CANTARES 6
6
Warmimasinkuna
1Llapa warmikunamantapas aswan munaycha,
¿maytan munakusqaykiqa ripurqan?
¿Maytan wayllukusqaykiqa puriripurqan?
Haku payta maskhamusunchis.
Warmi
2Munakusqayqa huertanmanmi uraykurqan,
q'apashaq huertanpi puririkamunanpaq,
hamanq'ay t'ikakunata pallarikamunanpaq.
3Ñoqaqa munakusqaypan kani,
munakusqaytaqmi ñoqaq,
payqa hamanq'ay t'ika-t'ikapin puririkamushan.
Phisqakaq taki
Qosa
4Munakusqalláy,
ancha munaychan qanqa kanki Tirsa llaqta hina,
munaychallañan qanqa kanki Jerusalén llaqta hina,
seqella puriq ch'askakuna hina lliphipishaq.
5Amaña qhawapayawaychu,
ñawiykiqa sonqoytan suwawan.
Chukchaykiqa Galaad qhatakunanta
uraykamushaq cabra t'aqa hinan.
6Kiruykiqa rutusqa yuraq oveja t'aqa hinan,
bañasqamanta lloqsimushaq oveja t'aqa hinan,
mellizo hinan iskaykama kashan,
manataq mayqenpas sapallanchu kashan.
7Uyaykiqa qatakusqayki ukhupi
phasmisqa puka granada hinan.
8Soqta chunkan qoyakunaqa,
pusaq chunkataqmi pallakunapas,
ancha askhataqmi sipaskunapas,
9ichaqa ch'ullallan urpichallayqa,
ch'ullallan munaychallayqa,
mamanpa sapan ususillanmi,
wachakuqninpa aswan munakusqallanmi.
Payta rikuspan sipaskunaqa:
Kusisamiyoqmi, nirqanku,
qoyakunapas pallakunapas paytan yupaycharqanku.
10¿Pitaq kayri pacha illarimuq hina lloqsimun
killa hina munaycha
inti hina k'anchashaq
seqella puriq ch'askakuna hina lliphipishaq?
Warmi
11Nogal sach'a-sach'amanmi uraykurqani
qheswa wayq'opi q'omer llanllashaqta rikunaypaq,
uvas yurakunaqa phutumushasqachus
granada mallkikunaqa sisashasqachus chayta rikunaypaq.
12Chaymantaqa manañan yachapurqanichu imaynapunichus kapusqanta
qhapaq carretanpi umalliywan kuska rikhurinaykama.
Warmimasinkuna
13¡Kutiriykuy, muyuriykuy, Sulam warmilláy!
¡Kutiriykuy, tusuykuy, rikuykuytan munaykiku!
Warmi
¿Imanaqtintaq ñoqata rikuyta munawankichis
Mahanaim nisqa tusuyta tusushaqta?
Currently Selected:
CANTARES 6: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
