ÉXODO 29
29
Aaronwan churinkunawanmi Diospaq t'aqasqa
(Lv 8.1-36)
1Sacerdotey kanankupaq paykunata t'aqanapaqqa kay hinatan ruwanki:
Mana imanasqalla torillota iskay anejotawan hap'iy. 2Trigo ñut'u hak'umantan ruwanki mana qonchuyoq t'antata, aceitewan q'apisqa mana qonchuyoq tortillata, hinallataq aceitewan ch'aqchuykusqa mana qonchuyoq llaphllallaña t'antatapas, 3chaykunatan huk canastaman churanki. Canastaman churaykusqatataq torillotawan iskay anejotawan kuskata haywanki.
4Hinaspa Aarontawan churinkunatawan Dioswan Tupana Karpa punkuman pusaspayki unuwan bañachinki. 5Hinamantataq p'achakunata hoqarispayki Aaronman churaykunki sotanata, unku llaqollata, unkuta, qhasqo-ch'uspatawan, unku chumpitapas wataykunkin. 6Umanmanmi uma k'uyunatapas churaykunki, uma k'uyunamantaq qorimanta ch'uya llaphllata churanki. 7Hinaspataq hawina aceiteta hoqarispayki umanman hich'aykuspa payta hawiykunki.
8Churinkunapas asuykamullasunkitaq, hinan paykunamanpas sotanata churaykunki, 9chumpiykachinki, churaykullankitaqmi uma chukutapas. Ahinatan Aarontapas churinkunatapas sacerdotey kanankupaq churanki. Paypa ayllunqa sacerdotellapunin kashanqa.
10Chaymantataq Dioswan Tupana Karpaq ñawpaqenman torillota apanki, Aaronwan churinkunawantaq makinkuta torilloq uman pataman churaykunqaku. 11Ñoqa Señor Diospa ñawpaqeypin chay torillota karpa punkupi nak'anki. 12Hinaspataq yawarta hoqarispayki dedoykiwan altar waqrakunata llusiykunki, chay puchuq yawartataq llapallanta altar chakiman hich'aykunki. 13Hoqarillankitaqmi wiksa llika wiratapas sullk'a k'ipchantapas, iskaynin ruruntapas chaykuna qayllapi kaq wirantinta, hinaspan chaykunata altarpi ruphachinki. 14Torillo aychatan ichaqa qarantinta phusnuntinta karpa-karpa hawapi kanaykunki, chayqa huchapaq haywasqan.
15Hap'illankitaqmi huknin anejotapas, Aaronwan churinkunawantaq chaypa uman pataman makinkuta churaykunqaku. 16Chaymantataq chay anejota nak'anki, yawarnintataq altarman altar muyuriqmanwan hich'aykunki. 17Hinaspataq chay anejota kuchurqarinki, ch'unchulninkunatapas chakinkunatapas maqchinki, chaymantataq chaykunata kuchurqarisqakunatawan umantawan kuskata churanki. 18Hinaspanmi anejota llapanta altar patapi kananki, chayqa ruphachina sacrificion, ñoqa Señor Diospaq mikhuna ofrendan, q'apaynintaq sonqoyman chayan.
19Hinan hukkaq anejota hap'inki, Aaronwan churinkunawantaq chaypa uman pataman makinkuta churaykunqaku. 20Chaymantataq chay anejota nak'anki, yawarninta hoqarispaykitaq Aaronpa paña ninrin ura puntata llusiykunki, hinallataq churinkunaq paña ninrin ura puntatapas, kaqllataq paña makinkuq paña chakinkuq mama dedontapas, puchuq yawartataq altarman altar muyuriqmanwan hich'aykunki. 21Altarpi kaq yawarmanta, hawina aceitemantawan hoqarispataq ch'aqchuykunki Aaronta, p'achantawan churinkunatawan, paykunaq p'achantawan. Chay hina ch'uyachasqan payqa kanqa, p'achanpas, churinkunapas, churinkunaq p'achanpas paywan kuska.
