ÉXODO 40
40
Dioswan Tupana Karpaq sapaqchasqa kasqan
1Señor Diostaq Moisesta nirqan:
2—Ñawpaqkaq killa qallariy p'unchaypin Ñoqawan Tupana Karpata sayarichinki. 3Chaymanmi kamachikuy simiyoq cajata churanki, hinaspan chay cajata Ch'uyay-ch'uya Cheqas t'aqaq cortinawan pakanki. 4Apaykunki mesatapas, hinaspan chay patapi churanakunata churanki. Apaykullankitaqmi candelerotapas, hinaspan lamparachakunata churanki. 5Kamachikuy simiyoq caja chimpa cortinaq huk ladonpi incienso ruphachina qori altartapas churanki, cortinatapas karpa punkumanmi warkunki. 6Hinamantataqmi Ñoqawan Tupana Karpa punkuq ñawpaqen kanchapi sacrificio ruphachina altarta churanki. 7Chaymantataq puruñata churanki Ñoqawan Tupana Karpawan altarwan tupaypi, chay puruñamantaq unuta hich'aykunki. 8Hinaspataq kanchata cortinakunawan muyuchinki, kancha punku cortinatapas warkunki.
9Chaymantataq hawina aceiteta hap'ispa karpata ch'aqchunki tukuy imapas chaypi kashaqtawan. Chay hinatan ñoqapaq chayta t'aqapuwanki lliw imaymanantinta, hinan chayqa ch'uya kapunqa. 10Ch'aqchullankitaqmi sacrificio ruphachina altartapas tukuy imaymanantinta, chay hinatan altarta ñoqapaq t'aqapuwanki, chaymi Ch'uyay-ch'uya altar kapunqa. 11Ch'aqchullankitaqmi tiyanayoq puruñatapas, chay hinatan chayta ñoqapaq t'aqapuwanki.
12Chaymantataq Aaronta churinkunatawan Ñoqawan Tupana Karpa punkuman pusanki, hinaspan unuwan paykunata bañanki. 13Aarontan ch'uya p'achawan p'achachinki, hinaspan payta hawiykunki, chay hinatan ñoqapaq t'aqapuwanki sacerdotey kananpaq. 14Hinaspataq churinkunata asuykachikuspa sotanakunata churanki. 15Hinamantataq paykunata hawiykunki, taytanku hawisqaykita hina, chaymi sacerdoteykuna kanqaku. Hawisqa kasqankuwantaq paykunapas churinkupas sacerdotellaypuni kashanqaku, nispa.
16Moisesmi ruwarqan Señor Diospa tukuy kamachisqanman hinapuni. 17Chhaynaqa Egipto suyumanta lloqsimpusqanku iskaykaq wataq ñawpaqkaq killan qallariy p'unchaypi, karpaqa sayarichisqa karqan. 18Moisesmi karpata sayarichirqan, sayanakunatapas marconkunatapas suskhuq k'aspinkunatapas churarqan, sayaq k'aspinkunatapas sayachirqan. 19Chay patamanmi karpata mast'aykurqan, hinaspan chay patata qatawan qataykurqan, Moisesta Señor Diospa kamachisqanman hina. 20Chaymantataq kamachikuy simiyoq p'alta rumikunata hoqarispa caja ukhuman churaykurqan, hinaspataq suskhuq k'aspikunata cajaman suskhuchirqan, hinallataq kirpanata caja pataman churarqan. 21Hinaspataq cajata karpaman apaykurqan, hinaspan Ch'uyuy-ch'uya Cheqas t'aqaq cortinata warkuykuspa kamachikuy simiyoq cajata pakaykurqan, Moisesta Señor Diospa kamachisqanman hina.
22Mesatan karpa ukhu Ch'uya Cheqasman churaykurqan wichay ladoneqman. 23Chay mesa patamantaq Señor Diospa ñawpaqenpi churana t'antata tawqarqan, Moisesta Señor Diospa kamachisqanman hina. 24Candelerotan karpa ukhu Ch'uya Cheqasman churaykurqan mesa chimpa uray ladoneqman, 25hinaspan Señor Diospa ñawpaqenpi candeleroman lamparachakunata churarqan, Moisesta Señor Diospa kamachisqanman hina. 26Qori altartapas churaykullarqantaqmi karpa ukhu Ch'uya Cheqasman, t'aqaq cortinaq ñawpaqenman, 27hinaspan chay patapi q'apashaq inciensota ruphachirqan, Moisesta Señor Diospa kamachisqanman hina. 28Hinallataqmi karpa punku cortinata warkurqan. 29Hinaspan sacrificio ruphachina altarta karpa punkuq ñawpaqenpi churarqan, hinaspanmi altar patapi ruphachina sacrificiota ruru ofrendatapas haywarqan, Moisesta Señor Diospa kamachisqanman hina.
30Puruñatan karpawan altarwan tupaypi churarqan, chay puruñamantaq unuta hich'aykurqan mayllikunapaq. 31Moiseswan Aaronwan churinkunawantaq chaypi makinkuta chakinkuta mayllikuqku. 32Karpaman haykuspanku, altarmanpas qayllaykuspanku mayllikuqku, Moisesta Señor Diospa kamachisqanman hina. 33Chaymantataq karpayoq altarniyoq kanchatapas cortinakunawan muyuchirqan, kancha punku cortinatapas warkuykurqan. Chhaynatan Moisesqa Dioswan Tupana Karpa ruwayta tukurqan,
Karpa pataman phuyuq sayaykusqan
(Núm 9.15-23)
34Chaymantataq phuyuqa Dioswan Tupana Karpata pakaykurqan, Señor Diospa lliphlli-kayninpas karpata hunt'aykurqan. 35Manataqmi Moisesqa karpaman haykuyta atiqchu, chay patapi phuyu kashasqanrayku. Señor Diospa lliphlli-kayninpas chayta hunt'aykusqanrayku.
36Karpamanta phuyu wichariqtintaq, Israel runakunaqa karpankuta hoqarispa puririqku, 37phuyu mana wichariqtinmi ichaqa, chay phuyu wicharinan p'unchaykama mana puririqkuchu. 38Señor Diospa phuyunmi p'unchayqa karpa patapi kasharqan, tutataq chay patapi nina kasharqan, chay hinatan tukuy purisqankupi llapa Israel runakunaqa rikurqanku.
Currently Selected:
ÉXODO 40: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
