ÉXODO 39
39
Sacerdotekunapaq p'acha ruwasqamanta
(Ex 28.1-43)
1Ch'uya Cheqaspi servinapaq pallayniyoq p'achataqa ruwarqanku llawlli-puka, sani-puka, rawraq-puka q'aytumantan. Aaronpaqpas ruwallarqankutaqmi ch'uya p'achata, Moisesta Señor Diospa kamachisqanman hina.
2Ruwallarqankutaqmi unkutapas ñañuy-ñañu qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan. 3Qori llaphllakunatan takarqanku, chaykunamantataq ñañuy-ñañu qorita kuchurqanku. Hinaspan chay qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan munay pallayniyoqta awarqanku. 4Unkuq iskaynin rikra walqanantapas ruwallarqankutaq, ahinapin iskaynin lado huk awaylla karqan. 5Watanapaq unkupi chumpiqa unkuwan hukllan karqan, qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan awasqallataq karqan, Moisesta Señor Diospa kamachisqanman hina.
6Thuparqankun yanayoq yuraq umiña rumikunatapas, chaykunapin Israelpa churinkunaq sutinta sellota hina k'iñaspa qori ch'olqochinakunaman ch'olqochirqanku. 7Hinaspan chaykunata unkuq walqanankunaman churarqanku, Israelpa churinkuna yuyarichiq rumi kananpaq, Moisesta Señor Diospa kamachisqanman hina.
8Ruwallarqankutaqmi munay pallayniyoq qhasqo-ch'uspatapas, qorimanta, llawlli-puka, sani-puka, rawraq-puka q'aytumanta, ñañuy-ñañu linomantawan, unkuta hina awasqata. 9Chay ch'uspaqa tawa ch'ullpayoqmi karqan, anchonpas wask'anpas huk cuartakaman karqan. 10Chaymantaq tawa wachuchasqa umiña rumikunata k'askachirqanku. Ñawpaqkaq wachupin karqan puka umiña, q'ellu umiña, nina-qespi umiñapiwan. 11Iskaykaq wachupin siwar umiña, q'oyu umiña, qespi umiñapiwan karqan. 12Kinsakaq wachupin puka-samaq q'ellu umiña, ch'eqchi umiña sani umiñapiwan karqan. 13Tawakaq wachupitaq q'omer umiña, yanayoq yuraq umiña, yana-puka umiñapiwan karqan. Llapallanmi qoripikama ch'olqochisqa karqan. 14Chunka iskayniyoq rumin karqan, Israelpa chunka iskayniyoq churinkunaq sutinman hina. Sapanka rumipin sello hina k'iñasqa chunka iskayniyoq ayllumanta huknin suti karqan.
15Ruwallarqankutaqmi qhasqo-ch'uspapaq ch'uya qorimanta simp'asqa watukunatapas. 16Ruwallarqankutaqmi iskay qori ch'olqochinatapas iskay qori argollatapas, hinaspan chay iskay qori argollata qhasqo-ch'uspaq iskaynin wichay ch'ullpanman churarqanku. 17Hinaspan iskaynin qori watuta qhasqo-ch'uspaq ch'ullpankunapi kaq argollakunaman churarqanku. 18Chay watukunaq patantataq iskaynin ch'olqochinaman churarqanku, chay hinatan chay watukunata unkuq walqananman hap'ichirqanku. 19Ruwallarqankutaqmi iskay qori argollatapas, chaykunatan qhasqo-ch'uspaq iskaynin uray ch'ullpanman churarqanku, unkuwan tupaypi qhepa ch'ullpankunaman. 20Ruwallarqankutaqmi iskay qori argollatapas, chaykunatan churarqanku unkuq iskaynin walqana qallariy urapi, unku chumpi patapi. 21Hinan qhasqo-ch'uspa argollakunataqa unku argollakunaman llawlli-puka q'aytuwan watarqanku, chhaynapi qhasqo-ch'uspaqa kikin unku chumpi patapi kananpaq, amataq unkumanta qhasqo-ch'uspaqa lloqsinanpaq, Moisesta Señor Diospa kamachisqanman hina.
