1 AHỌLU LẸ 12

1LEHOBOAMI sọ yì Ṣekẹmi: na Islaeli lẹpo wẹ yè hẹn wá Ṣekẹmi nado basi i na ahọlu. 2E sọ wá jọ whenuena Jeloboami visunnu Nebati tọn sè e, (na ewọ gbẹ́ sọ tin to Egipti mẹ, fie é ko họ̀nyì sọn nukun Sọlọmọni ahọlu tọn mẹ, Jeloboami sọ nọ nò Egipti mẹ, 3Yé sọ domẹhlan bo ylọ ẹ;) wẹ Jeloboami po agùn Islaeli tọn lẹpo po wá, bo dọhó hlan Lehoboami, dọmọ, 4Otò towe hẹn oglepònu mìtọn fiẹawu: enẹwutu dinvie hiẹ ni hẹn sinsẹ̀n fiẹawu otọ̀ towe tọn, po oglepònu pinpẹn he é yí do mí ji po, fuahú, míwlẹ na sọ nọ sẹ̀n wé. 5Ewọ sọ dọ hlan yé dọmọ, Mì fọ́nyì whẹ na azán atọ̀n, whenẹnu mì ni vọ̀ wá dẽ. Gbẹtọ lẹ sọ fọ̀nyì. 6Lehoboami ahọlu yí hónamẹ po mẹho lẹ po, he ko nọ ṣite tó Solọmọni otọ̀ etọn nukọn whenuena é gbẹ́ togbẹ̀, dọmọ, Hónamẹ tẹwẹ mìwlẹ na mi nado gọ̀ gbègblọn hlan omẹ he lẹ? 7Yé sọ dọhó hlan ẹn, dọmọ, Eyín hiẹ na yín mẹmẹsi de hlan òmẹ he lẹ to egbé, bo na sẹ̀n yé, bo sọ gblọnhóna yé, bo sọ dọ ohó dagbe lẹ hlan yé, whenẹnu yé na yín mẹmẹsi towe lẹ kakadoi. 8Ṣigba é gbẹ́ hónamẹ mẹho lẹ tọn dai he yé ko na ẹn, bo yí hónamẹ po yọ̀pọ sunnu lẹ po he yè hẹn whén daga po e po, he nọ ṣite to nukọn etọn lẹ 9E sọ dọ hlan yé dọmọ, Hónamẹ tẹwẹ míwlẹ na, na mí nido gọ̀ gbègblọn hlan omẹ he lẹ, he ko dọhó hlan mi, dọmọ, Hẹn oglẹpọ̀nu lọ he otọ̀ towe ko yí do mí ji fuahú? 10Yọpọ sunnu lẹ lọ he yè hẹn whẹ́n daga po e po lẹ lọ dọhó hlan ẹn, dọmọ, Le wẹ hiẹ na dọ hlan omẹ he lẹ he dọhó hlan we lẹ, dọmọ, Otò towe hẹn oglepònu mìtọn pẹ̀n, ṣigba hiẹ ni hẹn ẹn fuahú hlan mí; lè wẹ hiẹ na dọhó hlan yé, dọ, Alọviyẹyẹ ṣie pẹvi tin titli hú adaja otò ṣie tọn. 11Podọ dinvie dọ to nugbo mẹ otọ̀ ṣie ko yí oglepònu pinpẹn de do doagbànna mì, yẹn na dèdogò oglepònu mìtọn: otọ́ ṣie yí mehòba lẹ do hò mìwlẹ, ṣigba yẹn na yí aklekle lẹ do hò mì. 12Mowẹ Jeloboami po gbẹtọ lepo po wá Lehoboami de to azán atọ̀ntọ gbè, dile ahọlu degbè do, dọmọ, Mì sọ vọ̀ wá dẽ to azán atọ̀ntọ gbè. 13Ahọlu sọ yí ogbèylan do gblọnhóna gbẹtọ ewlẹ, bo gbẹ́ hónamẹ mẹho lẹ tọn he yé ko na ẹn; 14bo dọhó hlan yé kẹdẹdi hónamẹ yọ̀pọ sunnu lẹ lọ tọn, dọmọ, Otò ṣie hẹn oglepònu mìtọn pẹ̀n, ṣigba yẹn na dèdogọ̀ oglepọ̀nu mìtọn: otọ̀ ṣie yí mẹhòba lẹ do hò míwlẹ, ṣigba yẹn na yí aklekle lẹ do hò mì, 15Mọwẹ ahọlu ma tuntóai hlan gbẹtọ lẹ gba; na é yín onú hẹn wá sọn OKLUNỌ de de, na é nido hẹn ohó etọn lódo, he OKLUNỌ dọ gbọn alọ Ahija ṣiloninu lọ tọn mẹ hlan Jeloboami visunnu Nebati tọn. 16Whenuena Islaeli lẹpo mọ dọ ahọlu ma tuntóai hlan yé gba, gbẹtọ lẹ gblọnna ahọlu, dọmọ, Mimá tẹ́wẹ míwlẹ tindo to Davidi mẹ? mọ míwlẹ ma sọ tindo ogú to visunnu Jẹsse tọn mẹ: hlan gohọ̀ mìtọn lẹ kọ̀n, mì Islaeli emi: Davidi, pọ̀n owhé towe titi go. Mowẹ Islaeli fọ̀nyì gohò yetọn lẹ kọ̀n. 17Ṣigba na ovi Islaeli tọn lẹ he nọ nọ̀ tòdaho Juda tọn lẹ mẹ, Lehoboami dùahọlu do yé ji. 18Whenẹnu wẹ ahọlu Lehoboami do Adọlami hlan, mẹhe tin to osẹ̀njọ lọ ji; Islaeli lẹpo sọ dlọn zannu lẹ do e, bọ é kú. Ahọlu Lehoboami sọ basi awuya nado hẹn ede hẹji yì kẹkẹ etọn kọ̀n, nado họ̀nyì Jelusalẹm. 19Mowẹ Islaeli ṣiatẹ hẹ owhé Davidi tọn do, kakajẹ azán he gbè. 20E sọ wá jọ, whenuena Islaeli lẹpo sè dọ yè hẹn Jeloboami gọ̀, wẹ yé domẹhlan bo ylọ ẹ do agùn lọ de, bo basi i na ahọlu do Islaeli lẹpo ji: mẹde ma tin he hodo owhé Davidi tọn, adavo whẹndo Juda tọn kẹdẹ.

