ISAÍAS 54
54
Wiñaypaq Diospa munakuynin
1Señor Diosmi nin:
Mana wiksallikuq warmi, takiykuy,
Jerusalén, qanqa manan hayk'aqpas wachakurqankichu,
kunanqa takiykuy,
manan hayk'aqpas wachakuy nanaywan hap'ichikurqankichu,
kunanqa kusisqa qapariy.
Saqerparisqa warmiña karqanki chaypas,
casarasqa warmimantaqa aswan askha wawayoqraqmi kanki.
2Tiyasqayki karpata hatunyachiy,
ama mich'akuspa karpaykiq qatanankunata yapay,
waskhaykikunata hatunyachiy,
takarpuykikunata allinta takaykuy.
3Mast'arikunkin pañamanpas lloq'emanpas,
hatun suyukunatan mirayniykikunaqa qarqonqaku,
purunyachisqa llaqtankupipas tiyanqakun, nispa.
4Ama manchapakuychu, manan p'enqachisqachu kanki,
ama pukamanraq tukuychu, manan k'umuykachisqachu kanki,
aswanpas sipas kashaspa p'enqachisqa kasqaykitan qonqapunki,
viuda kashaspa k'amisqa kasqaykitapas manañan yuyarinkichu.
5Kamaqniykiqa qosaykin,
Tukuy-atiyniyoq Señor Diosmi sutinqa,
Israelpa Ch'uya Diosninqa kacharichiqniykichismi,
kay pachantinpa Diosninmi sutinqa.
6Diosniykin nisunki:
Qanqa sipasllaraqmi casarakurqanki,
hinaspan wikch'usqa kapurqanki,
chaymi wikch'usqa llakisqa sonqoyoq warmita hina waqyamushayki.
7Huk ratollan wikch'urqayki,
anchata khuyapayaspaytaqmi hoqarikapuyki.
8K'araktapuni phiñakuspaymi
huk ratolla qanmanta pakaykukurqani,
ichaqa wiñaypaq munakuspaymi llakipayashayki.
Kacharichiqniyki Señor Diosmi chayta niyki.
9Noepa p'unchayninkunapin jurarqani
manaña astawanpas hallp'a pachata unu millp'unanpaq,
chay hinatan kunanpas jurani
manaña qan contra phiñakunaypaq,
manaña qanta phiñarinaypaq.
10Orqokunapas kuyurinmanmi, moqokunapas thunikunmanmi,
qantan ichaqa munakushallasqaykipuni,
sumaq kawsanaykipaq rimanakusqaytapas hunt'ashallasaqmi, nispa.
Llakipayaqniyki Señor Diosmi chayta nin.
Mosoq Jerusalén llaqta
11Señor Diosmi nin:
Jerusalén llaqta, llakichisqan llakiq ñit'isqanmi kashanki,
manan pipas sonqochaykurqasunkichu.
Ñoqan ichaqa allinkaq teqsipi perqasqayki,
anqas umiñakuna patapin teqsichasqayki.
12Torreykikunatan puka-sansaq umiñakunawan perqasaq,
punkuykikunatan k'anchaq umiñakunamanta ruwasaq,
llapa perqaykikunatapas chaniyoq rumikunawanmi perqasaq.
13Llapa wawaykikunatan ñoqaqa yachachisaq,
paykunataq ancha allintapuni kawsanqaku.
14Chanin-kayta ruwaspan allinta sayanki,
manañan sarunchasunkikuchu,
manañan manchapakunkiñachu,
manapunin imapas manchachisunkiñachu.
15Manan ima awqatapas qan contra kachamusaqchu,
chhaynaqa pipas awqayki sayariqqa
atipasqan ñawpaqeykipi urmanqa.
16Ñoqan herrerota kamarqani k'illimisa sansa phukuqpaq,
paymi maqanakunapaq armata ruwan.
Ñoqallataqmi soldadotapas kamarqani hukkunata atipananpaq,
17ichaqa manan ima ruwasqa armapas imanasunkipaschu,
llapa ch'ataqniykitapas upallachinkin.
Chaytan kamachiykikunapaq ruwani,
chay hinatan atipachishani, nispa.
Señor Diosmi chay hinatapuni nin.
Currently Selected:
ISAÍAS 54: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
