ISAÍAS 7
7
Rey Ahazman Isaiaspa willasqan
1Uziaspa churin Jotampa churin Ahaz Judá suyupi rey kashaqtinmi, Siria suyu rey Rezimpiwan Israel suyu rey Remaliaspa churin Pekapiwan Jerusalenta wicharqan munaychakuyta munaspa, ichaqa manan atiparqanchu.
2Chaypachan rey Ahazman Judá runakunamanwan willarqanku: Siria suyu runakunan Israel suyu runakunawan huñuykunakun, nispanku. Hinan reypas runankunapas mancharisqa khatatatarqanku, imaynan sach'akunapas wayra-wayramuqtin chhaphchikun hinata.
3Chaymi Señor Diosqa Isaiasta nirqan: —Qanpiwan churiyki Sear-jasubpiwan#Kay sutiqa “wakin qhepaqkuna kutimunqa” ninantan nin. rey Ahazman riychis, Hanaq p'uytu nisqamanta lloqsiq yarqha qayllapi T'aqsaqkunaq hallp'an nisqaman rishaq ñanpin tupankichis. 4Hinaspa niy: Makilla qhawakuy, ama khatatataychu, ama manchapakuypaschu. Amataq pisi kallpayaypaschu Siria rey Rezín hawa Israel rey Peka hawa, hinaña sinchi phiñasqa kashanku chaypas, paykunaqa q'osñirishaq k'aspikuna hinallan kanku. 5Siria runakunan Israel runakunapiwan rey Pekapiwan mana allin ruwayta yuyaykusunkiku, paykunan ninku: 6Haku Judá suyuman phawaykusun, ñut'uta ruwaspataq chay llaqtata phasminakusun, hinaspa Tabeelpa churinta reyta churamusunchis, nispanku. 7Ichaqa Qollana Señor Diosmi nin:
Chay yuyaykusqankuqa manan hayk'aqpas hunt'akunqachu.
8-9Siria suyuq hatun llaqtanqa Damascon,
Damasco llaqtaqa Rezinpin hap'ipakun.
Israel suyuq hatun llaqtanqa Samarian,
Samaria llaqtaqa Pekapin hap'ipakun,
chaytukuywanpas Israel suyuqa
soqta chunka phisqayoq wata ukhupin manaña suyuchu kapunqa.
Qankunapas iñiyniykichispi manachus qaqa sayankichis chayqa,
manan unaytachu qhepankichis, nispan, nispa.
Emanuelpa nacenanmanta willakuy
10Señor Diosmi Ahazta Isaiaswan nichirqan: 11Apu Señor Diosniykimanta mañakuy huk milagrota ruwananpaq Wañuy-pachapipas hanaq pachapipas, chaymi huk señal qanpaq kanqa, nispa.
12Ahaztaq kutichirqan: —Manan. Manapunin ñoqaqa huk señalta mañakuspayqa Señor Diosta wateqaymanchu, nispa.
13Chaymi Isaiasqa nirqan: —Davidpa mirayninkuna, uyariwaychis. Runakunatan phiñachinkichis, ¿chay hinallatataqchu Diostapas phiñachiyta munankichis? 14Chay hinaqa, kikin Señor Diosmi huk señalta rikuchisunkichis: Huk sipasmi onqoq kashan, paymi qhari wawata wachakunqa, Emanueltataq #Emanuel sutiqa “Diosmi ñoqanchiswan” ninantan nin. sutichanqa. 15Chay wawaqa allinkaqta mana allinkaqta reparasqan tiempopin queso lluklluta miel misk'itawan mikhunqa. 16Manaraq chay tiempoman chayashaqtinmi chay manchachiqniykichis iskaynin reykunaq suyunkunaqa purunyachisqa kapunqa.
17Señor Diosmi hatun llakita chayachimunqa qanmanpas, llaqtaykimanpas, aylluykimanpas, Judá suyuwan Israel suyuwan t'aqanakusqanku llakita hina. Señor Diosqa Asiria reytan muchuchinasuykichispaq apamunqa.
18Chay tiempopin Señor Diosqa karu Nilo mayupi tiyaqkunata silbarispa ch'uspita hinaraq hamuchinqa, Asiriapi tiyaqkunatapas wanqoyruta hinaraq hamuchinqa. 19Chaykunan hamuspa tiyanqaku k'ahakunapi, q'asakunapi, llapan unu p'uytu patakunapi, llapan khiska-khiska ch'aphrakunapi ima. 20Señor Diosqa Asiria reytan hap'inqa Eufrates mayuq karu chimpanmanta fletasqa navajata hina, chaywanmi k'isunqa Judá runakunaq umanta, sunkhanta, phaka suphunkunatawan.
21Chay tiempopin huk wakata iskay ovejatawan kawsachiq runaqa 22askha lecheta ch'awanqa, chaymi queso lluklluta mikhunqa. Hinallataq kay suyu muchuchiymanta qespikuqkunapas mikhunqaku queso lluklluta miel misk'itawan. 23Waranqa yurayoq kaq waranqa qolqe valeq uvas chakrakunapas ch'aphra-ch'aphramanmi khiska-khiskamanmi tukuchisqa kanqa. 24Llapa suyuntinmi khiska-khiska ch'aphra-ch'aphra kapunqa, chayrayku p'eqtayoq wach'inayoq haykunqaku salqa animalkunata hap'inankupaq. 25Ch'ira lampawan llank'asqa orqokunaqa sinchi askha khiskakunawan ch'aphrakunawanmi hunt'a kanqa, chaymi mana pipas chaykunaman wichanqachu, aswanpas ovejakunallan torokunallan mikhuq rinqa, nispa.
Currently Selected:
ISAÍAS 7: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