22Unkupaqmi llaqollata llawlli-puka q'aytumanta awarqanku. 23Chawpinpin umapaq khallu karqan, chay khallu muyuriqta q'empisqa allin-allinta sirarqan qara chalecoq kunkanta hina, ama llik'irparikunanpaq. 24Llaqolla ruedo muyuriqmantaq churarqanku llawlli-puka, sani-puka, rawraq-puka q'aytumanta, ñañuy-ñañu linomantawan awasqa granadakunata. 25Hinallataqmi ruwarqanku ch'uya qori campanillakunatapas, muyuriqnintin llaqolla ruedopitaq granadakuna ukhupi chawpinarqanku, 26huknin campanillaq qhepanman huk granada, hukkaq campanillaq qhepanmanpas huk granada. Chay hinan servinapaq Aaronpa churakunan llaqollaqa karqan, Moisesta Señor Diospa kamachisqanman hina.
27Awapullarqankutaqmi ñañuy-ñañu lino sotanakunatapas Aaronpaq churinkunapaqpas, 28hinallataq ñañuy-ñañu linomanta awasqa uma k'uyunatapas, chukukunatapas, calzoncillokunatapas. 29Hinallataq chumpitapas munay pallayniyoqta awarqanku llawlli-puka, sani-puka, rawraq-puka q'aytumanta, ñañuy-ñañu linomantawan, Moisesta Señor Diospa kamachisqanman hina.
30Hinallataqmi uma sacerdotepaq ch'uya llaphllatapas ch'uya qorimanta ruwarqanku, hinaspan chaypi sello k'iñasqata hina qelqarqanku:
“Señor Diospaq t'aqasqa” niq simita. 31Hinaspanmi chayman llawlli-puka watuta churarqanku, uma k'uyunaq ñawpaqenman watanapaq, Moisesta Señor Diospa kamachisqanman hina.
Karpa ruwaypa tukukusqan
(Ex 35.10-19)
32Chhaynatan Dioswan Tupana Karpa ruwayqa hunt'asqa tukukurqan. Israel runakunaqa Moisesta Señor Diospa kamachisqanman hinan chay kikillanta ruwarqanku. 33Hinaspan Dioswan Tupana Karpata Moisesman apamurqanku tukuy imaymanantawan:
ganchonkunata, marconkunata, suskhuq k'aspinkunata, sayaq k'aspinkunata, sayanankunata, 34puka teñisqa anejo qarakunamanta qatata, llamp'uy-llamp'u qarakunamanta qatata, Ch'uyay-ch'uya Cheqasta t'aqaq cortinata, 35kamachikuy simiyoq cajata, suskhuq k'aspikunata, kirpanata, 36mesata, tukuy imaymanantawan, Diospa ñawpaqenpi churana t'antata, 37ch'uya qori candelerota, maychus kananpi lamparachakunata tukuy imaymanantawan, k'anchaqpaq aceiteta, 38qori altarta, hawina aceiteta, q'apashaq inciensota, karpa punku cortinata, 39bronce rejillayoq bronce altarta, suskhuq k'aspinkunata, tukuy imaymanantinta, tiyanayoq puruñata, 40kancha cortinakunata, sayaq k'aspikunata, sayanankunantinta, kancha punku cortinata, waskhankunata, takarpukunantinta, Dioswan Tupana Karpapi servinapaq tukuy imaymanatawan. 41Ch'uya Cheqaspi servinapaq pallayniyoq p'achatapas, sacerdote Aaronpaq ch'uya p'achatapas, hinallataq churinkunaq p'achantapas, sacerdote-kayninkupi servinankupaq.
42Moisesta Señor Diospa imaymana kamachisqanman hinapunin Israel runakunaqa tukuy imatapas ruwarqanku. 43Moisesmi tukuy ruwasqankuta qhawaspa repararqan Señor Diospa kamachisqanman hina ruwasqankuta, hinaspan paykunata samincharqan.
Currently Selected:
ÉXODO 39: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
