EZEKIELI 43

1ENẸGODO é sọ hẹn mi wá jẹ họngbo lọ ji, yèdọ họngbo he pòn hlan whèzẹtẹn dali: 2bo dayi e gọ, gigo Jiwheyẹwhe Islaeli tọn tọn sọn aliho whèzẹtẹn tọn mẹ wá: ogbè etọn bo sọ tin taidi núdidọ osìn susu tọn: aigba sọ yí gigo etọn do to sisé. 3E sọ tin kẹdẹdi awusọhia númimọ he yẹn mọ tọn, yèdọ kẹdẹdi numimọ he, yẹn mọ whenuena yẹn wá nado và tòdaho lọ; podọ númimọ lẹ lọ sọ tin taidi númimọ he yẹn mọ to otò Kebali dali: yẹn bo sọ hò jẹ nukunmẹ ṣie ji. 4Gigo OKLUNỌ tọn sọ wá biọ ohò lọ mẹ gbọn aliho họngboji lọ tọn fimọnújẹ ehetọn tin hlan whèzẹtẹn dali. 5Gbigbọ lọ sọ zé mi hẹji, bo hẹn mi wá biọ otògùn homẹ tọn lọ mẹ; bo dayi e go, gigo OKLUNỌ tọn sọ gò ohò lọ. 6Yẹn sọ sè mẹde to hódọ hlan mi sọn ohò lọ mẹ: dawe de sọ site to dali ṣie. 7E sọ dọ hlan mi dọ, Visunnu gbẹtọ tọn, ehe wẹ otẹn ofìn ṣie tọn, podọ otẹn afọgbẹn afọ ṣie lẹ tọn tọn, fie yẹn na nọ nò; to gblagbla ovi Islaeli; tọn lẹ tọn mẹ kakadoi: podọ owhé Islaeli tọn ma na sọ flu oyín wiwe ṣie gbède Jba, yéwle, kavi ahọlu yetọn lẹ, gbọn ayòdide yetọn dali gba, podọ gbọn osiọ ahọlu yetọn lẹ tọn lẹ dali to okú yetọn mẹ; 8to dido họntònu yetọn tọn me to họntònu ṣie dali, podọ ohòn dòtin yetọn to ohòn dòtin ṣie dali, adó sọ tin to yẹn po yé po ṣẹnṣẹn; yé ko sọ flu oyín wiwe ṣie gbọn osùnú he yé ko wà lẹ dali: enẹwutu wẹ yẹn ko và yé súdo to adi ṣie mẹ. 9Dinvie gbọ yé ni dè ayòdide yetọn sè, po osiọ ahọlu yetọn lẹ tọn lẹ po, dẹn sọn dẽ, yẹn na sọ nọ nò gblagbla yé tọn mẹ kakadoi.

10Hiẹ, visunnu gbẹtọ tọn, do ohò lọ hiẹ owhé Islaeli tọn, na yè nido hẹn winyan oylanwà yetọn lẹ tọn hù yé: bo sọ gbọ yé ni jlẹ ohiamọ lọ. 11Podọ eyín yè hẹn winyan ehe yé ko wà lẹpo tọn hù yé, hẹn ohiamo; óhò lọ tọn zùn yinyọnẹn hlan yé, po obasi etọn po, po ogbonu yì etọn le po, po whégbè wá etọn lẹ pó, po ojlẹmọ etọn lẹpo po, po asẹdai etọn lẹpo po, po ójlẹinọ etọn lẹpo po, po osén etọn lẹpo po, bo sọ wlan ẹn to nukun yetọn mẹ: na yé nido yìn ojlẹmọ etọn pete, po asedai etọn lẹpo po, bo sọ nọ basi yé. 12Ehe wẹ osén ohò lọ tọn: to aga osé lọ tọn ji obónu etọn pete lédo pé na yín wiwe petepete Dayi e go, ehe wẹ osén ohò lọ tọn.

