EZEKIELI 42

1WHENẸNU wẹ é sọ hẹn mi jẹgbonu wá biọ otògùn gbonutọn mẹ, aliho hlan agéwaji dali: é bo sọ hẹn mi wá biọ abò he tin pannukọn otẹn klandovo lọ mẹ, podọ ehe tin pannukọn dido lọ hlan agéwaji dali. 2To nukọn ote awàgbà kanweko tọn wẹ ohòn agewaji tọn, podọ ogblo yín awàgbà kandeao, 3pannukọn awàgbà okò lọ he tin na otogùn homẹ tọn, podọ pannukọn agbàtitó lọ he tin na otògùn gbonutọn, wẹ aisintẹnaga te pannukọn aisintẹnaga to agà atọ̀n mẹ. 4Podọ to abò lẹ nukọn wẹ ozọnlin awàgbà ao gbigblo tọn de te hlan homẹ dali, aliho awàgbà dopo tọn; ohòn yetọn lẹ bo sọ tin hlan agéwaji dali. 5Dinvie abò agatọn lẹ yín tewhèhú: na aisintẹnaga lẹ yí sọn ehelẹ mẹ hú sọn odòtọn po sẹnsẹnpetetọn po mẹ, to dido lọmẹ. 6Na yé tin to agà atọ̀n mẹ, yé ma tindo odòtin lẹ di odòtin otògùnmẹ tọn lẹ gba: enẹwutu wẹ yè hẹn agapetetọn jlọ sọn aigba hú odòpetetọn po ẹẹnsẹnpetetọn po tọn. 7Podọ adó he tin to gbonu to adà abò lẹ lọ tọn dali, hlan otògùn gbonu tọn dali to abò lẹ lọ nukọn, ote etọn yín awàgbà kandeao, 8Na otọ́ abò he tin to otògùn gbonu tọn lẹ mẹ yín awàgbà kandeao: bo, pọ́n, awàgbà kanweko tin to tẹmpli lọ nukọn. 9Podọ oglọ abò helẹ tọn mẹ wẹ okule sọn to adà whèzẹtẹn tọn ji, di mẹde biọ yé mẹ jei sọn otògùn gbonu tọn mẹ. 10To titli adó otògùn lọ tọn tọn mẹ hlan whèzẹtẹn dali, to otẹn klandovo lọ nukọn, podọ to dido lọ nukọn, wẹ abò lẹ te. 11Podọ aliho to yé nukọn lin taidi awusọhia aliho abò lẹ tọn tọn he tin hlan agéwaji dali; yé yín ogã di yé podọ gbigblo di yé: podọ tintón dogbonu yetọn lẹ tin kẹdẹdi dido yetọn lẹ, podọ kẹdẹdi ohòn yetọn lẹ. 12Podọ kẹdẹdi ohón abò lẹ tọn lẹ he tin hlan huwaji dali wẹ ohòn de te to ota aliho lọ tọn mẹ, yèdọ aliho titegbè to adó lọ nukọn hlan whèzẹtẹn dali, di mẹde biọ yé mẹ jei. 13Whenẹnu wẹ é dọ hlan mi dọ, Abò agéwaji tọn lẹ po abò huwaji tọn lẹ po, he tin to oiẹn klandovo lọ nukọn, yé tin na abò wiwe lẹ, fie yẹwhenọ he tin sẹpò jẹ OKLUNỌ de lẹ na nọ dù onú wiwe gbahu lẹ te: finẹ wẹ yé na nọ bé onú wiwe lẹ do, po avọ́ nunina jinulili tọn po, po avọ̀ nunina ylando tọn po, po avọ̀ nunina owhèylan tọn po; na wiwe wẹ otẹn lọ. 14Whenuena yẹwhenọ lẹ biọ hòmẹ, whenẹnu wẹ yé ma na sọ jẹgbonu yí sọn otẹn wiwe lọ mẹ biọ otògùn gbonutọn mẹ gba, ṣigba finẹ wẹ yé na dè awugbo yetọn lẹ hemẹ yé wàdevizòn te do; na wiwe wẹ yé: yé bo na sọ yí awugbo dẽvo lẹ do ogo, bo na sẹpọ́ jẹ enẹ he yín gbẹtọ lẹ tọn kòn.

15Dinvie whenuena é ko hẹn jijlẹ ohò homẹ tọn tọn jẹ opòdo, ewọ hẹn mi jẹgbonu gbọn aliho họngboji lọ tọn dali fimọnújẹ ehetọn tin hlan whèzẹtẹn dali, bo sọ jlẹ ẹ lédo pó. 16E yí ofán nújijlẹ tọn lọ do jlẹ to whèzetẹn jẹhọn ji, ofán fowekanweko, po ofán jijlẹ tọn po lédo pé. 17E sọ jlẹ to agéwaji jẹhọn ji, ofán fowekanweko, po ofán jijlẹ tọn lọ po lédo pé. 18E jlẹ to huwaji jehọn ji, ofán fowekanweko, po ofán jijlẹ tọn lọ po. 19E sọ lé hlan whèyihọ, jẹhọn ji, bo jlẹ pfán fowekanweko po ofán jijlẹ tọn lọ po. 20E jlẹ ẹ hlan ojẹhọn ẹnẹ lẹ dali: é tindo adó de lédo pé, ote lọ fowekanweko, podọ ogblo lọ fowekanweko, nado basi klandovo de to enẹ he yín wiwe po enẹ he tin ayà po ṣẹnṣẹn.

Currently Selected:

EZEKIELI 42: BWL23

Highlight

Copy

Compare