ÉXODO 20
20
Chunka kamachikuy simi
(Dt 5.1-21)
1Tukuy kay simikunatan Diosqa rimarqan:
2Ñoqan Apu Señor Diosniyki kani, Egipto suyupi kamachi kasqaykimanta horqomuqniyki.
3Aman ñoqamanta wak dioskunayoqchu kanki.
4Aman ima rikch'aytapas ruwakunkichu, hanaq pachapi kaqman rikch'akuqtapas, kay pachapi kaqman rikch'akuqtapas, kay pachaq ukhun unupi kaqman rikch'akuqtapas. 5Aman chaykunaman k'umuykukunkichu, amallataq chaykunata yupaychankipaschu, ñoqa Apu Señor Diosniykiqa sienteq Diosmi kani. Ñoqan cheqnikuwaqniy tayta-mamakunata huchallikusqankumanta muchuchini, hinallataq wawankunatapas, nietonkunatapas, nietonkuq wawankunatapas. 6Munakuwaqniykunata kamachikuyniykunata hunt'aqkunatan ichaqa mana p'itiyta waranqa miraykama munakuni.
7Aman sutiyta mana allinpaq hoqarinkichu, ñoqa Apu Señor Diosniykiqa mana allinpaq sutiyta hoqariqtaqa manan hinallatachu qhawasaq.
8Samana p'unchayta yuyariy ñoqapaq t'aqanaykipaq. 9Soqta p'unchaymi llank'anki, tukuy ima ruwanaykitapas ruwanki, 10qanchiskaq p'unchaymi ichaqa ñoqa Apu Señor Diosniykipaq t'aqasqa samana. Aman chaypiqa ima ruwanatapas ruwankichischu, qanpas, churiykipas, ususiykipas, qhari kamachiykipas, warmi kamachiykipas, uywaykipas, llaqtaykipi tiyaq wak llaqtayoqpas. 11Soqta p'unchaypin ñoqa Señor Diosqa ruwarqani hanaq pachata kay pachatawan, mama qochata, chaykunapi lliw imaymana kaqkunatawan, qanchiskaq p'unchaypitaqmi samarqani, chaymi ñoqaqa samana p'unchayta samincharqani hatun p'unchayman tukuchirqani.
12Taytaykita mamaykita yupaychay, ñoqa Apu Señor Diosniyki qanman qosqay hallp'api unayta kawsanaykipaq.
13Aman pitapas wañuchinkichu.
14Aman wasanchankichu.
15Aman suwakunkichu.
16Aman runa-masiykita llullakuspa tumpankichu.
17Aman munapayankichu runamasiykiq wasinta, warminta, qhari kamachinta, warmi kamachinta, toronta, asnonta, runamasiykiq imantawanpas, nispa.
Israel runakunaq Diosta manchakusqan
(Dt 5.22-23)
18Llapa Israel runakunan q'aqyaqeykunatapas pututu waqaytapas uyarirqanku, lliphllikiykunata q'osñiq pakasqan orqotapas rikurqanku, chaymi paykunaqa mancharikuspanku karullapi sayaykurqanku. 19Moisestataq nirqanku:
—Qanlla rimapayawayku, ñoqaykutaq uyarisqaykiku, Dios ichaqa ama ñoqaykuman rimachunchu paqtan wañuykuman, nispa. 20Chaymi Moisesqa llaqtata nirqan:
—Ama mancharikuychischu. Diosqa probanasuykichispaqmi payta manchakunaykichispaqwanmi hamun, ahinapin mana huchallikunkichischu, nispa. 21Karullapi llaqta kashanankamataq Moisesqa Diospa kashasqan tutayaq phuyuman asuykurqan.
Altarpaq kamachikuy simi
22Señor Diosmi Moisesta nirqan:
—Israel runakunata niy:
Señor Diosmi nin:
Qankunan rikurqankichis imaynatachus qankunaman hanaq pachamanta rimaykamusqayta. 23Aman ñoqatawan yupaychawanaykichispaq qorimanta qolqemanta dioskunata ruwakunkichischu.
24Adobe altartan ruwapuwankichis, chay patapin haywawankichis ruphachina sacrificiota, sumaq kawsay sacrificioykichiskunatapas, ovejaykichiskunatapas, wakaykichiskunatapas. Mayneqkunapichus yupaychawanaykichista munasaq, chaymanmi hamuspay saminchasqaykichis. 25Rumi altartataqchus sayarichipuwankichis chayqa, aman ch'eqosqa rumiwanchu perqapuwankichis, ch'eqonawan ch'eqoqtiykichisqa manañan ñoqapaq hinachu. 26Aman altarniyqa pata-pata seqanayoqchu kanqa, chayninta wichaqtiykichis ama p'enqayniykichis rikhurinanpaq, nispan, nispayki.
Currently Selected:
ÉXODO 20: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
