ISAÍAS 38
38
Ezekiaspa onqosqan hampisqa kasqanpiwan
1Chay p'unchaykunapin Ezekiasqa sinchitapuni onqoykapurqan. Hinan Amozpa churin profeta Isaiasqa watuykukuq rispa nirqan: —Señor Diosmi nin: Testamentota ruwachikuy, wañukapunkin, manan qhaliyawaqñachu, nispan, nispa.
2Chaymi Ezekiasqa uyanta perqaman kutirispa Señor Diosmanta mañakurqan: 3Señor Diosníy, valekuykipunin imaynatachus servisqayta yuyarinaykipaq. Ñoqaqa tukuy sonqon chaninta servirqayki, sonqoykiman chayaqtataqmi ruwarqanipas, nispanmi, may khuyayta waqaykurqan.
4Chaymantataq Señor Diosqa kamachirqan Isaiasta: 5—Phaway, Ezekiasta nimuy: Machulayki Davidpa Diosnin Señormi nin: Uyarinin mañakuwasqaykita, rikunitaqmi ruwasqaykitapas, chaymi yapaykuyki chunka phisqayoq watatawan kawsanaykipaq. 6Qantapas Jerusalén llaqtatapas Asiria suyu reypa makinmanta qespichisaqmi. Ñoqan kay llaqtataqa awqanmanta waqaychasaq, nispan, nispayki.
21 #21-22 Kay versiculokunatan uraymanta apakamun, qhawariychis 2 Reyes 20.6-9Chaymantataq Isaiasqa nirqan: —Higosta kutaspa reypa ch'upunman laq'aychis, hinan qhaliyanqa, nispa. 22Ezekiastaq Isaiasta tapuykurqan: —¿Imaynapitaq yachasaq Dios yupaychana wasi rinaytari? nispa.
7Chaymi Isaiasqa nirqan: —Señor Diospa rimarisqan hunt'akunanta yachanaykipaqqa kaytan Diosqa ruwanqa: 8Intiq purisqanman hinan llanthuqa Ahazpa ruwasqan pata-patata uraykunña, chaywanpas paymi intita qhepaman kutichinqa chunka pata-pataman llanthuq wichanankama, nispa. Hinan intiqa chay nisqanta hinapuni qhepaman kutirqan.
9Judá suyu rey Ezekiasmi qhaliyasqanmanta kay takita kamarirqan:
10—Ñoqaqa yuyarqanin:
Kallpayoq kashaspaymi wañupusaq,
unay wata kawsayta manaña rikuspan
Wañuy-pachaman haykupusaq, nispan.
11Ñoqaqa yuyarqanin:
Kay pachapiqa manañachá Señor Diosta rikusaqchu,
kay pachapi kawsaqkunatapas manañachá qhawarisaqchu, nispaymi.
12Michiqkunaq ch'ukllan paskasqa hinan
kawsayniyqa paskaspa apasqa kapurqan.
Kawsayniyqa awa allwisqa q'aytu hinan,
Diostaq chaymanta wit'uqapuwaspa k'uyurqapuwan,
chay hinapin tuta p'unchay ñak'arichiwarqan.
13Illariq tutantinmi nanaymanta qaparirqani,
leonpas tulluykunata k'utushawanman hinaraq,
tuta p'unchaymi Diosqa ñak'arichiwarqan.
14Khallwakuna hinan waqarqani,
urpikuna hinan anchirqani,
ñawiypas utiwarqanñan hanaq pachata qhawarayashaqtiy,
¡Señor Diosníy, uyariway! Khuyaytan muchushani.
15Ñoqari, ¿ima niymantaq?
Pay Señor Diospunin chay hinata onqochishawan,
paytaq rimapayawarqan.
Tukuy p'unchay kawsayniypin k'umuykukuspa purisaq
sonqoypi phutikusqayrayku.
16Señor Diosníy,
rimapayasqaykiwan ruwasqaykipiwanmi runaqa kawsan,
ñoqapas chaykunawanmi kawsashani,
qanmi qhaliyachiwaspa kawsachiwarqanki.
17Cheqaqtapunin ñak'arisqayqa allinniypaq karqan,
munakuwaspaykin aya p'ampanaman rinaymanta hark'awarqanki,
llapan huchaykunatataq pampachawarqanki.
18Aya p'ampanapi kaqkunaqa manañan yupaychayta atisunkikuñachu,
wañusqa kaqkunaqa manañan hatunchasunkiñachu,
hallp'a ukhuman chinkaykapuqkunaqa manañan hunt'aq-kayniykipi suyankuñachu.
19Kawsaqkunallapunin yupaychaytaqa atisunki,
imaynan ñoqapas kunan ruwashani hinata.
Taytakunan wawankuman willanku hunt'aq-kayniykimanta.
20Señor Diosmi qespichiwanqa,
chay hinaqa arpanchista tocaspanchis takisunchis
Señor Dios yupaychana wasipi tukuy p'unchay kawsayninchispi, nispa.
Currently Selected:
ISAÍAS 38: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
