ÉXODO 25
25
Diospa tiyanan karpapaq qosqakuna
(Ex 35.4-9)
1Señor Diosmi Moisesta nirqan:
2—Israel runakunata nimuy ñoqapaq ofrendata apamunankupaq. Ofrendataqa chaskipuwankichis pipas kikillanmanta tukuy sonqo apamuqmantan. 3Kaykunatan chaskinkichis:
qorita, qolqeta, cobreta, 4llawlli-puka q'aytuta, sani-puka q'aytuta, rawraq-puka q'aytuta, ñañuy-ñañu lino q'aytuta, cabra suphuta, 5puka teñisqa anejo qarakunata, llamp'uy-llamp'u qarakunata, acacia sach'a kurkuta, 6lamparakunapaq aceiteta, hawina aceitepaqpas q'apashaq inciensopaqpas q'apaqkunata, 7yanayoq yuraq umiña rumikunata, umiña rumikunatapas uma sacerdoteq unkunman qhasqo ch'uspanmanwan ch'olqochinapaq. 8Hinaspan yupaychana karpata ruwapuwanqaku paykuna ukhupi tiyanaypaq. 9Chay tiyanaytaqa tukuy imaymanantapas ruwankichis imaynatachus qanman rikuchisqayki chay kikillantan.
Rimanakuy caja
(Ex 37.1-9)
10Acacia kurkumanta cajata ruway, wask'anmi huk metro chunka centimetroyoq kanqa, anchonmi soqta chunka phisqayoq centímetro, sayaynintaq soqta chunka phisqayoq centímetro. 11Ukhunta hawantan ch'uya qori llaphllawan qatanki, ch'uya qoriwanmi chay patata muyuriqta ribetenki. 12Ruwallankitaqmi chaypaq tawa qori argollata, chaykunatan tawantin chakiman churanki, iskayta huknin qhataman iskaytataq hukkaqnin qhataman. 13Acacia kurkumanta k'aspikunatan ruwanki, chaykunatan qori llaphllawan k'uyunki. 14Hinaspan caja qhatapi kaq argollakunanta chay k'aspikunata suskhuchinki, chaykunawan cajata wantunankupaq. 15Chay k'aspikunaqa caja qhatakunapin kanqa, manan chaymanta horqokunqachu. 16Chay cajapitaqmi churanki qanman qosqayki chay kamachikuy simi qelqasqa iskaynin p'alta rumikunata.
17Ruwallankitaqmi ch'uya qorimanta caja kirpanatapas, hucha pampachana cheqas kananpaq, wask'anmi huk metro chunka centimetroyoq kanqa, anchontaq soqta chunka phisqayoq centímetro. 18Kirpanaq iskaynin puntanpi qorimanta takasqa iskay raphrayoqkunatapas ruwallankitaqmi. 19Huknin puntapin huk raphrayoqta ruwanki, hukkaqnin puntapitaq hukkaq raphrayoqta, kirpanatawan iskaynin puntapi raphrayoqkunatawanqa hukllatañan ruwanki. 20Hucha pampachana cheqaspi qhawanakushaqmi kashanqa, raphrayoqkunataq chay cheqaspa patanman mast'arikunqa llanthuykunanpaq. 21Kirpanatataq caja pataman churanki, cajapitaq qanman qosqay kamachikuy simi qelqasqa iskaynin p'alta rumikunata churanki. 22Hucha pampachana cheqaspin qanwan tupasaq, hinaspan caja patapi iskaynin raphrayoqkuna ukhumanta qanwan rimasaq Israel runakunapaq imakunatachus qanman kamachisqayta.
Diospa ñawpaqenpi churana t'antapaq mesa
(Ex 37.10-16)
23Hinallataqmi acacia kurkumanta mesata ruwanki, wask'anmi huk metro kanqa, anchontaq kuskan metro, sayaynintaq qanchis chunka centímetro. 24Ch'uya qori llaphllawanmi chayta qatanki, qoriwanmi muyuriq patanta ribetenki. 25Mesa puntatan qanchis centímetro anchoyoqta kanchachanki, chaytataq ruwanki qori ribetewan muyuchisqata. 26Ruwallankitaqmi tawa qori argollatapas, chaykunatan tawantin chaki qhataman churanki. 27Argollakunaqa puntawan kuskan kanqa, mesa wantuna k'aspikuna chaykunata suskhunanpaq. 28Mesa wantuna k'aspikunataqa acacia kurkumantan ruwanki, qori llaphllawanmi chaykunata k'uyunki, chaykunawanmi mesaqa apasqa kanqa. 29Ch'uya qorillamantataqmi ruwanki qhata p'ukukunata, pocillokunata, vino hich'ana ofrendakunapaq qerukunata, p'uktu p'ukukunatawan. 30Chay mesa patapiqa ñawpaqeypi t'antataqa churarayachishallankipunin.
Qori candelero
(Ex 37.17-24)
31Ruwallankitaqmi ch'uya qori candelerotapas, candelerotaqa takasqatan ruwanki. Tiyananpas, k'aspinpas, t'ikankunapas, mukmunkunapas, phanchisqankunapas kikillanmantan kanqa. 32Soqta k'allman ladonkunapi kanqa:
kinsa k'allma huknin ladopi, kinsa k'allmataq hukkaq ladopi. 33Candelero k'aspimanta p'alqariq soqtantin k'allman almendro t'ika hina kinsa t'ikayoqkama kanqa, mukmuntin phanchisqantin. 34Candelero chawpi k'aspipipas almendro t'ika hina tawa t'ikayoqmi kanqa, mukmukunantin phanchisqakunantin. 35Sapa iskay k'allman chawpi k'aspipi huk mukmu patapi tiyanqa. 36Mukmunkunapas k'allmankunapas kikillanmantan chawpi k'aspipi kanqa, llapallanmi ch'uya qorimanta huk-nisqalla takasqa kanqa. 37Ruwallankitaqmi qanchis lamparachakunatapas, chaykunatan k'allma patamankama churanki ñawpaqman k'anchananpaq. 38Pábilo allichanakunapas uspha p'ukuchakunapas ch'uya qorimantan kanqa. 39Kinsa chunka kinsayoq kilo ch'uya qorimantan ruwanki candelerota tukuy imaymanantinta. 40Chaykunata orqopi qhawachishayki chay kikillantapuni ruway.
Currently Selected:
ÉXODO 25: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
