ÉXODO 26
26
Diospa tiyanan karpa
(Ex 36.8-38)
1Ñañuy-ñañu linomanta, llawlli-puka, sani-puka, rawraq-puka q'aytumantawan chunka cortinata awanki, raphrayoqkunaq rikch'aynin munay pallayniyoqta, chay cortinakunawanmi karpata ruwanki. 2Sapanka cortinan chunka iskayniyoq metro phisqa chunka centímetro sayayniyoq kanqa, iskay metro anchoyoqtaq. Llapa cortinan chay sayaykama kanqa. 3Phisqa cortinan ch'antaspa sirasqa kanqa, hukkaq phisqa cortinapas ch'antaspallataq sirasqa kanqa. 4Ñawpaq t'aqa tukukuy cortina puntapin llawlli-puka q'aytu ninrichasqakunata churanki, qhepa t'aqa cortina puntapipas ninrichallankitaqmi. 5Phisqa chunka ninrichasqakunatan ñawpaqkaqpi ruwanki, phisqa chunka ninrichasqatataq qhepakaqpipas ruwanki, ninrichasqakunaqa qhawapunasqan kanqa. 6Ruwallankitaqmi phisqa chunka qori corchetetapas iskaynin t'aqa cortinata huñuykunanpaq, chhaynapin ch'ulla karpalla kapunqa.
7Awallankitaqmi cabra suphumanta cortinakunatapas karpata qatanapaq, chunka hukniyoq cortinatan awanki. 8Sapanka cortinan chunka kinsayoq metro phisqa chunka centímetro sayayniyoq kanqa, anchontaq iskay metro. Kaq sayaykamallan kanqa chunka hukniyoqnintin cortina. 9Phisqa cortinatan ch'antaspa siranki, soqta cortinatapas ch'antallankitaq, soqtakaq cortinatataq karpaq ñawpaqen ladopi q'empinki. 10Ñawpaq t'aqa tukukuy cortina puntapipas ruwallankitaqmi phisqa chunka ninrichasqakunata, qhepakaq t'aqa tukukuy cortina puntapipas phisqa chunka ninrichasqakunallatataq ruwanki. 11Ruwallankitaqmi phisqa chunka bronce corchetetapas, chaykunatan ninrichasqakunata suskhuchinki, hinaspan huñunki ch'ulla qatalla kananpaq. 12Qata cortinakunataq aswan hatun kanqa chayqa, cortinamanta kuskan puchuqqa karpa qhepa patamantan warkukunqa. 13Hinallataqmi karpaqa iskay ladoman hatun puchuq warkukuqwan qatasqa kanqa, huknin ladoman kuskan metro hukkaq ladomanpas kuskan metro.
14Karpapaqqa ruwallankitaqmi anejo qarakunamanta puka teñisqa qatata, patanpaqpas llamp'uy-llamp'u qarakunamanta huk qatata.
15Karpapaqqa ruwallaytaq acacia k'aspi marcokunata, chaykunatan allinta sayachinki. 16Sapanka marcon tawa metro phisqa chunka centímetro sayayniyoq kanqa, anchontaq soqta chunka phisqayoq centímetro. 17Sapanka marcon iskay chakiyoq kanqa, chay hinatan llapa marcota karpapaq ruwanki. 18Marcokunata karpapaq ruwaspaykiqa, iskay chunka marcotan ura kinray ladopaq ruwanki. 19Hinallataq tawa chunka qolqe sayanata iskay chunka marcopaq ruwanki, sapanka marcopaq iskay sayanata iskaynin chakipaq. 20Hinallataq karpaq hukkaqnin ladopaqpas, wichay kinray ladopaqpas, iskay chunka marcota ruwanki, 21tawa chunka qolqe sayanantinta, sapanka marco iskay sayanayoq kananpaq. 22Karpaq qhepanpaqtaq, inti haykuy ladopaq, soqta marcota ruwanki. 23Iskay marcotawan karpaq qhepa esquinankunapaq ruwanki. 24Chay marcokunaq uranmi anchorisqa kanqa, umantaq huk anillollaman suskhunqa, chhaynan chay iskay marcopas kanqa iskaynin esquinapaq. 25Nispaqa, pusaq marcon kanqa chunka soqtayoq qolqe sayanayoqkama, sapanka marco iskay sayanayoqkama.
26Ruwallankitaqmi acacia kurkumanta phisqa k'aspikunatapas karpaq huknin lado marcokunapaq, 27hinallataq phisqa k'aspikunatapas karpaq hukkaqnin lado marcokunapaq, hinallataq phisqa k'aspikunatapas karpaq qhepan lado marcokunapaq, inti haykuy ladopaq. 28Chawpinta puriq k'aspitaq huk esquinamanta huk esquinakama marcokunaq kuskanninta suskhunqa. 29Hinamantataq chay marcokunata qori llaphllawan k'uyunki, ruwallankitaqmi qori argollakunatapas k'aspikuna suskhunanpaq, chay k'aspikunatapas qori llaphllawanmi k'uyunki.
30Chaymantataq karpata ruwanki imaynatachus kay orqopi qhawachiyki chay kikillanta.
31Ñañuy-ñañu linomanta, llawlli-puka, sani-puka, rawraq-puka q'aytumantawan cortinata awanki, raphrayoqkunaq rikch'aynin munay pallayniyoqta. 32Hinaspa qori ganchokunawan chayta warkunki qori llaphllawan k'uyusqa acacia k'aspi tawa postekunaman, chaykunaqa qolqemanta tawa sayanakunaman sayachisqan kanqa. 33Chay cortinatan corchetekunaq uranpi warkunki, chay cortina qhepamantaq kamachikuy simiyoq cajata apaykunki. Chay cortinataq t'aqanqa Ch'uya Cheqasta Ch'uyay-ch'uya Cheqastawan. 34Ch'uyay-ch'uya Cheqaspitaq kamachikuy simiyoq caja pataman kirpanata churanki. 35Mesatan Ch'uya Cheqaspi churanki, karpaq wichay ladonpi, candelerotataq mesaq chimpanpi, karpaq uray ladonpi.
36Karpa punkupaq huk cortinata ruwanki ñañuy-ñañu linomanta, llawlli-puka, sani-puka, rawraq-puka q'aytumantawan munay pallayniyoq awasqamanta. 37Cortinapaqpas ruwallankitaqmi qori llaphllawan k'uyusqa acacia k'aspi phisqa postekunata qori ganchoyoqtakama, postekunapaqpas phisqa bronce sayanakunatan unuyachispa ruwanki.
Currently Selected:
ÉXODO 26: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
