1 PITA 1
1
1PITA, aposteli Jesu Klisti tọn de, hlan mesinsinyan he yín wasinu sọn gbape le me to Pọntu, Galatia, Kapadokia Asia, po Bitinia po mẹ. 2Kẹdẹdi yinyọnendai Jiwheyẹwhe Otọ tọn, gbon lèwé Gbigbọ tọn dali, hlan tónuse po ohùn yìn do omẹ go Jesu Klisti tọn po: Ojọmiọn po jijọho po ni yín sùsù hlan mì.
3Donanọ wẹ Jiwheyẹwhe Otọ́ Jesu Klisti Oklunọ mìton tọn, mẹhe vó mí detón kẹdẹdi lẹblanu etọn gege do todido ogbènọ dẹ mẹ, gbọn finfọ́n Jesu Klisti tọn dali sọn osiọ le me, 4hlan ogúdu magble, maflu, he ma nọ kupẹ́, he yè Whlá na mí to olọn mẹ, 5mẹhe yè whlá gbọn huhlọn Jiwheyẹwhe tọn dali, gbọn yise mẹ hlan whlẹngan he to yiya nado hẹn sọawúhia to ojlẹ godo tọn mẹ. 6Ehẹ mẹ mì to ayajẹ te susu, le é tlẹ te dinvie na whenu de, yín é ma sọgan nọma jọ, mì tin to awúbla mẹ gbọn whlepọ́n susu dali: 7dọ whlepón yise mìtọn tọn, he yónwhanpẹ hú sika he nọ sudo, eyín é bo sọ yín miyọn wẹ yè tlẹ yí do to whiwhle e pọ́n, na yè nido mọ ẹn to pipa mẹ to yeyi mẹ, to gigo mẹ to osọhia Jesu Klisti tọn whenu: 8mẹhe mì ma ko mọ, bo to wanyinọ; mẹhe mì ma tlẹ mọ dinvie, gãnṣo bo to yíyíse, mì yí aya masọgandọ he gó na gigo do to ayajẹ: 9bo sọ to opòdo yise mìtọn tọn yí, whlẹngan alindon mìtọn lẹ tọn. 10Whlẹngan he tọn yẹwhegán lẹ kanbiọ, bo sọ yí vivẹnu do dindòna talala, yé he dọdọdai ojọmiọn he ja mì de tọn: 11yé to dodinna etẹ, kavi ojlẹ tẹ mẹ tọn hunkọ wẹ Gbigbọ Klisti tọn he tin to ye mẹ to didọhia, whenuena é ṣẹṣẹ dekunnu oya Klisti tọn, po gigo he na bọdo e go gbọn godo tọn po. 12Hlan mẹhe yè sọhia lẹ, dọ é ma yín hlan yélọsu gba, ṣigba mílẹ we yẹ to devizón onú helẹ tọn wà hlan, ehe yè to didọ hlan mi to dinvie, gbọn yé he ko to yẹwheho wẹndagbe tọn dọ hlan mì dali, po Gbigbọ Wiwe he yè dohlan sọn olọn mẹ wá po; onú he angẹli lẹ jlo nado doun e mẹ pọ́n.
13Enewutu mì bla gbaja otùnu mìtọn tọn gligli, mì yín húwhenọ, bo sọ to todo jẹ opodo na ojọmiọn he yè na hẹnwá na mì to osọhia Jesu Klisti tọn whenu; 14di ovi tónusetọ, to ma yí mìde do dasa di wantúntún hóhó whenu tọn to wunvi mìtọn mẹ: 15ṣigba le ewọ he ylọ mì yín wiwe do, mọwẹ mì ni yín wiwe do to owalọ alopalọpa popo mẹ; 16na yè ko wlanwe etọn dọ, Mì na yín wiwe, na wiwe wẹ yẹn. 17Eyín mì sọ to oyín Otọ́ tọn ylọ, mehe matin mẹhòpọ́n gbẹtọ tọn nọ dawhè kẹdẹdile azọn omẹ dopodopo tọn te, mì nọ zán azán wáṣi whenu mí tọn tọn to ofi tọ ọsi mẹ: 18sọle mì yọnẹn dọ, yè ma yí nugbigble do fli mì gba, di fataka po sika po, sọn owalọ vọ́ mìtọn mẹ, he mì yí gbọn otànhóhó lẹ dali sọn otọ mìton lẹ de; 19adavo ohùn Klisti tọn akuẹgegenu, di lẹngbọvu he matin apa go tọn, podọ matin diho. 20Mẹhe ye ko yọnẹndai nugbo jẹnukọn na aihọn dòdó, sigbabọ sọawúhia to opodo ojlẹ helẹ tọn na mì, 21mẹhe gbọn ewọ mẹ yin yisẹnọ to jiwheyẹwhe mẹ, he fọn ẹn tite sọn oṣiọ lẹ mẹ, bo sọ na gigo e; na yise po tódido mìtọn po nido tin to Jiwheyẹwhe mẹ. 22Le mì ko lẹ́ alindọn mìton lẹ wé to tónusise mìtọn mẹ hlan nugbo jẹ owanyi mẹmẹsunnu tọn madoklọ mẹ, mì nọ yiwanna mìnọzọ talala po ayiha wiwe po: 23le mìwlẹ lẹzun mẹvọjì, é ma yín sọn okún gbigble mẹ gba, ṣigba sọn magble mẹ, gbọn ohó Jiwheyẹwhe tọn dali, ehe to ogbẹ̀, bo nasọ tin to ote kakadoi. 24Na Agbasalan lẹpo tin di ogbé, Gigo gbẹtọ tọn lẹpo sọ di vòvó ogbémẹ tọn. Ogbé nọ yọ́, vòvó etọn sọ nọ ja kọnyinai: 25Ṣigba ohó Oklunọ tọn nọte kakadoi. Ehe wẹ ohó lọ he yè gbọn wẹndagbe dali to yẹwheho etọn dọ hlan mì.
Currently Selected:
1 PITA 1: BWL23
Highlight
Copy
Compare
Share
Want to have your highlights saved across all your devices? Sign up or sign in
Holy Bible in Gun-Alada © Bible Society of Benin and Bible Society of Nigeria, 1923.