21Whenuena yè hẹn Lehoboami wá Jelusalẹm, é bẹ́ owhé Juda tọn lẹpo pli, po whẹndo Bẹnjamini tọn po, sunnusi ṣinṣinyan fọtọ̀n kẹnnẹko, he yín awhànfuntọ lẹ, nado hòavùn hẹ owhé Islaeli tọn, nado vọ̀ ahọludu lọ hẹn wá Lehoboami visunnu Sọlọmọni tọn de. 22Ṣigba ohó Jiwheyẹwhe tọn wá Ṣimaia de omẹ Jiwheyẹwhe tọn, dọmọ, 23Dọhó hlan Lehoboami visunnu Sọlọmọni tọn ahọlu Juda tọn, podọ hlan owhé Juda po Bẹnjamini po tọn lẹpo, podọ hlan pipòtọ gbẹtọ lẹ tọn, dọmọ, 24Le wẹ OKLUNỌ dọ, Míwlẹ ma na hẹji yì gba, mì ma na hòavùn hẹ mẹmẹsunnu mìtọn ovi Islaeli tọn lẹ gba: omẹ dopodopo ni le yì owhé etọn gbè; na dèe wẹ onú he sọn Mowẹ yé tuntóai hlan oho OKLUNỌ tọn do, bo lẹ́ bo yì aliho yetọn, kẹdẹdi ohó OKLUNỌ tọn.

25Whenenu wẹ Jeloboami dó Ṣekẹmi to otò okọta Eflaimi tọn mẹ, bo nọ nó finẹmẹ; é sọ tọ́n yì sọn finẹ, bo dó Pẹnuẹli. 26Jeloboami sọ dọ to ayiha etọn mẹ dọmọ, Dinvie wẹ ahọludu lọ na gọ̀ do owhé Davidi tọn de: 27Eyín gbẹtọ he lẹ to jihẹ yì nado na avọ́sannú to ohọ̀ OKLUNỌ tọn mẹ to Jelusalẹm, whenẹnu wẹ ayiha omẹ he lẹ tọn na vọ̀ diọ hlan klunọ yetọn de, yèdọ hlan Lehoboami ahọlu Juda tọn de; bọ yé na sọ hù mi, bo lẹ́ do Lehoboami ahọlu Juda tọn de. 28Fieji ahọlu yí hónamẹ bo basi oyìnvu awe sika tọn lẹ; é sọ dọ hlan yé dọmọ, E tin sù gbahu na míwlẹ nado nọ hẹji yì Jelusalẹm; pọ́n yẹwhe mìtọn lẹ, mì Islaeli emi, he hẹn we hẹji tọ́n sọn aigba Egipti tọn ji. 29E sọ zé ode do Bẹtẹti mẹ, awetọ wẹ é sọ zé do Dani mẹ. 30Onú he sọ lẹzùn ylando de: na gbẹtọ lẹ to yìyì nado litai to ode nukọn, yèdọ jẹ Dani. 31E sọ basi ohò otẹn yìaga lẹ tọn lẹ, bo sọ basi yẹwhenọ lẹ sọn gbẹtọ lẹpo ṣẹnṣẹn, he ma tin sọn visunnu Levi tọn lẹ mẹ. 32Jeloboami sọ do hùnwhẹ́ de ai to osùn ṣinatọ̀ntọ mẹ, to azán fọtọ́ntọ osùn lọ tọn ji, taidi hlan hùnwhẹ́ he tin to Juda mẹ nkọ, ewọ sọ nọ hẹji yì agbà lọ kọn; mọwẹ é nọ wà do to Bẹtẹli mẹ, bo nọ to avọ́sán hlan oyìnvu lẹ he é basi: é sọ dotẹnna yẹwhenọ otẹn yìaga lẹ tọn lẹ he ewọ ko basi. 33E sọ hẹji yì agbà lọ kọ́n he é ko basi do Bẹtẹli mẹ to azán fọtọ̀ntọ ji to osùn sinatòntọ mẹ, yèdọ to osùn lọ mẹ he ewọ lẹn to ayiha etọn titi mẹ: é sọ do hùnwhè de ai na ovi Islaeli tọn lẹ, bo sọ nọ hẹji yì agbà lọ kọ̀n, nado mé nuwhẹnkún.

Currently Selected:

1 AHỌLU LẸ 12: BWL23

Highlight

Copy

Compare