ÉXODO 17
17
Qaqamanta unuq phullpumusqan
(Núm 20.1-13)
1Señor Diospa kamachikusqanman hinan llapa Israel llaqta Sin nisqa ch'inneqmanta puririrqan, asta-astarikuspa purinanpaq. Refidimpi qaynarqanku, ichaqa manan unu tarikurqanchu runakunaq ukyananpaq. 2Hinaqtinmi runakunaqa Moisesta rimapakurqanku: —¡Unuta qowayku ukyanaykupaq! nispa.
Moisestaq paykunata nirqan: —¿Imanaqtintaq rimapakuwankichis? ¿Imanaqtintaq Señor Diosta wateqankichis? nispa.
3Runakunataq ichaqa unumanta ch'akichikuspa Moisés contra chhuchupakurqanku: —¿Imapaqtaq Egiptomanta pusamuwarqankiku? ¿Ch'akiymantachu wawaykutawan uywaykutawan wañuchiwankiku? nispa.
4Hinan Moisesqa Señor Diosman waqyakuspa nirqan: —¿Imanasaqtaq kay runakunata? ¡Asllamanwanqa ch'aqewanqakun! nispa. 5Señor Diostaq payman kutichirqan: —Runakunamanta ñawpariy, Israel wakin kurak runakunata pusarikuspayki. Aparikullaytaq Nilo mayu waqtasqayki tawnatapas, hinaspa ñawpay. 6Ñoqataq haqay Horeb orqo qaqa patapi qayllaykipi sayaykusaq. Qaqata waqtaqtiykin llaqtaq ukyananpaq unu chay qaqamanta lloqsimunqa, nispa.
Moisestaq chay hinata ruwarqan Israel kurak runakunaq rikushasqan. 7Chayneqtataq suticharqan Meriba#Hebreo rimaypi “Meriba” sutiqa “rimapakuy” nisqamanmi rich'akun. nispa, Israel runakunaq rimapakusqanrayku, sutichallarqantaq Masah#Hebreo rimaypi “Masah” sutiqa “wateqay” nisqamanmi rikch'akun. nispa: ¿Ñoqanchiswanchu Señor Diosqa kashan? Icha, ¿manachu? nispa Señor Diosta wateqasqankurayku.
Israelpa Amalek runakunawan maqanakusqan
8Amalek runakunan Refidimman hamurqanku Israel runakunata maqaq. 9Hinan Moisesqa Josueta nirqan: —Wakin qharikunata akllay, hinaspa Amalek runakunawan maqanakamuy. Paqarinmi moqo patapi ñoqa kashasaq, Diospa tawnan hap'iykusqa, nispa. 10Chaymi Josueqa Moisespa kamachisqanta hina ruwarqan, hinaspan Amalek runakunawan maqanakuq rirqan. Chaykamataq Moiseswan Aaronwan Hurwan moqo pataman wicharqanku. 11Makinta Moisés hoqariqtintaq Israel runakuna atiparqan, uraykachiqtintaq Amalek runakuna atiparqan. 12Moisespa makintaq ichaqa sayk'urqanña, chaymi huk rumita hoqarispa chay patapi Moisesta tiyaykachirqanku, Aaronwan Hurwantaq makinta wichayman hap'irayarqanku, hukqa huk makinta hukkaqtaq hukkaq makinta. Chaymi Moisespa makinqa mana sayk'urqanchu inti haykunankama, 13Josuetaq Amalek runakunata mast'a pampata wañurqarichirqan.
14Hinan Señor Diosqa Moisesta nirqan: —Kayta huk qelqapi qelqay yuyarinapaq, hinaspa Josueman willamuy kay pachamanta Amalek runakunata llapantapuni chinkachinayta, nispa. 15Moisestaq altarta perqarqan, chaytan suticharqan Señor Diosqa banderaymi nispa, 16nirqanmi: ¡Señor Diospa banderanta hap'iychis! ¡Señor Diosmi Amalek runakunawan maqanakushan miray-miraykama! nispa.
Currently Selected:
ÉXODO 17: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
