ISAÍAS 42
42
Señor Diospa kamachin
1Señor Diosmi nin:
Kayqa kamachiyqa, ñoqan payta kallpachani,
paymi akllakusqay, paymi kusichiwan.
Paytan Espirituywan hunt'aykuni,
hatun suyukunamanmi chanin-kayta willanqa.
2Manan qaparkachanqachu, manan waqyakunqachu,
manan callekunapipas kunkanqa uyarikunqachu.
3Manan q'echusqa soqostaqa p'akinqachu,
manan q'osñishaq mechatapas wañuchinqachu,
cheqaqtapunin chanin-kayta churanqa.
4Manan pisipanqachu manan sayk'unqapaschu,
imachus chanin-kayta kay pachapi churanankama.
Mama qocha pata hatun suyukunataqmi
yachachikuy siminkunata maki suyashanqaku, nispa.
5Señor Diosmi hanaq pachata kamaspa mast'arirqan,
kay pachatapas chaypi kaqkunatapas ruwarqan,
chaypi tiyaq runakunatapas kawsachin,
chay patanta puriqkunamanpas samayta qoykun.
Paymi kamachinta nin:
6Ñoqa Señor Diosmi ruwarqayki waqyarqayki,
pusashaykin chanin yuyaykusqayta hunt'anaykipaq,
qanmi runakunawan sutiypi rimanakunki,
hatun suyukunapaqmi k'anchay kanki.
7Ñawsakunaq ñawintan kicharimunki,
presokunatan carcelmanta horqomunki,
tutayaqpi tiyaqkunatan watay wasimanta kacharichimunki, nispa.
8Ñoqallan Señor Diosqa kani,
manan pipas ñoqa hina qhapaqchasqaqa kanqachu,
ñoqallan yupaychasqaqa kanay, manan idolokunachu.
9Kayqa, ñawpaq willasqaykunan hunt'akunña,
kunantaqmi mosoqkunata willakusaq,
manaraq rikhurimushaqtinmi chaykunata willaykichis.
Qespichisqamanta Señor Diosta yupaychasqa
10Señor Diosman mosoq takita takiychis,
teqsimuyuntin payta yupaychaychis,
mama qochanta barcopi puriqkuna, payta yupaychaychis,
chaypi tiyaq animalkunapas, payta yupaychaychis,
mama qocha pata hatun suyu runakunapas, payta yupaychaychis.
11Ch'inneqpas chaypi kaq llaqtakunapas kusikuchunku,
karpakunapi tiyaq Kidar ayllu runakunapas kusikuchunku,
Petra llaqtapi tiyaqkuna kusisqa takichunku,
orqo patakunamantapacha kusisqa qaparichunku.
12Señor Diosta qhapaqchachunku, payta yupaychachunku.
mama qocha islakunapi payta yupaychachunku.
13Señor Diosmi kallpasapa runa hina lloqsin,
awqa-tinkuq runa hinapunin phiñakun,
kunkayoqta waqyakuspan: ¡Maqanakusunchis! nispa qaparin,
awqakunatataqmi atipan.
14Señor Diosmi nin:
Unayñan ch'inlla kasharqani,
upallakurqanin mukikurqanin,
kunanmi ichaqa wachakushaq warmi hina qaparkachasaq,
anchisaq, khuyayta samaqesaq.
15Orqokunatan moqokunatan thunisaq,
llapa q'omertan ch'akichisaq,
mayukunatan ch'aki pampaman tukuchisaq,
qochakunatan ch'akichisaq.
16Ñawsakunatan mana rikusqanku ñankunanta purichisaq,
mana rikusqanku ñankunantan paykunata pusasaq,
laqhayaqtan ñawpaqenkupi k'ancharichisaq,
ranratapas pampayachisaqmi.
Chaykunataqa ruwasaqpunin,
llaqtaytaqa manan saqerparisaqchu.
17Idolokunaman hap'ipakuqkunaqa,
rikch'aykunata: Qankunaqa diosniykun kankichis, nispa niqkunaqa
qhepaman kutichisqan sinchi p'enqachisqan kanqaku.
Israelpa ñawsa kasqan
18Roqt'ukuna, uyariychis,
ñawsakuna, rikunaykichispaq qhawariychis.
19¿Pin kamachiymantapas aswan ñawsaraq?
¿Pin kachasqay kachapuriymantapas aswan roqt'uraq?
¿Pin waqyakusqay llaqtamantapas aswan ñawsaraq?
¿Pin ñoqa Señor Diospa kamachiymantapas aswan roqt'uraq?
20Imaynatan rikurqanki, ichaqa manan chaykunata repararqankichu,
uyariytaqa atirqankin, ichaqa manan imatapas uyarirqankichu, nispa.
21Señor Diosmi chanin yuyaykusqanta hunt'ananpaq
yachachikuy simita hatuncharqan,
may hina chaniyoqchus kamachikuy siminqa kasqanta llaqtanman yachachirqan.
22Chaypas, kay llaqtatan suwarqanku llat'anarqanku,
llapallankutan qaqa wasikunaman wisq'arqanku,
carcelkunamanmi apaykurqanku.
Paykunatan llat'anarqanku,
manataq pipas paykunata kacharichiq karqanchu,
paykunatan suwaspa aparqanku,
manataq pipas: Kutichipuychis, nispa niqqa karqanchu.
23Chayri, ¿mayqenniykichistaq kayta uyarinqa?
Ima ninantachus kaykunaq nisqantari, ¿pitaq yuyaymananqa?
24¿Pin Jacobpa mirayninta qechunapaq qoykurqan?
¿Pin Israelta llat'anaqkunaman hap'iykachirqan?
¿Manachu Señor Dios chayta ruwarqan?
Pay contran huchallikurqanchis.
manan ñanninkunapi puriyta munarqanchischu,
manan yachachikuy simintapas kasurqanchischu,
25Chaymi Señor Diosqa k'arak phiñakuyninta chayachiwarqanchis,
hatun maqanakuywanpas muchuchiwarqanchis.
Muyuriqmantan kanaykuwarqanchis,
chaypas manan repararqanchischu,
ruphaykuwarqanchismi ichaqa manan kasukurqanchischu.
Currently Selected:
ISAÍAS 42: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
