GÉNESIS 45
45
Wawqenkunaman Josepa reqsichikusqan
1Manañan Joseqa mukikuyta atirqanñachu lliwpa qayllanpi kaqkunaq ñawpaqenpi, chaymi kunkayoqta nirqan:
—¡Qayllaymanta lliwta lloqsichiychis! nispa. Hinan mana pipas paywan qheparqanchu wawqenkunawan José reqsichikushaqtin.
2Hinaspanmi qaparispa waqayta kachaykurqan, chaymi Egipto runakunapas uyarirqanku, Faraonpa wasinpi kaqkunapas uyarillarqankutaq. 3Josetaq wawqenkunata nirqan:
—Josemi kani, ¿kawsashanraqchu taytay? nispa.
Wawqenkunataq mana payman ima niytapas atirqankuchu, mancharisqa qayllanpi kashasqankurayku. 4Chaymi Joseqa paykunata nirqan:
—Qayllaykamuwaychis, nispa.
Paykunataq qayllaykurqanku. Paytaq nirqan:
—Wawqeykichis Josemi kani, Egiptoman vendewasqaykichis. 5Kunanqa ama llakikuychischu, amallataq kayman vendemuwasqaykichismanta ñakapakuychischu, Diosmi runata kawsachinanpaq ñawpaqeykichista kachamuwarqan. 6Ñan iskay wata yarqayña suyupi pasan, phisqa wataraqmi kashan, chaykunapin mana yapunqakuchu manallataq cosechanqakupaschu. 7Diosmi ñawpaqeykichista kachamuwarqan, qhepa mirayniykichista kay pachapi waqaychanapaq, utirayanatapuni kawsachinasuykichispaq. 8Chay hinaqa manan qankunachu kachamuwarqankichis, aswanpas Diosmi, paymi churawarqan Faraonpa yuyaychaqnin kanaypaq, lliw wasinpipas Egipto suyuntinpipas kamachikuq kanaypaqwan. 9Usqhaylla taytayman riychis, hinaspa nimuychis: Churiyki Josemi kay hinata nin: Diosmi Egiptontinpi kamachikuqta churawan, hampuy, ama qhepamuychu. 10Gosén hallp'apin tiyanki, qayllaypin kanki, qanpas wawaykikunapas, nietoykikunapas, uywaykikunapas, lliw ima hayk'a kaqniykipas. 11Chaypin mikhuchisqayki, ama wakchayayta muchunaykipaq qanpas aylluykipas, lliw ima hayk'a kaqniykipas, phisqa wata yarqayraqmi kashan, nispaykichis, nispa. 12Kayqa qhawashawankichismi, qan wawqéy Benjaminpas qhawashawankin Josepuni rimasqayta. 13Taytayman willamuychis Egiptopi lliw qhapaq-kayniyta, hinallataq lliw rikusqaykichistapas. Usqhaylla taytayta pusamuychis, nispa.
14Hinaspanmi wawqen Benjaminpa kunkan oqllaykusqa waqarqan, Benjaminpas waqallarqantaq oqllayninpi. 15Hinaspataq llapa wawqenkunata much'aykurqan, paykunata oqllaykuspataq waqarqan. Chay qhepatataq wawqenkunaqa paywan rimarqanku.
16Faronpa wasinpi kaqkunataq uyarirqanku: Josepa wawqenkunan hamusqa, nispa nisqata. Chaywanmi kusikurqan Faraonpas oficialninkunapas. 17Chaymi Faraonqa Joseta nirqan:
—Wawqeykikunata niy: Cargaychis uywaykichisman, hinaspa riychis, Canaán suyuman kutiychis. 18Hinaspataq taytaykichiswan aylluykichiskunawan ñoqaqman hampuychis. Ñoqan qosqaykichis Egiptopi allinnin hallp'ata, suyupi allinkaqtataq mikhunkichis, nispa. 19Kamachillaytaq: Kay Egipto suyumanta apaychis carretakunata wawaykichispaq warmiykichispaq, hinaspa pusamuychis taytaykichista, hampuychistaq. 20Amataq kaqniykichismanta llakikuychischu, Egipto suyu qhapaq-kayqa qankunaqmi kanqa, nispayki, nispa.
21Israelpa churinkunataq chay hinata ruwarqanku, Josemi paykunaman carretakunata qorqan Faraonpa kamachikusqanman hina, ñanninkupaqpas mikhunata qorqan. 22Sapankamantaq mosoq p'achata qorqan, Benjaminmantaq qorqan kinsa pachak qolqeta, phisqa sayay p'achatawan. 23Taytanmantaq apachirqan chunka asnopi Egiptopi allinnin kaqkuna cargarisqata, chunka china asnopi trigota, t'antata, mikhunata cargarisqata, mikhuna kaqtataq taytanpa ñanpi qoqawanpaq. 24Hinaspan wawqenkunata kacharparispa nirqan:
—Aman ñanpi phiñanakunkichischu, nispa.
Paykunataq ripurqanku. 25Egiptomanta ripuspa Canaán suyuman chayarqanku taytanku Jacobman. 26Hinaspan payman willarqanku:
—Kawsashanraqmi José, paymi Egipto suyuntinpi kamachikuq kasqa, nispa. Jacobtaq utirqanraq, manan paykunata creerqanchu. 27Josepa lliw rimasqanta payman willaqtinku, payta apanapaq apachimusqan carretakunatapas rikuqtin, Jacobpa sonqonqa kawsarirqan. 28Chaymi nirqan:
—¡Chayqa! Churiy José kawsashanraq, risaq, hinaspa payta rikumusaq manaraq wañukapushaspay, nispa.
Currently Selected:
GÉNESIS 45: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
