ÉXODO 18
18
Moisesta Jetroq watukusqan
1Moisespa suegron Madián suyupi sacerdote Jetron uyarirqan Diospa tukuy imaymanata Moisespaqpas llaqtan Israelpaqpas ruwasqanta, uyarillarqantaq imaynatachus Señor Diosqa Israel runakunata Egipto suyumanta pusamusqantapas. 2-3Séfora warminta Moisés kachasqan qhepatataq Jetroqa Seforata iskaynin churinkunantinta chaskirqan. Hukninpa sutinmi Gersón karqan, Moisesmi nisqa: Wak runaq hallp'anpin wak llaqtayoq kani, nispa. 4Hukninpa sutintaq Eliezer#Hebreo rimaypi “Eliezer” sutiqa “Diosmi yanapaykuq” ninanta nin. karqan, Moisesmi nisqa: Taytaypa Diosninmi yanapaykuwarqan, hinaspan rey Faraonpa wañuchiwananmanta qespichiwarqan, nispa. 5Diospa orqon qaylla ch'inneqpin Moisesqa tiyasharqan, chaymanmi Jetroqa Moisespa churinkunapiwan warminpiwan rirqan. 6Hinaspanmi Moisesman kacharqan: —Ñoqa suegroyki Jetron watukamushayki warmiykipiwan churiykikunapiwan, nispa, nimuqta.
7Chaymi Moisesqa suegron chaskiykuq lloqsirqan, hinaspataq ñawpaqenpi k'umuykukuspa payta much'aykurqan. Chaymantataq tapunakurqanku imaynachus kashasqankuta, hinaspan karpaman haykurqanku. 8Chaypin Moisesqa suegronman willarqan Señor Diosqa Israel runakunarayku rey Faraontapas Egipto runakunatapas imaymana ruwasqanta, willallarqantaq imaynatachus ñanpipas muchumusqankuta, imaynatataqchus Señor Diosqa paykunata qespichimusqantapas.
9Hinaqtinmi Jetroqa Señor Diospa Egipto runakunaq munaychakuyninmanta qespichimusqanta yachaspa, Israel runakunapaq allinkunata ruwasqanmanta kusikurqan. 10Nirqantaq: —Saminchasqa Señor Diosqa kachun, rey Faraonpapas Egipto runakunaqpas munaychakuyninmanta qespichimusqasuykichismanta. Saminchasqa Señor Diosqa kachun, llaqtatapas Egipto runakunaq alqochakuyninmanta qespichimusqanmanta. 11Umankuta hoqarishaqtinkun, paykunata atiparqan. Kunanqa yachanin Señor Diosqa llapa dioskunamantapas aswan hatunraq kasqanta, nispa.
12Hinaspan Jetroqa Diospaq ruphachina sacrificiotapas huk ofrendakunatapas haywarqan. Aarontaq llapa Israel kurak runakunapiwan Diospa qayllanpi Moisespa suegronwan mikhunankupaq rirqan.
Juezkunata Moisespa churasqan
(Dt 1.9-18)
13Qhepantin p'unchaytaq Moisesqa Israel runakunata chaninchaq tiyaykurqan, paykunan Moisespa qayllanpi tutamanta ch'isiyaykuykama sayasharqanku. 14Jetrotaq runakunapaq tukuyta qatayninpa ruwasqanta rikuspa, payta nirqan: —¿Imatataq kay runakunawanri ruwanki? ¿Imanaqtintaq sapallaykiri tiyanki, lliw runataq p'unchay-ch'isiyaq suyaykushasunki? nispa.
15Moisestaq suegronta nirqan: —Runakunaqa Diosta tapukuqmi hamuwan. 16Ima sasachaypas paykuna ukhupi kan chayqa, ñoqamanmi hamunku mayqentapas chaninchanaypaq, hinaspa paykunaman willani Diospa yachachikuyninkunata kamachikuyninkunatawan, nispa.
17Hinan suegronqa payta nirqan: —Manan allinchu chay ruwasqaykiqa. 18Sinchitan sayk'unki, suyaqniyki runakunapas sayk'ullantaqmi. Qanpaqqa kayqa sinchin, manan sapallaykiqa ruwawaqchu. 19Kunan yuyaychaykusqayki, uyariykuway, Diosmi yanapaykusunki. Runakunaq Diosman qayllaykunanta qan qayllaykunki, sasachayninkutapas Diosman willanki. 20Yachachikuykunatapas kamachikuykunatapas paykunaman yachachinki, yachachillankitaq imaynatachus kawsanankuta, imatachus ruwanankutapas. 21Chaymantapas akllallaytaq allin reparaq qharikunata, Diosta manchakuqkunata, mana llulla qharikunata, lluk'iykuyta mana chaskikuqkunata, hinaspa paykunata churay waranqa runapi, pachak runapi, phisqa chunka runapi, chunka runapiwan kamachikunankupaq. 22Paykunan runakunata tukuy tiempo chaninchanqaku, llapa sasa kaqtataq apamusunkiku, llapa mana sinchi sasa kaqtataq paykuna chaninchanqaku. Chay hinatan llank'ayniykita pisiyachikunki, paykunataq yanapasunkiku. 23Diosmi chayta kamachishasunki, chay hinatachus ruwanki chayqa, atinkin aguantayta, kay llapallan runakunapas kusisqan karpankuman ripunqaku, nispa.
24Hinan Moisesqa suegronpa siminta hap'ikurqan, hinaspan tukuy nisqanta ruwarqan. 25Moisesmi lliw Israel runakunamanta allin reparaq qharikunata akllarqan, hinaspan runakunata kamachinankupaq churarqan: Waranqaman, pachakman, phisqa chunkaman, chunkamanwan. 26Paykunaqa tukuy tiempon runakunata chanincharqanku. Sasa kaqta Moisesman aparqanku, paykunataq llapa mana sinchi sasa kaqta chanincharqanku. 27Chaymantataq Moisesqa suegronta kacharparipurqan, chaymi payqa Madianman ripurqan.
Currently Selected:
ÉXODO 18: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
