ISAÍAS 14
14
Preso apasqamanta kutimpusqan
1Hinamantataq Señor Diosqa Jacobpa mirayninta khuyapayanqa, huk kutimantawanmi payqa Israel runakunata llaqtan kananpaq akllakunqa, hinaspa hallp'ankupi tiyachinqa. Wak llaqta runakunan paykunawan huñukuspa kuskapuni tiyanqaku. 2Israel runakunataqa askha suyukunan Señor Diospa qosqan hallp'aman kutipunankupaq yanapaspa riysinqa, hinaspa paykunaqa Israel runakunaq kamachin kapunqaku. Chay hinapin Israel runakunaqa preso apaqninkunata presota apanqaku, sarunchakuqninkunatataq kamachinqaku.
Babilonia reyta asipayanapaq taki
3Israel runakuna ñak'ariyniykikunamanta, llakikuyniykikunamanta, sinchi k'arak qatisqa kamachi-kaymantapas Señor Dios kacharichisuqtiykin, 4Babilonia reyta asipayanaykichispaq khaynata takinkichis:
¡Sarunchakuq runaqa imapiraqmi rikukun!
¡Manañan hayk'aqpas pitapas q'aqchanqañachu!
5Señor Diosqa mana chaninkunaq atiynintan ch'usaqyachirqan,
millay kamachikuqkunatan p'uchukachirqan.
6Paykunaqa suyukunatan k'arak phiñasqa muchuchirqanku,
mana p'itiytan waqtarqanku,
llaqtakunatan sinchi phiñasqa saruncharqanku,
mana khuyapayaspataq qatiykacharqankupas.
7Kunanqa kay pachantinmi thak-kaypi samarin,
chaypas kusikuymantan takin.
8Libanopi ciprés sach'akunapas cedro sach'akunapas
thunikusqaykimanta kusikuspan ninku:
Qanpa urmasqaykimantapachan mana pipas wit'uwankuñachu, nispa.
9Wañuy-pachapin hatun ch'aqway kashan
qanta chaskinasuykipaq,
chaypin kay pachantin wañuq umallinkuna rikch'arinku,
hatun suyukunaq wañuq reyninkunan tiyanankumanta sayarinku
qanta chaskinasuykipaq.
10Llapallanmi paykunaqa nisunkiku:
¡Ay! ¡Qanpas pisi kallpamá kapusqanki!
¡Ñoqayku hinan kanki!
11Qanqa ancha hatunchasqan karqanki,
arpakunawan tocanakunawan yupaychasqan karqanki,
kunantaq wañusqa kapushanki,
puñunaykipas kurukunan, qatanaykipas llawq'akunan, nispanku.
12¡Pacha Paqar Ch'aska! nisqan karqanki,
¡imaynan hanaq pachamanta urmaykamurqanki!
Qanqa suyukunata atipaq kashaspaykipas
pampaman wikch'umusqan karqanki.
13Sonqoykipin yuyaykurqanki:
Hanaq pachamanmi wicharisaq,
aswan altopi hatuchachaq ch'askakuna patapin kamachikuy tiyanayta churasaq,
dioskunaq huñukunan wichay lado orqopin kamachikusaq.
14Aswan altopi kashaq phuyukunaq hawanmanraqmi wicharisaq,
Qollana Dios hinaraqmi kasaq, nispayki.
15Ichaqa Wañuy-pachamanmi wikch'uykusqa karqanki,
Wañuy-pachaq aswan ukhunmanraq.
16Rikuqniykikunaqa allintapunin qhawaykusunki,
hinaspan qanmanta yuyapakunqaku:
¿Kay qharichu kay pachata khatatatachinman karqan
suyukunatapas thuninman karqan?
17¿Kay qharichu pachantinta purunyachinman karqan,
llaqtakunatapas atipanman kaqan,
presokunatapas wisq'arayachishallanman karqan? nispa.
18Suyukunaq llapa reyninkunaqa ancha sumaq p'ampanankupin p'ampasqa kanku,
19qantaq ichaqa aya p'ampanaykimantapas karuman wikch'usqa kanki,
mana imapaq serviq ch'aphra hina.
T'ustusqa kaspa ayaykipas maqanakuypi wañuchisqa ayakunawan p'ampasqa,
llapaykichistaq rumiyoq t'oqoman wikch'usqa.
20Manan wakin reykunata hinachu p'ampasunki
suyuykita waqllichisqaykirayku,
llaqtayki runakunatapas wañuchisqaykirayku.
¡Chay mana chanin runaq miraynintaqa amaña yuyarikuchunchu!
21¡Churinkunata wañurqarichinapaq wakichikuychis,
tayta-mamankuq mana chanin ruwasqanku hawa!
Paqtan paykuna kay pachata munaychakuq sayarinkuman,
llaqtakunatapas kay pachantinman hunt'aykachinkuman, nispa.
22Tukuy-atiyniyoq Señor Diosmi nin:
Ñoqan paykuna contra sayarisaq,
Babilonia sutitan p'uchukachipusaq,
paymanta lliw qhepaqkunatapas, wawankutapas, nietonkutapas chinkachisaqmi.
23Hat'ansillamanmi tukuchisaq,
qowiqowikunataq chaypi tiyanqa,
pichasqata hinan ch'usaqyachisaq, nispa.
Tukuy-atiyniyoq Señor Diosmi chayta sut'inchan.
Asiria suyuq thunisqa kanan
24Tukuy-atiyniyoq Señor Diosmi jurarqan:
Yuyaykusqayman hinapunin ruwasqa kanqa,
unanchasqayqa hunt'akunqapunin.
25Asiria runakunataqa muchuchisaqmi suyuypiqa,
paykunataqa sarunchasaqmi orqo-orqoykunapiqa.
Paykunaq yugonqa manan llaqtayta k'umuchinqañachu,
manañan llaqtaytaqa llasa q'epi hinachu ñit'iykunqaku.
26Ahinatan yuyaykuni kay pachantinta ruwanaypaq,
suyukunata muchuchinaypaqmi makiyta haywarini, nispa.
27Tukuy-atiyniyoq Señor Diosmi chayta yuyaykun,
manataqmi pipas hark'anmanchu,
makinqa muchuchinanpaq haywarisqallapunin kashan,
manataqmi pipas qolluchinmanchu.
Filistea runakuna contra willakuy
28Rey Ahazpa wañupusqan watapin Señor Diosqa nirqan:
29Filistea suyu,
ama kusikuychu muchuchiqniyki runaq atiynin p'uchukapusqanmanta,
chay mach'aqwayqa huk picaqtan paqarichinqa,
chay picaqtaq huk phalaq amaruta paqarichinqa.
30Qanpa runaykikunataqa yarqaymantan wañuchisaq,
pisilla puchuq runaykikunatapas chay awqan wañuchinqa.
Llaqtaypi kaq wakchakunatan ichaqa mikhuchisaq,
mana imayoqkunapas llakhillan kawsanqaku, nispa.
31¡Chay hinaqa, Filistea llaqtakuna, waqaychis,
nanaymanta qapariychis,
llaksakuspa khatatataychis!
Wichay ladomantan ati-phuyu hinaraq soldadokuna hamushanku,
paykunaqa manan ch'ullapas manchalichu kanku.
32¿Ñoqanchisqa ima nispataq kutichisunman chay suyuq kachamusqankunaman?
Ñoqanchisqa kutichisun:
Señor Diosmi Sión llaqtata allinta takyachin,
chaypin pakakunqaku llaqtanpi llakisqa runankuna, nispa.
Currently Selected:
ISAÍAS 14: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
