ISAÍAS 65
65
Mana kasukuqkunaq muchuchisqa kanan
1Señor Diosmi nin:
Ñoqaqa chaypin maskhawanankupaq kasharqani,
ichaqa manan ñoqamanta tapukurqankuchu,
chaypin tariwanankupaq kasharqani,
ichaqa manan maskhawarqankuchu,
ñoqamanta mana mañakuq suyutan nirqani:
Kaypin kashani, yanapaykusqaykin, nispa.
2P'unchay-ch'isiyaqmi makiyta haywarayarqani
k'ulluchakuq runakunata asuykachikunaypaq,
kay llaqtan waqllisqa ñanninta purin,
yuyaykusqankuman hinan kawsanku.
3Paykunaqa sut'itan phiñachishallawankupuni
huertakunapi wak'a dioskunaman sacrificiota haywaspa,
ladrillo altarkunapi inciensota q'osñichispa.
4Almakunata tapunankupaqmi aya p'ampanakunapi tiyanku,
paka cheqaskunapin tutantin qhawapakuspa rikch'anku.
Khuchi aychatan mikhunku,
qhelli animalkunaq aychantan t'impuchinku.
5Runakunatan ninku:
Chayllapi kaychis, ama asuykamuwaykuchu,
sinchi ch'uyan kayku, ama llamiykuwaykuchu, nispa.
Paykunaqa q'osñishaq nina hinan,
p'unchay-ch'isiyaqmi umayta nanachishawanku.
6Chay ruwasqakunaqa llapallanmi ñawpaqeypi qelqasqa kashan,
manan qonqapusaqchu,
aswanpas paykuna kikinkutan muchuchisaq.
7Paykunataqa muchuchisaqpunin mana chaninkuna ruwasqankumanta,
tayta-mamankuq mana chaninkuna ruwasqankumantapas.
Paykunan orqo patakunapi inciensota q'osñichirqanku,
moqo patakunapipas k'amiwarqanku,
chaymi ñoqaqa ruwasqankutaraq tupusaq,
hinaspan chayman hina paykunata muchuchisaq, nispa.
8Señor Diosmi nin:
Imaynan unuyoqraq uvasta tarispa ninku:
Ama usuchiychu, chaypiqa kashanraqmi vino, nispa,
chay hinatan ñoqapas llaqtaytaqa mana llapantachu wañuchisaq,
aswanpas kamachiykunataqa qespichisaqmi.
9Jacobmantan runa mirayta paqarichisaq,
Judamantataq runakunata sayarichisaq,
paykunan suyuy orqo-orqopi tiyanqaku,
akllakusqaykunaqa suyuytan chaskinqaku,
chaypin kamachiykunaqa tiyanqaku.
10Yupaychawaqniy llaqtaqa Sharón nisqa pampapin uywakunata michinqa,
Akor wayq'opipas wakatan michinqa.
11Yaw saqepuwaqniykuna, qankunapaqqa manan chay hinachu kanqa,
qankunaqa ch'uya orqoytan saqepunkichis,
qankunaqa Gad nisqa diospaqmi mikhunata mast'ankichis allin suertepaq,
qankunaqa Mení nisqa diosmanmi tupachisqa ukyanata haywankichis
qhepaman ama ima mana allinpipas kanaykichispaq.
12Chaymi qankunaqa qhepaman espadawan wañuchisqa kankichis,
llapallaykichismi qhorusqa kankichis.
Waqyarqaykichismi manataq kutichimuwarqankichischu,
rimaqtiypas manataq uyarimuwarqankichischu,
aswanpas mana allinkaqtan ñawpaqeypi ruwarqankichis,
millakusqaytan akllakurqankichispas.
13Chayraykun ñoqa Qollana Señor Diosqa niykichis:
Kamachiykunan mikhunqa,
qankunataq yarqachikunkichis.
Kamachiykunan ukyanqa,
qankunataq ch'akichikunkichis.
Kamachiykunan kusikunqa,
qankunataq p'enqachisqa kankichis.
14Kamachiykunan kusisqa sonqontin takinqa,
qankunataq llakisqa sonqontin waqankichis,
llakiq ñit'isqan sonqontin qaparinkichis.
15Sutiykichiswanmi akllakusqay runakunaqa huk runakunata ñakanqaku,
ñoqa Qollana Señor Diosmi wañuchisqaykichis,
kamachiykunatataq ichaqa mosoq sutiwan sutichasaq.
16Pipas kay suyupi saminchasqa kayta munaqqa ninqa:
Hunt'aq Diosnilláy, saminchaykuway, nispa.
Pipas kay suyupi juraqqa ninqa:
Hunt'aq Diospa sutinpin jurani, nispa.
Ñawpaqkaq llaki-phutiykunaqa qonqasqañan kapunqa,
manañan chaykunata yuyarisaqchu, nispa.
17Señor Diosmi nin:
Ñoqaqa mosoq hanaq pachatan
mosoq hallp'a pachatawanmi kamasaq,
ñawpaq sucedesqankunaqa qonqasqan kapunqa,
manañan yuyarisqapasñachu kanqa.
18Ñoqan Jerusalenta chaypi tiyaq runakunatapas kamasaq,
chaypin kusikunqakupas kusichinqakupas,
chaykunatan kamasaq,
chayrayku wiñaypaq q'ochukuychispas kusikuychispas.
19Jerusalén hawan kusikusaq,
llaqtay hawan q'ochukusaq.
Manañan hayk'aqpas chaypiqa waqaypas llakipakuypas uyarikunqachu.
20Manañan chaypiqa pisi p'unchaykunallamantachu wawaqa wañunqa,
runaqa llapallanmi thultu yuyaq kanankama kawsanqa,
pachak watayoq wañuqqa “waynallaraq wañuq” nisqan kanqa,
pachak wataman mana chayaspa wañuqqa “ñakasqa runa” nisqan kanqa.
21Wasitan wasichanqaku, hinaspan chaykunapi tiyanqaku,
uvastan mallkinqaku, chaypa rurusqantan mikhunqaku.
22Manan wakpa tiyananpaqchu wasichanqaku,
manan wakpa mikhunanpaqchu mallkinqaku.
Mallkiq kawsasqanta hinan llaqtayqa unayta kawsanqa,
akllakusqaykunaqa llank'asqankuq rurusqantan usachikunqaku.
23Manan yanqachu llank'anqaku,
manan wawankuqa mana wañunanpipaschu wañunqa,
ñoqa Señor Diosmi paykunatapas mirayninkutapas saminchashallasaqpuni.
24Manaraq waqyakamushaqtinkun ñoqaqa kutichimusaq,
rimashallaqtinkuraqmi ñoqaqa uyarisaq.
25Lobopas borregopas kuskan mikhunqaku,
leonpas toro hinan q'achuta mikhunqa,
mach'aqwaytaq ñut'u hallp'ata mikhunqa.
Manan pipas ch'uya orqoypa may cheqasllanpipas
ima mana allintapas ruwanqachu, nispa.
Currently Selected:
ISAÍAS 65: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
