ÉXODO 13
13
Phiwikunata Diospaq t'aqana
1Señor Diosmi Moisesta nirqan: 2—Llapa phiwikunata t'aqapuway. Israel runakuna ukhupi ñawpaqkaq naceqqa, runakunapas animalkunapas ñoqaqmi, nispa.
3Hinan Moisesqa runakunata nirqan: —Kamachi kashaspa Egipto suyumanta lloqsimusqanchis p'unchayta yuyarinkichis, chay p'unchaypin Señor Diosqa ancha atiyninwan horqomurqasunkichis. Aman qonchuyoq t'antata mikhunkichischu. 4Qankunaqa Abib killapin lloqsishankichis. 5Señor Diosmi machulaykichisman jurarqan Canaán runakunaq, Het runakunaq, Amor runakunaq, Hiv runakunaq, Jebus runakunaq hallp'ankuta qonanpaq, chay hallp'an imaymanaq hunt'asqa wiñanan kashan. Chayman Señor Dios pusaykusuqtiykichismi kay killapi chay fiestata ruwankichis. 6Qanchisnintin p'unchaytan mana qonchuyoq t'antata mikhunkichis, qanchiskaq p'unchaypitaq Señor Diosta yupaychana fiesta kanqa. 7Chay p'unchaykunapin mana qonchuyoq t'antata mikhunkichis, suyuntinpin qonchuyoq t'antataqa ama hap'inkichischu, aman qonchullapas kanqachu. 8Chay p'unchaypin churiykichisman willankichis: Kaytaqa ruwashanchis Egipto suyumata Señor Diospa horqomuwasqanchista yuyarispan, nispa. 9Chay fiestaqa Señor Diospa kamachikuy siminta rimarinapaqmi yuyarichisunkichis, imaynan makiykichispi khipusqapas mat'iykichispi watasqapas yuyarichisunkichis hina, Señor Diosmi ancha atiyninwan Egipto suyumanta horqomurqasunkichis. 10Chaymi chay fiestata sapa wata Abib killallapipuni ruwankichis.
11Señor Diosmi Canaán runakunaq hallp'anman pusaykusunkichis qankunamanpas machulaykichiskunamanpas prometesqanman hina, chayta qosuqtiykichismi 12llapa phiwi churita payman qopunkichis, hinallataq animalkunamantapas llapa ñawpaqkaq orqo wachasqata. Chaykunaqa Señor Diosmanmi tupan. 13Llapa ñawpaqkaq wachay asnotataq kutichikapunkichis huk borregota Señor Diosman haywaspa, manataq kutichikapunkichischu chayqa wañuchipunkichismi. Phiwi churiykichiskunatapas kutichikapullankichistaqmi.
14Qhepamantaq churiykichis tapusunkichis: ¿Imatataq ruwashankichis? nispa chayqa, paykunata ninkichis: Kamachi kashaqtinchismi, Señor Diosqa ancha atiyninwan Egipto suyumanta horqomuwarqanchis. 15Sonqonta rumiyaykachikuspa rey Faraón ripunanchista hark'awaqtinchistaq, Señor Diosqa Egipto suyupi llapan phiwita wañuchirqan, runa phiwimanta uywaq ñawpaqkaq wachasqankama. Chaymi ñoqanchisqa llapa ñawpaqkaq wachay orqo animalta Señor Diosman haywanchis, phiwi churinchiskunatataq kutichikapunchis, nispaykichis.
16Chay fiestan makiykipi khipusqa hina kanqa, mat'iykichispipas watasqa hinallataq, Egipto suyumanta Señor Diospa ancha atiyninwan horqomuwasqanchista yuyarinanchispaq, nispa.
Sayaq phuyu sayaq nina
17Rey Faraón Israel runakunata kachariqtintaq, Diosqa mana paykunata Filistea runakunaq llaqtanman riq ñannintachu pusarqan, hinaña chay ñan sispalla kashaqtinpas. Diosmi nirqan: Paqtan hatun maqanakuyta rikuspa llaqta ñakapakunman, hinaspa Egipto suyuman kutirikapunkuman, nispa. 18Chaymi Diosqa Puka Qochaman riq ch'inneq ñanninta muyuchirqan.
Israel runakunaqa Egipto suyumanta armantinkaman lloqsirqanku. 19Moisesqa Josepa tullunkunatan apapurqan Israel runakunata Josepa jurachisqanman hina. Josemi paykunata nisqa: Diosqa yanapasunkichispunin, chaypachan tulluykunata kaymanta apapunkichis, nispan.
20Sukotmantan puririrqanku, hinaspanmi ch'inneqwan tupay Etampi karpakurqanku. 21Señor Diostaq ñanninta pusananpaq ñawpaqenkuta sayaq phuyupi p'unchay rirqan, tutataq paykunata k'anchaspa sayaq ninapi rirqan, chhaynapin tutantin p'unchaynintin purirqanku. 22P'unchaymi sayaq phuyuqa ñawpaqenkuta rishallaqpuni, tutapas sayaq nina rishallaqpuni.
Currently Selected:
ÉXODO 13: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
