ÉXODO 12
12
Diospa alqaspa pasarparisqan
1Moisestawan Aarontawanmi Señor Diosqa Egipto suyupi nirqan: 2—Kay killaqa qankunapaq kanqa wata qallariy killan. 3Llapan Israel huñusqata nimuychis: Kay killaq chunkakaq p'unchayninpi sapankaykichis familiaykichispaq huk borregotapas orqo cabratapas hap'iychis. 4Familiataqchus pisilla kanqa animalta mikhuspa mana tukuq hina chayqa, wasiyoqpas wasi-masinpiwan chay animalta rakinakunqaku hayk'a runachus kasqankuman hina, sapankaq may chhikatachus mikhunanman hina. 5Ovejamantapas cabramantapas watayoq orqo animalta akllankichis, chay animalqa mana imanasqan kanqa. 6Hinaspan waqaychankichis kay killa chunka tawayoq p'unchaykama, hinaspataq llapa Israel llaqta chayta nak'ankichis rasphiyaykuyta. 7Yawartan chaskinkichis, hinaspa chaywan ch'aqchunkichis mayqen wasipichus mikhunkichis chay wasi punkuq iskaynin sayaq k'aspinta chakantawan. 8Chay tutapachan ninapi kankasqa aychata mikhunkichis, mana qonchuyoq t'antatawan haya qorakunatawan. 9Aman chay aychamantaqa imallantapas hankutapas t'impusqatapas mikhunkichischu, aswanpas umantin chakintin wiksantin ninapi kankasqallatan. 10Aman chay animalmantaqa imallantapas puchuchinkichischu paqarisninkamaqa, puchuqtaqa ninapi ruphachipunkichis. 11Hinallataq puririnaykichispaq p'achaykusqa usut'aykusqa, tawna hap'intin mikhunkichis. Usqhayllatan chayta mikhunkichis, chay animal hawa ñoqa Señor Diosqa alqaspa pasarparisaq.
12Ñoqan chay tuta llapa Egipto suyunta pasasaq, hinaspan Egipto suyupi llapa phiwita wañuchisaq, runa phiwitapas uywaq ñawpaq wachasqantapas. Egipto llapa dioskunatapas huchachaspataqmi taripasaq. Ñoqan Señor Diosqa kani. 13Yawarmi señalniykichis kanqa tiyashasqaykichis wasikunapi, yawarta rikuspaymi alqaspa pasarparillasqaykichis, chaymi Egipto runakunata wañuchiqtiy mana mayqenniykichispas wañunkichischu. 14Chay p'unchaytan yuyarinkichis, sapanka mirayniykichispi ñoqapaq hatun fiestata ruwankichis. Ñoqan kamachiykichis kayta ruwashanallaykichispaq.
15Qanchisnintin p'unchaymi mana qonchuyoq t'antata mikhunkichis. Ñawpaqkaq p'unchaymantañan wasiykichispi qonchutaqa wikch'upunkichis, pipas qonchuyoqta mikhunqa ñawpaqkaq p'unchaymanta qanchiskaq p'unchaykama chayqa, Israel llaqtaymantan wikch'usqa kanqa. 16Ñawpaqkaq p'unchaypipas qanchiskaq p'unchaypipas yupaychawanaykichispaqmi huñukunkichis. Aman chay p'unchaykunapiqa imatapas llank'ankichischu, sapankapas mikhunallaykichistan wayk'ukunkichis. 17Kay p'unchaymi Egipto suyumanta llapaykichista horqosqaykichis, chayrayku kunan p'unchay Mana Qonchuyoq T'anta Fiestata ruwankichis, sapanka mirayniykichispipas kay fiestata ruwashallankichispuni. 18Ñawpaqkaq killaq chunka tawayoq p'unchaynin ch'isimanta iskay chunka hukniyoq p'unchaynin ch'isikama mana qonchuyoq t'antata mikhunkichis. 19Qanchisnintin p'unchaymi wasiykichispi qonchu mana kanqachu. Pipas qonchuyoqta mikhuqqa, wak llaqtayoqpas Israel llaqtayoqpas kachun Israel llaqtaymantan wikch'usqa kanqa. 20Aman imatapas qonchuyoqtaqa mikhunkichischu, llapa wasiykichispin mana qonchuyoq t'antata mikhunkichis, nispaykichis, nispa.
21Moisestaq huñuykurqan llapa Israel kurak runakunata, hinaspan paykunata nirqan: —Riychis familiaykichispaq borregotapas cabratapas akllamuychis, hinaspa Diospa alqaspa pasarparinanpaq chayta nak'ankichis. 22Huk mayt'u muña#Khunuka k'allmata hap'ispa puruñapi yawarman challpuychis, hinaspa chay yawarwan ch'aqchuychis punku chakata iskaynin sayaq k'aspitawan. Amataq mayqenniykichispas wasi punkuykichismanta illarimunankama lloqsinkichischu. 23Señor Diosmi Egipto runakunata wañuchispan pasanqa. Punkuq chakanpi iskaynin sayaq k'aspipiwan yawarta rikuspantaq, Señor Diosqa chay punkuta alqaspa pasarparinqa, manataqmi wañuchinanpaq wasiykichisman sipiqta kachaykunqachu. 24Kay ruwanataqa qankunapas wawaykichiskunapas ruwashallankichispunin. 25Señor Diospa qonasuykichispaq prometesqasuykichis hallp'aman haykuspaykichistaq, chay ruwanata ruwankichis. 26Wawaykichischus tapusunkichis: ¿Imataq kay ruwayniykichisri? nispa, chayqa, 27ninkichis: Kayqa Señor Diospa alqaspa pasarparinanpaq uywa nak'asqan. Paymi Egipto suyupi Israel runakunaq wasinta alqaspa pasarparirqan. Egipto runakunata muchuchishaspanmi wasiykuta mana imanarqanpaschu, nispaykichis, nispa.
