ISAÍAS 3
3
Judata Jerusalentawan Señor Diospa muchuchinan
1Tukuy-atiyniyoq Señor Diosmi
Judá suyuqpas Jerusalén llaqtaqpas tukuy imaymana necesitasqanta pisiyachinqa,
hinallataq lliw t'antatapas unutapas qechupunqa.
2Ch'usaqyachillanqataqmi allin qharitapas, awqa-tinkuqtapas,
jueztapas, profetatapas,
watuqtapas, kurak runatapas,
3capitantapas, respetana qharitapas,
yuyaychaqtapas, tukuy layqatapas.
4Hinaspa waynachakunallata umallinkupaq churanqa,
loqhe waynakunan kamachinqa.
5Runapurapas wasimasintinpas sarunchanakunqaku,
waynakunapas kurak runakuna contran sayarinqaku,
millay runakunapas allin runakuna contran sayarinqaku.
6Huk runan wawqenta taytankuq wasinpi hap'ispa ninqa:
Qanpaqa llaqollaykipas kashanmá,
umalliyku kapuy,
kay thunisqa llaqtapi kamachikuy, nispa.
7Hinan chay runaqa wawqenman kutichinqa:
Manan ñoqaqa chayta ruwaymanchu,
wasiypiqa manan kanchu mikhunaypas p'achaypas,
ama llaqta kamachiqtaqa churawaychu, nispa.
8Jerusalenqa misk'akunmi,
Judá suyuqa urmapunmi,
rimasqankupas ruwasqankupas Señor Dios contran,
Atiyniyoq Diostan uyanpi k'aminku.
9Sayapakuyninkun paykunataqa ch'atan,
manan huchankutaqa pakankuchu,
Sodoma llaqta hinan llapa runaman sut'inchanku.
¡Ay, paykunamanta!
Paykuna kikinkuq muchunankutan wakichikunku.
10Chanin runakunata niychis:
Qankunaqa allillanpunin kankichis, nispa,
paykunaqa ruwasqankuq ruruntan kusisqa chaskinqaku.
11¡Ay, mana chanin runamanta!
Paypaqqa manan allinchu kanqa,
payqa imaynatachus runamasinta muchuchirqan
chay hinallatataqmi muchunqa.
12Qolqe mañaqkunan llaqtayta sarunchanku,
qolqeq uñan sik'iqkunan llaqtayta k'umuchinku.
Llaqtalláy, kamachikuqniykikunaqa q'otusunkin,
q'ewisqa ñantan pusasunkipas.
13Señor Diosqa juzganapiñan kashan,
llaqtanta t'aqtananpaqmi sayarinña.
14Señor Diosmi juzgayta qallarispa
llaqta umallikunata, kurak runakunatawan nin:
Qankunan uvas chakrayta chaqonkichis,
wakchakunamanta suwakuspan wasiykichispi waqaychankichis.
15¿Pitaq qankunari kankichis
llaqtayta sarunchanaykichispaq,
wakchakunatapas alqochanaykichispaq?
Ñoqa Tukuy-atiyniyoq Señor Diosmi chayta nini, nispa.
Jerusalenpi kaq warmikunata muchuchisqan
16Señor Diosqa nillantaqmi:
Jerusalén llaqta warmikunan sinchita hatunchakunku,
umankuta hoqarispan purinku,
q'ewiykachakuspan purinku,
k'iskillapi thaskispan purinku,
chakinku sumaqchakusqankutan chhaqllaqechinku.
17Chaymi paykunata uma qarachiwan muchuchisaq,
p'aqla umatataq purichisaq, nispa.
18Chay p'unchaymi Señor Diosqa tukuy k'achanchakuyninkuta qechunqa: chakinku sumaqchanankuta, sumaqchasqa uma watanankuta, kunka walqanankuta, 19aretenkuta, maki walqanankuta, uma watanankuta, 20monterankuta, chakipaq cadenachankuta, chumpinkuta, q'apaq hawina pomochankuta, lloq'ekunanku q'aytunkuta, 21sortijankuta, senqa siwinkuta, 22sumaq p'achankuta, phullunkuta, llikllankuta, ch'uspankuta, 23espejonkuta, sumaq lino p'achankuta, uma k'uyunankuta, chalinankuta ima.
24Sumaq q'apaypa rantinpiqa asnaymi kanqa,
chumpiq rantinpitaq waskha kanqa,
sumaq ñaqch'akuypa rantinpitaq p'aqla uma,
sumaq p'achakunaq rantinpitaq kutinshu p'acha,
sumaq rikch'ayniyoq-kaypa rantinpitaq fierro pariwan marcay.
25Allin qharikunapas awqa-tinkuypin wañunqaku,
awqa-tinkuqkunapas maqanakuypin wañunqaku.
26Jerusalén llaqtaqa waqaykunqan,
yana p'achawanmi churakunqa,
wikch'usqa kaspanmi pampapi tiyaykunqa.
Currently Selected:
ISAÍAS 3: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