13Ehelẹ sọ wẹ ojlẹ agbà lọ tọn gbọn awàgbà dali: (awàgbà lọ wẹ awagbà dopo po alọhomẹgbigblo dopo po:) Oglọ na yín awàgbà dopo, podọ ogblo lọ awàgbà dopo, podọ olédo etọn gbọn otónu etọn dali lédo pó alọkikẹ dopo: ehe na yín nẹgbé agbà lọ tọn. 14Podọ sọn oglọ to aigba jẹ apèpẹ odòtọn go na yín awàgbà awe, podọ ogblo awàgbà dopo; podọ sọn apèpẹ pẹvi jẹ apèpẹ daho go na yín awàgbà ẹnẹ, podọ ogblo awàgbà dopo. 15Podọ agbà agatọn na yín awàgbà ẹnẹ; podọ sọn adò agbà lọ tọn kòn podọ hlanagadali azò ẹnẹ na tin finẹ. 16Podọ adò agbà lọ tọn na yín awàgbà wiawe tẹdidi podọ wiawegbigblo, ẹnẹsọzẹn to adà etọn ẹnẹ lẹ mẹ; 17Podọ apèpẹ lọ na yín awàgbà wiẹnẹ tedidi podọ wiẹnẹ gbigblo to adà etọn enẹ lẹ mẹ; podọ olédo e tọn na yín awàgbàda dopo; podọ oglọ etọn na yín awàgbà dopo nkọ; podọ agahénu etọn lẹ na pèn hlan whèyihọ dali.

18E sọ dọ hlan mi dọ, Visunnu gbẹtọ tọn, le wẹ OKLUNỌ JIWHEYẸWHE dọ: Ehelẹ wẹ asẹdai agbà lọ tọn lẹ to azán lọ mẹ whenuena ye na basi i, nado nọ na avọ̀ nunina mimẹ̀ lẹ to finẹji, podọ nado nọ mì ohùn to finẹji. 19Hiẹ na na hlan yẹwhenọ lẹ Levinu lẹ lọ he tin sọn okún Zadọki tọn mẹ, he tin sẹpè hlan dẽ lẹ, nado nọ wàdevizén hlan mi, wẹ OKLUNỌ JIWHEYẸWHE dọ, oyìnsú winyanwinyan dopo na avè nunina ylando de tọn. 20Hiẹ bo na sọ yí sọn ohùn etọn mẹ, bo yí i do azò e tọn ẹnẹ lẹ ji, podọ do olọnglọnẹn ẹnẹ apèpẹ lọ tọn lẹ ji, podọ do olédo lọ ji lédo pé: le wẹ hiẹ na lè ẹ wé do bo sọ basi ovésè na ẹn. 21Hiẹ na sọ yi oyìnsú avọ́ nunina ylando tọn lọ ga, ewọ na sọ mè ẹn to otẹn didè ohò lọ tọn mẹ, to gbonu fiwiwe lọ tọn. 22Podọ to azán awetọ gbè hiẹ na yí alunkùn dopo matin azọ̀n do na avọ́ nunina ylando de tọn; yé na sọ lè agbà lọ wé dile yé yí oyìnsú lọ do lè ẹ wé do. 23Whenuena hiẹ ko basi opòdo lìlè ẹ wé tọn de vò, hiẹ na yí oyìnsú winyanwinyan de matin azọ̀n do na nunina, po agbò de po matin azọ̀n sọn lẹngbọpa mẹ. 24Hiẹ na sọ hẹn yé wá sẹpè to OKLUNỌ nukọn, yẹwhenọ lẹ lọ bo na dlẹn ojè do yé ji, yé bo na sọ yí yé jó na avọ́ nunina mimẹ̀ de hlan OKLUNỌ. 25Azán ṣinawe wẹ hiẹ na do wleawuna alunkùn dopo egbesọ na avọ́ nunina ylando de tọn: yé na sọ wleawu oyìnsú dopo tọn ga, po agbò dopo po sọn lẹngbọpa lọ mẹ matin azọ̀n. 26Azán ṣinawe wẹ yé na do basi ovèsè na agbà lọ bo sọ hẹn en zùn wiwe; mọwẹ yé na hẹn alọ etọn le gó do. 27Podọ whenuena yé ko hẹn azán le lọ pé pó, é na tin dọ to azán sinatọntọ ji, podọ hlannukọn, yẹwhenọ lẹ na nọ basi avẹ́ nunina mimẹ̀ mìtọn lẹ to agbà lọ ji, pọ avọ́ nunina jijọho tọn mìton lẹ po; yẹn bo na sọ kẹalọyi mì, wẹ OKLUNỌ JIWHEYẸWHE dọ.

Currently Selected:

EZEKIELI 43: BWL23

Highlight

Copy

Compare