Chaymi Israel runakunaqa k'umuykukuspa Diosta yupaycharqanku. 28Hinaspan rispanku Señor Diospa Moisesta Aarontawan kamachisqanman hina ruwarqanku.
Phiwikunaq wañusqan
29Kuska tutataq Señor Diosqa Egipto suyupi llapa phiwita wañuchirqan, kamachikuy tiyananpi tiyaq rey Faraonpa phiwinmanta carcelpi tiyaqpa phiwinkama, hinallataq uywakunaq llapa ñawpaq wachasqantapas. 30Hinan chay tuta rey Faraonpas llapa oficialninkunapas, llapa Egipto runakunapas sayarirqan, sonqo nanay waqaytaq Egipto suyuntinpi karqan. Tukuy wasipin wañuqqa karqan. 31Chaymi chay tutapacha rey Faraonqa Moisestawan Aarontawan waqyachimuspa nirqan: —Runaykuna ukhumanta lloqsiychis, qankunapas Israel runakunapas, hinaspa ripuychis, Señor Diosta yupaychamuychis nisqaykichista hina. 32Ovejaykichistapas wakaykichistapas nisqaykichista hina apaychis, hinaspa ripuychis. Ñoqapaqpas Diosmanta mañampullawaychistaq saminchawananpaq, nispa.
33Egipto runakunapas Israel runakunata tanqarqan suyunkumanta usqhaylla ripunankupaq. Nirqankutaq: —Llapallaykun wañurasaqku, nispa. 34Israel runakunan mana qonchuyoq masa chapusqankuta aparqanku, hinaspan chapunankutapas llapallanta p'achapi khipuykuspa rikrarikurqanku. 35Paykunataq Moisespa kamachisqanta hina Egipto runakunamanta mañakusqaku qolqe alhajakunata, qori alhajakunata, p'achakunatawan ima. 36Señor Diostaq Israel runakunata Egipto runakunawan sumaqta rikuchisqa, chaymi paykunaman qosqaku hayk'an mañakusqankuta. Chay hinatan Egipto runakunata llat'anarqanku.
Israel runakunaq Egipto suyumanta ripusqan
37Israel runakunan puririrqanku Ramsesmanta Sukotman, soqta pachak waranqa qharikuna chakipikama, warmikunapas wawakunapas mana yupasqan karqan. 38Paykunawanqa lloqsillarqantaqmi imaymana niraq askhallaña runa, hinallataq ancha askha ovejakunapas wakakunapas. 39Paykunata Egipto runakuna qarqoshaqtinqa, manan tiemponku karqanñachu mikhunata wayk'ukunallankupaqpas, chaymi Egipto suyumanta apamusqanku masamanta mana qonchuyoq t'antata ruwarqanku.
40Israel runakunan Egipto suyupi tiyasqaku tawa pachak kinsa chunkayoq watata. 41Tawa pachak kinsa chunkayoq wata hunt'akuqtintaq, chay kikin p'unchaypi Señor Diospa llaqtanqa Egipto suyumanta t'aqa-t'aqa lloqsimpurqanku. 42Chay tutan Señor Diosqa qhawasharqan Egipto suyumanta paykunata horqomunanpaq. Chaymi chay tutataqa llapa Israel runakuna sapanka mirayninkupi Señor Diosta yupaychanankupaq qhawashallanqakupuni.
43Señor Diostaq Moisestawan Aarontawan nirqan: —Kaymi Alqaspa Pasarpariy Fiestapaq kamachikuy: Manan pipas wak llaqtayoqqa chay nak'asqa animaltaqa mikhunqachu. 44Aswanpas qolqewan rantisqa kamachi runallan chaytaqa mikhunqa, qhari-kayninpi señalasqa kasqanmantaña. 45Purikuq wak llaqtayoqwan, wak llaqtayoq llank'apakuqwanmi ichaqa chayta mana mikhunqachu. 46Ch'ulla wasillapin mikhunkichis, aman chay aychataqa chaymanta horqonkichischu, amataq tulluntapas p'akinkichischu. 47Lliw Israel llaqtan chayta ruwanqa. 48Qanwan tiyaq pipas wak llaqtayoqqa Alqaspa Pasarpariy Fiestata Señor Diospaq ruwayta munanqa chayqa, familianpi llapa qhari señalasqa kachun, hinaspaña fiestata ruwanqa, Israel suyupi suyumasiykichis hinataq kapunqa, ichaqa manan pi mana señalasqapas chayta mikhunqachu. 49Kasqan kamachikuyllan kanqa llaqtayoqpaqpas, qankuna ukhupi tiyaq wak llaqtayoqpaqpas, nispa.
50Llapa Israel runakunan Moisestawan Aarontawan Señor Diospa kamachisqanman hina ruwarqanku. 51Chay kikin p'unchaymi Señor Diosqa Israel runakunata Egipto suyumanta t'aqa-t'aqata horqomurqan.
Currently Selected:
ÉXODO 12: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