22Chaymantataq hap'inki sacerdotekuna churana anejoq wiranta, chupanta, wiksa llika wiranta, sullk'a k'ipchanta, iskaynin rurunta, chaykuna qayllapi kaq wirata, paña chakantawan. 23Canastapi ñoqaman haywasqa mana qonchuyoq t'antakunamantapas hoqarillankitaq huk t'antata, aceitewan q'apisqa tortillata, llaphllallaña t'antatawan. 24Hinaspan chay llapallanta Aaronman churinkunamanwan qoykunki, paykunataq ñoqapaq chaykunata sumaq sonqo allinnin ofrenda kananpaq t'aqanqaku. 25Hinamantataq chayta makinkumanta chaskispa ruphachina sacrificio patapi ruphachinki, sonqoyman chayaq q'apay kananpaq. Chayqa ñoqapaq mikhuna ofrendan. 26Hoqarillankitaqmi Aarón sacerdote churana anejoq pechontapas, hinaspan chayta ñoqapaq sumaq sonqo allinnin ofrendata t'aqapuwanki. Chaykaqtaqmi qanpaq kanqa. 27Sumaq sonqo allinnin ofrenda t'aqasqa anejoq pechonpas paña chakanpas Aaronpaqwan churinkunapaqwanmi kanqa. 28Nispaqa, Israel runakuna sumaq kawsay sacrificiota haywaqtinkuqa, pechonwan chakanwanqa sacerdotekunapaqmi kanqa, ñoqan chayta kamachikuni chay hinallapuni kananpaq, chay hinatan haywawanqaku.
29Aaronpa wañukapusqan qhepataqa churinkunan ch'uya p'achankunata chaskinqaku, chaykunawanmi p'achaykukunqaku hawisqapas churasqapas kanankupaq. 30Aaronpa rantinpi sacerdote kapuq churinqa qanchisnintin p'unchaymi chaykunawan p'achakunqa, Dioswan Tupana Karpaman haykuspa Ch'uya Cheqaspi servinankupaq. 31Sacerdote churanapaq anejo aychatan huk karpaq ch'uya kanchanpi t'impuchinki. 32Aaronwan churinkunawantaq Dioswan Tupana Karpa punkupi anejo aychata canastapi kaq t'antata mikhunqaku. 33Sacerdote churasqa kashaqtinku ch'uyanchasqa kashaqtinku huchanku pampachanapaq sacrificio haywasqa karqan, chaykunatan mikhunqaku, wak runan ichaqa mana chaykunata mikhunqachu, ch'uya kasqanrayku. 34Sacerdote churanapaq aychamantachus t'antamantachus paqarisninkama imallapas puchunqa chayqa, ninawanmi puchuqtaqa ruphachipunki, manataqmi pipas chaytaqa mikhunqachu, chayqa ch'uya kasqanrayku.
35Tukuy imaymanata qanman kamachisqayta hinan Aaronpaqwan churinkunapaqwan qanchisnintin p'unchay ruwanki sacerdote kanankupaq. 36Sapa p'unchaymi huk torillota haywanki huchata pampachanapaq, altartan ch'uyanchanki huchata pampachanapaq ofrendata chay patapi haywaspayki, hinaspa aceiteta patanman hich'aykunki ch'uyanchanapaq. 37Qanchisnintin p'unchaymi altar ch'uyanchanapaq ofrendata haywanki. Chhaynatan chayta Diospaq ch'uyanchanki chaymi ch'uyallaña altar kanqa, imallapas altarta tupaykuqqa Diospaq t'aqasqan kapunqa.
Sapa p'unchay ofrenda
(Núm 28.1-8)
38Sapa p'unchaymi mana p'itiyta watayoq iskay borregota altarpi haywanki. 39Huknintan tutamanta haywanki, hukkaqtataq rasphiyaykuyta haywanki. 40Ñawpaqkaq borregota haywaspaykiqa huk kilo ñut'u hak'uwan huk litro ch'irwasqa olivo aceitewan chapusqata haywanki, hinallataq huk litro vinotapas hich'aykunki. 41Hukkaq borregotataq rasphiyaykuyta haywanki, tutamanta hak'u ofrendatawan vino hich'aykusqatawan haywasqankuta hina, chayqa ñoqa Señor Diospaq mikhuna ofrendan, q'apaynintaq sonqoyman chayan. 42Chay hina ruphachina ofrendakunatan mirayniykichiskunaqa ñawpaqeypi Karpa punkupi haywallawanqakupuni, chaypin qanman rimaykunaypaq qanwan tupasaq. 43Chaypin Israel runakunawan tupasaq, chay cheqastataqmi lliphlli-kayniy ch'uyanchapunqa. 44Ch'uyanchasaqmi Karpatapas altartapas, ch'uyanchallasaqtaqmi Aarontapas churinkunatapas sacerdotey kanankupaq. 45Israel runakunawanmi tiyasaq, Diosninkutaq kasaq. 46Ahinapin paykunaqa ñoqa Apu Señor Diosninku kasqayta yachanqaku, paykuna ukhupi tiyanaypaqmi Egipto suyumanta horqomurqani. Ñoqan Apu Señor Diosninku kani.
Currently Selected:
ÉXODO 29: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
