn olọnglọnẹn ẹnẹ otògùn lọ tọn lẹ mẹ; bo dayi e go, olọnglọnẹn otògùn de tọn tin finẹ to olọnglọnẹn otògùn dopodopo tọn mẹ. 22To olọnglọnẹn ẹnẹ otògùn lọ tọn lẹ mẹ otògùn yè dódedodego lẹ tin? finẹ, awàgbà kande tedidi podọ awàgbà ogbàn gbigblo: ẹnẹ helẹ to olọnglọnẹn, lẹ lọ mẹ yín ojlẹ dopo tọn. 23Podọ oha dido tọn de sọ tin fine lẹ́do podọ to yé mẹ, lẹ̀do ẹnẹ lẹ pe, yè sọ basi i po otẹn akusìnsọnú tọn lẹ po to hatito lẹ lọ glọ lẹ́do pé. 24Whenẹnu wẹ é dọ hlan mi dọ, Ehelẹ wẹ ohọ̀ akusìnsọnú tọn lẹ, fie devizọnwàtọ ohọ̀ lọ tọn lẹ na nọ sọakusìn avọ̀sánnu gbẹtọ lẹ tọn te.

Currently Selected:

EZEKIELI 46: BWL23

Highlight

Copy

Compare