OWALỌ APỌSTELI LẸ TỌN 6
6
1PODỌ to azán nẹlẹ gbè, whenuena sọha nuplọntọ lẹ tọn to susu do e ji, hunhlun de fọ́n to Gleki lẹ mẹ do Heblu lẹ, na yè to jiwọn asusiọsi yetọn le go to numánamẹ egbésọegbésọ tọn mẹ wutu. 2Whenẹnu wẹ omẹ wiawe lẹ ylọ agùndaho nuplọntọ lẹ tọn plidopọ, bo dọmọ, E ma jẹ na mìwlẹ ni jó ohó Jiwheyẹwhe tọn dai, bo to tafo sèn gba. 3Enẹwutu, mẹmẹsunnu emi, mì pọ́n sunnusi ṣinawe to mì mẹ, oyín dagbenọ, mẹhe gó na Gbigbọ Wiwe, podọ na nuyọnen, mehe mí do dè do azọ́n he kòn. 4Ṣigba mìwlẹ na jó mìde na odẹ́ to whepoponu, podọ na devizọn ohó lọ tọn. 5Ohó lọ sọ do homẹhùnhùn na agùndaho lẹpo: yé sọ dè Stefani, dawe he gó na yise, podo na Gbigbọ Wiwe, Filipi po Plokole po, Nikanoli po Timoni po, Palmena po Nikola hùnzontọ Antioku tọn de po: 6mẹhe yé hẹn wá nukọn apọsteli lẹ tọn: whenuena yé hodè, yé do alọ yetọn yé ji.
7Ohó Jiwheyẹwhe tọn sọ hẹnai; sọha nuplọntọ lẹ tọn so to susu do e ji talala to Jelusalẹm; podọ omẹ susu to; yẹwhenọ lẹ mẹ setónuna yise.
8Podọ Stefani hé gọ́ na yise, po huhlọn po, é wà azọ́n jawu po nujawu daho po to gbẹtọ lẹ mẹ. 9Whenènu wẹ omẹ delẹ fọn to sinagọgu mẹ, he yè nọ ylọ sinagọgu mèdèdote lẹ tọn, po Silenitọ lẹ tọn po, po Alẹkzandlitọ lẹ tọn po, po Sihsiatọ lẹ tọn pọ, po Asiatọ lẹ tọn po, yé to hodòn hẹ Stefani. 10Yé ma sọ sọgan pehẹ nuyọnẹn po gbigbọ po he é do to hódọ hẹ yé. 11Whenẹnu wẹ yé hẹn sunnu lẹ whledounji, he dọmọ, Mìwlẹ sè dawe he to ohó nùzinzan tọn dọ do Moṣe po Jiwheyẹwhe po go. 12Yé sọ to gbẹtọ lẹ wlu, po mẹho lẹ po, po wekantọ lẹ po, bo fọn do e ji, yé wlé e, bo hẹn ẹn wá tòhódọtọ lẹ de, 13yé hẹn kunnudetọ lalonọ lẹ wá, yé he dọ, dọmọ, Dawe he ma gbọ sọn ohó nùzìnzan tọn didọ do ofi wiwe he po osén po go gba, 14na mìwlẹ se, é dọmọ, Jesu Nazalẹti tọn he na gbà ofì he, bo na dìọ owalọ he Moṣe yí do alọ mẹ na mí. 15Omẹ he sinai to oplìto tòhódọtọ lẹ tọn lẹpo sọ zínnukun do e go bo to pinpọ́n ẹn, yé sọ mọ nukunmẹ etọn, é taidì nukunmẹ angẹli de tọn.
Currently Selected:
OWALỌ APỌSTELI LẸ TỌN 6: BWL23
Highlight
Share
Compare
Copy
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
